“پرانے ویلے چنگے سن “

اے گل بلکل سچی اے مڈھل ،جوئوں ،باجرہ ،جوار، بگاٹ تے پکھڑے دیاں روٹیاں کھا کے ویلا ٹپان آلے لوک اج دے ون سونے کھانے برگر پیزا تے انج دیاں ہور کنیاں چیزاں کھان والیاں توں ہزاراں گناہ چنگے سن نہ اوہناں نوںکدی بلڈ پریشر،نہ شوگر ،نہ دل دی مرض نہ کوئی ہور بیماری ہوندی سی اوہ لوک جو کھاندے سن ہوندا خالص سی اوہ سادے ویلے سن جیڈی بھاری خوراک کھاندے سن اہدوں چوکھا بھارا کم و ی کردے سن مینوں یاد اے چھوٹیاں ہوندیاں شوق نال اسی وی منجی لاندے ساں،شاموں شام سوجانا کہ سویرے منجی لان جانا اے راتی ای کچھا،سِرتے بنناآلہ پرنا تے ایک چیگا ایک تھیلی وچ پاکے سرہانے رکھ لینافیر وڈی سرگی اٹھنا محلے وچوں مُنجی لاوے اکٹھے کرنے تے پیلیاں ول ٹر پینا اوتھے جاندیاں نوں بابیاں کھوتے تے لاب لدھ کے کدو وچ سٹھ دتی ہوندی سی اساں منڈیاں ساریاں پہلاں پورے کدو وچ لاب دیاں ہتھیاں کھلارنیاں تے کروُ مار کے تھاں ونڈ لینی فیر اپنی اپنی ونڈی تھاں وچ مُنجی لانی شروع کر دینی جنے اپنے حصے دی مُنجی لالینی اوہنے باہر بنی تے بہہ جانا میرے نال میرا نال میراچھوٹا بھرا”سیف وریاہ “وی ساڈے نال مُنجی لاندا سی اوہ بڑا ڈھیلا سی اوہ ہر واری پیچھے رہ جاندا سی مینوں اہدی وی فکر ہوندی سی اپنی مُنجی لا کے اوہنوں وی لوانی ہوندی سی،کِلا لاندیاں سورج چڑھ آوناں سویر دے کدو وچ ٹُر ٹُر کے اندر تے بُکھ نال انج جیوے کتورے نچن لگ پینے فیر لگنا پنڈوں ویکھن کہ کدوں پہتہ آوندا اے،جدوں دوروں پہتہ نظری آوناں تے ہور تیز مُنجی لانی شروع ہوجانی کیوں کہ رج کے روٹی کھان دے بعدوں ٹِڈ آپھر جیاجاندا اے فیر مُنجی کہٹ لگدی ا ے کیونکہ مُنجی اُڑ کے لانی پیندی اے ، خیر پہتہ آوناں اکٹھیاں بہہ کے روٹی کھانی گھیو آلی روٹی نال کچے گھنڈے دا اپنا ای سواد ہونا سی،نالے سیانے آکھدے سن کچا گھنڈا کھان نال بندہ سپ کیڑے توں وی بچیا رہنداے روٹی کھا کے تھوڑا جناں ارام کرناں فیر دوپہر تانی مُنجی لانی مطلب اہنی اہدوں محنت ہوندی سی ، کجھ ورے ہور پچھے ٹُر جائیے تے اوہ زمانہ آجاندا اے جدوں نہ لَیٹ ہوندی سی ماڑے ویلے ہوندے سن دھیاں دھیانیاں اپنے داج لئی آپوں محنت کردیاں سن اماں جی کدی کدی اپنا بچپنا سناندے سن اوہ آکھدے سن پترا اوہو ویلے بڑی مڑپن ہوندی سی، اماں جی مرحومہ مغفورہ دیا ں اوہ گلا ں سن کے سچ نال لوں کھلو جاندے سن کہ ایڈا اوکھا ویلا سی ،اوہ فرماندیاں سن کہ اساں ساریاں سہیلیاں اپنے داج لئی سوتی دے کھیساں لئی چرخا کتنا، اساں متھیا ہوند ا سی کہ اک دن فلانی گھر چرخہ رکھنااک دن فلانی گھرمطلب اے سلسلہ پورا ہفتہ چلدا سی جہدے گھر چرخہ رکھیا جانا اوہناںدے ماپیاں دھیاں دھیانیاں سمجھ کے بڑی سیوا کرنی اس ویلے نہ کوئی برگر ،پیزا ہوندا سی اورنہ ہی کوئی اور فاسٹ فوڈ ماڑے ویلے سن جو سریا ہونا اوہ ہی دے دینا ،کدی کدی تے لہسن پلا ء نال وی روٹی کھا لینی “د ھنئے دی چٹنی وچ لسی پاکے بنائی دا سی اہنوں لہسن پلا ء آکھدے سن ” شاموں شام سوانیاں رات نو ں اکھٹیاں ایک گھر بہہ کے چرخہ کتناشروع کردینا ،بھلے ویلے سن لیٹ دا ناموں نشان نیئں سی دیوے وچ پان لئی سروں دے تیل جوگے پیسے نئیں سن ہوندے بس تکے نال روئی لینی سجے ہتھ نال چرخے دا وڈا چکر چلانا جہدا چھوٹے جے چکر نال تعلق ہوندا سی وڈا چکر تے چھوٹے چکر نوں ایک موٹے دھاگے دا بیلٹ بناکے چڑھایاجاندا سی ،اس چھوٹے چکر نال ایک لوہے کا ترنگلا ہوندا سی ،جدوں سوانیاں سجے ہتھ نال وڈا چکا گھمانا تے بیلٹ نما دھاگے نال چھوٹاچکر چلنااہدے نال ایک لماموٹا جیا کِل ہوندا سی جنہوں پنجابی زبان وچ “ترنگلا “آکھدے نیں جہدے تے روں دی پونی جہیڑی گول تے لمبیاں بنا کے رکھیاں جاندیاں سن اے پونی انج دی ہوندی سی جیویں اج کل کباب ہوندے نے اوہ پونی نوں چھوٹے چکے دے نال جتھے ترنگلا لگا ہوندا سی اہدے نال ایک تند لانی وڈے چکے نوں تیزی نال گھمانا تے تے دھاگہ بنیدیاں ہویاں پونی ودھنا شروع ہوجانا سوانیاں اہنوں نو اوتاں سر تیکر لے کے جاندیاں سن جہڑا اک لمبادھاگہ بن جاندا سی، اہنوں فیر اس کِل نما لوے دی سلاخ “ترنگلا”تے ولیٹ دینا جدوں اوہ دھاگہ کریلے جناں ہوجانا تے اہنوں لالیناانج ای سار ی ساری رات سوانیاں کپاہ کتنی تے کنے کنے کلو کپاہ کت دینی اس تو ں بعد پنڈ تے جولائے کول لے جاناجنے اوہ دھاگہ کھول کے تے ایک وڈے پِنے تے ولیٹنا تے اپنی کھڈی تے کھیس بنانے جہڑے سوانیاں اپنی داج لئی اوہ کھیس اپنی ہتھی بنادیاں سن ،آکھدے نے اس ویلے کنک دی روٹی کدوں نصیب ہوندی سی اے باجرا ،جوئوں ،مڈھل وغیر ہ سارا دن پتیلے وچ پکاندیاں رہنا تے شامی پکنااوہ ای ُمڑ کھانے میں سوچنا اے ساڈے کنے چنگے بخت نے اسی اس روشنی وچ جمے جدوں ہر طرح دیاں سہولتا نے اہنیاں سہولتاں دے ہوندیاں وی اسی کنے مسائلاں وچ گھرے ہاں اہدی کی وجہ اے میرے خیال نال اہدا کارن اے ای کہ اہنیاں سہولتاں دے پاروں اسی ہڈ حرام ہو گئے آں تے بیماریاں تے مسائلاں وچ جھگڑ کتے واں میں اے وی نئیں آکھد کہ پرانے ویلے آجان کیونکہ پرانے ویلے آگئے تے سانوں کنک دی تھاں مڈھل،جوار ،جوئوں کھانے پینے نے، ہاں روے اے ای دور پر اسی اہنیاں نعمتاں کھا کے اللہ دا شکر ادا کریے تے نالے جہناں کھانے واں اہناں کم وی کریے ،