ڈاکٹر محمد شریف۔۔۔ یاداں تے گلاں

شاندار تے باوقار زندگی گزار کے اللہ دے حضور پیش ہو جان والا درویش صفت انسان

تحریر : محمد نواز کھرل

آہ…المصطفیٰ آئی ہسپتال دے ایم ایس ڈاکٹر محمد شریف ساڈے توں ہمیشہ لئی وچھڑ گئے…اوہ 14مارچ دی سویرے بھریا میلہ چھڈکے اوتھے چلے گئے جتھے اسیں ساریاں جانا اے۔ جدوں کوچ نقارہ وج اٹھدا اے تے جان والا اپنے پیاریاں دے پھیلے ہوئے ہتھاں ول ویکھدا اے نہ اپنے چاہن والیاں دی اشک بار اکھاں ول…اک نہ اک دن اسیں ساریں نوں ایس رنگاں بھری دنیا توں رخصت ہو جانا اے۔ زندگی دی سب توں وڈی حقیقت دا ناں موت اے جہڑی پیدائش دے لمحہ اول توں انساناں دے نال چلدی اے تے کسے دن اچانک انگلی پھڑ کے دور دی وادیاں نوں نکل جاندی اے۔ جتھوں لوٹ کے کوئی نہیں آندا‘ صرف اوہناں دی یاداں آندیاں نیں۔

