گجرات انتظامیہ ولوں پنجابی رہتل دیہاڑ دا جشن

رپورٹ: محمد اویس باسل

پورے پنجاب وانگ ضلع گجرات وچ وی پنجابی رہتل دا دن پنجاب دے ستاں رنگاں وچ منایا گیا۔ ڈپٹی کمشنر گجرات ڈاکٹر خرم شہزاد ہوراں دی آگوائی وچ پنجابی رہتل دی جانکاری دین کارن ٹورے دا آہر کیتا گیا، سبھناں محکمیاں دے ضلعی آگواں پنجاب دا ثقافتی نشان پگ بنھی تے پنجابی پہناوے پا کے دفتراں وچ آئے۔ تے وزارتِ اطلاعات و ثقافت پنجاب سرکار دے آکھے تے پنجاب دی رہتل دے دن دے حوالے نال مرکزی تقریبات ڈی سی کمپلکس تے تحصیل آفس تک جانکاری ٹورے وچ رلت کیتی۔ پڑھیاراں نوں اپنی وسوں بارے جانکاری دین لئی تعلیمی اداریاں وچ پنجابی رہتل دا وکھالا کردے تگڑے اکٹھ کیتے گئے۔ڈپٹی کمشنرگجرات ڈاکٹر خرم شہزاد ہوراں نے آکھیا کہ پنجاب دی رہتل دا دن منان دا مقصد نویں نسل نوں پنجاب دی قدیم تے مان جوگ وسوں بارے جانکاری دینا ایں۔اوہناں دا آکھنا سی کہ میں وکھو وکھ تعلیمی اداریاں وچ جا کے ثقافت دے صوبائی دن دے حوالے نال سرگرمیاں نوں ویکھیا واچیا، پڑھیاراں وچ ایس حوالے نال بھرواں جذبہ تے ترنگ اے۔ اوہناں دا ہور آکھنا سی کہ پنجاب دی ثقافت ادب، محبت، بھائی چارہ ، امن تے رواداری دے رنگاں وچ رچی ہوئی اے۔ اس نوں نویں نسل وچ منتقل کرنا اساں ساریاں دی سانجھی ذمہ واری اے۔اسسٹنٹ کمشنر عمر دراز گوندل ہوراں نے آکھیا کہ پنجاب ہریالی، خوشحالی تے امن دا دیس اے، اسانوں اپنی دھرتی نال محبت اے تے اسیں اس دیاں قدراں تے روایات نوں اگے ودھانا ایں۔ سی ای او ایجوکیشن چودھری اورنگزیب ہوراں آکھیا کہ پنجاب سرکار دے آکھے تے سبھناں تعلیمی اداریاں وچ پنجاب دی ثقافت دا دن منایا جارہا اے، مڈھلا مقصد نویں نسل نوں دسنا ایں کہ پنجاب دِیاں روایات کیہ نیں، ساڈیاں کھیڈاں کنج دیاں نیں، پنجاب دی لوکائی چا تے خشیاں کنج مناندی اے تے اوکڑ وچ کسراں اک دوجے دے نال کھلوندی اے۔