پیارے دوستو !
زندگی بھر تنی رسی اتے چلن والے محتاط تے مطمئن‘ شفیق تے خلیق ڈاکٹر محمد شریف چلے گئے لیکن اوہناں دی یاداں ساڈے دلاں وچ ہمیشہ مہکدیاں رہن گئیاں۔ اوہ لال گلاباں دے طشت وانگوں المصطفیٰ آئی ہسپتال دے ماحول وچ چار سو دمکدے تے مہکدے رہن گے۔ اوہناں دی قبر دے سرہانے کوئی چراغ جلے یا نہ جلے‘ ساڈے جئے اوہناں دی کولیگز دے دلاں دے کسے نہ کسے طاق وچ اوہ شمع بن کے جگمگاندے رہن گے۔ المصطفیٰ آئی ہسپتال دے درودیوار اوہناں نوں کدی نہیں بھلن گے اوہناں دی کمی قدم قدم تے محسوس ہوندی رہوے گی۔ اوہ پچھلے اک سال توں المصطفیٰ آئی ہسپتال لہور وچ ایم ایس دے اہم منصب اتے فائز سن۔ گزرے سال دا بوہتا وقت ایسے درویش صفت انسان تے سادگی تے سچائی دے پیکر دی رفاقتاں‘ سنگتاں‘ مجلساں تے گلاں دی مہکدی چھاواں وچ گزریا۔ زندگی بھر قناعت‘ درویشی‘ سادگی تے استغنا نوں اپنا اوڑھنا بچھونا بنائے رکھن والے سیلف میڈ ڈاکٹر محمد شریف نوں معاشرتی چکاچوند نال ذرا جئی دلچسپی وی نہیں سی۔ تصنع‘ بناوٹ‘ چمک دمک تے لشکارا اوہناں نوں چھو کے وی نہیں گزریا سی۔ اوہ ہر تکلف تے نمائش توں آزاد‘ حال مست بزرگ سن۔اوہ اپنی حداں دے اندر سمٹی سمٹائی لیکن پروقار تے شاندار زندگی گزارن والے قلندرانہ تے من موجی مزاج دے کھلے ڈلے انسان سن۔ اوہناں دی شخصیت دا کھلا ڈھلا پن دوستانہ جئی بے تکلفی پیدا کر دیندا سی۔ اوہ زاہد خشک نہیں سن‘ اوہناں دے کول بیٹھ کے اوہناں دی شخصیت دا مشفقانہ جمال نہال کر دیندا سی۔ اجلی‘ شفاف تے بے داغ شخصیت دے مالک ڈاکٹر محمد شریف جناح ہسپتال لاہور‘ لیڈی ویلنگٹن ہسپتال تے اتفاق ہسپتال جئے وڈے ہسپتالاں دے ایم ایس رہے لیکن اوہناں دی ذات الزام تے تنازعیاں توں پاک رہی۔ اوہ طمانیت دے ایس احساس دے نال ایس مفاد پرستیاں توں اٹی دنیا توں رخصت ہوئے کہ ضمیر اتے کوئی بوجھ نہیں‘ دامن اتے کوئی داغ نہیں۔ مرد پاکباز ڈاکٹر محمد شریف دی شخصیت دا نمایاں پہلواوہناں دا دینی ذوق و شوق سی۔ اوہ اک پختہ نظریاتی انسان سن۔ قرآن دے نال اوہناں دی والہانہ وابستگی مثالی سی۔ اوہناں دا ایمان صورت فولاد پختہ سی۔ پیغمبر اسلام پیارے آقاﷺ دے نال اوہناں دا عشق اوہناں دی ہر ہر گل وچ جھلکدا سی۔ مدینے دی گلیاں اوہناں دے دل‘ دماغ تے روح وچ موتیے دی کلیاں بن کے مہکدی رہندیاں سن۔ صحابہ کرام‘ اہل بیت اطہار‘ اولیا کرام تے سلف صالحین دا معطر تذکرہ اوہناں دی زباناںتے ہر ویلے سجیا رہندا۔ ایسے نور توں اوہناں دے من دی دنیا آباد سی تے ایسے نور توں اوہناں دی قبر منور ہووے گی۔ بلاشبہ اوہناں دی جبیں ایس سجدے توں آشنا سی جہڑی ہزار سجدیاں توں نجات دوا دیندا اے۔ اوہناں نوں نہ رعب پان دی لت‘ نہ مرعوب ہون دا عارضہ‘ شرافت و نجابت دے پیکر ڈاکٹر محمد شریف نے نومبر2020وچ قائم ہون والے ’’المصطفیٰ آئی ہسپتال‘‘ دے پہلے ایم ایس دی حیثیت نال اخلاص‘ نیک نیتی تے صاقد جذبے دے نال شاندار تے یادگار خدمات سرانجام دتیاں تے ایس علاج گاہ نوں مفلوک الحال نشیناں لئی پناہ گاہ بنان لئی انتھک محنت کیتی۔ المصطفیٰ آئی ہسپتال دا سارا سٹاف اوہناں دی شفقتاںدا گھائل تے قائل سن۔اوہناں دی نگرانی وچ پرچی توں آپریشن تک مفت سہولتاں فراہم کردے المصطفیٰ آئی ہسپتال وچ صرف اک سال تے تن مہینے دے مختصر عرصہ وچ کورونا دی سنگین صورتحال دے باوجود چار ہزار توں ودھ مستحق بندگان خدا دی اکھاں دے مفت تے معیاری آپریشن کر کے اوہناں دی بینائی فیر توں بحال کیتی گئی۔ ہسپتال فنگشنل ہون مگروں کجھ مہینے ہفتہ وچ صرف بدھ دا اک دن آپریشن لئی مخصوص سی۔ لیکن کجھ ای مہینیاں وچ مریضاں دی ودھدی تعداد دے پیش نظر بدھ دے نال نال جمعہ دے دن وی آپریشن کیتے جان لگے جد کہ ڈاکٹر محمد شریف دی زندگی دے آخری ایام وچ ہر ہفتے مسلسل تن دن چٹے موتیا دے آپریشن کرن دا سلسلہ شروع ہو گیا تے یومیہ او پی ڈی دی تعداد ودھدے ودھدے تن سو تک پہنچ گئی۔ ایہناں ساری جگمگاندی کامیابیاں دے پچھے فرض شناس ڈاکٹر محمد شریف تے اوہناں دی مخلص ٹیم دی محنت‘ جذبہ‘ خلوص تے لگن کارفرما سی۔ اوہ المصطفیٰ آئی ہسپتال نوں وسعت تے توسیع دین لئی عزائم دا جہان تازہ اپنے دل وچ رکھدے سن۔ ہسپتال دے ہور دو فلورز دی تعمیر اتے بہت خوش سن تے مستقبل وچ بہت کجھ کرن دا ارادہ رکھدے سن لیکن افسوس کہ ظالم وقت مُک گیا سی۔ وقتاں دی اجلی روایتاں وچ گندھے ڈاکٹر محمد شریف ہر دن بلاناغہ صبح ٹھیک نو وجے ہسپتال وچ اپنی مخصوص کرسی اتے مسکراندے چہرے دے نال موجود ہوندے تے شام چار وجے تک دفتر وچ فروکش رہندے۔ ہن اوہناں دی خالی کرسی ویکھ کے دل گہری اداسی وچ ڈب جاندا اے۔ فرض شناسی دی قندیل اوہناں دے اندر ہر ویلے روشن رہندی۔ اوہ ہسپتال پہنچدے ای سب توں پہلے سارے سٹاف نوں نال بٹھا کے مرشد کریم حضرت پیر سید ریاض حسین شاہ جی قبلہ دے ترجمہ قرآن دی مدد نال درس قرآن دیندے۔ درس قرآن کے دوران مفاہیم قرآن بیان کردے ہوئے اوہناں دی کیفیت دیدنی ہوندی۔ پچھلے اک سال تے کجھ مہینے دے ایہناں درساں وچ 20پارے مکمل کیتے گئے۔ ہر آپریشن ڈے دے موقع تے ڈاکٹر محمد شریف رات نو وجے تک ہسپتال وچ ڈٹ کے تے جم کے بیٹھدے تے ہر کم دی خودنگرانی کردے تے مسلسل انٹرکام اتے ساری ٹیم تے اوٹی سٹاف دے نال رابطے وچ رہندے۔ آپریشن لسٹ ختم ہون مگروں ہسپتال دے ایچ او ڈی تے سرجن صوفی مزاج پروفیسر ڈاکٹر ناصر چوہدری آپریشن تھیٹر توں باہر آندے تے ڈاکٹر محمد شریف اوہناں دی دلداری لئی سامنے کھڑے ہوندے۔ مسکراہٹاں دا تبادلہ ہوندا تے فیر ہسپتال دے ایگزیکٹو آفس وچ روحانی محفل سج جاندی۔ ڈاکٹر محمد شریف ایس وجدانی محفل دے روح رواں ہوندے۔ محفل دے شروع وچ نہایت ذوق و شوق دے نال پروفیسر ڈاکٹر ناصر چوہدری دے عظیم شیخ طریقت حضرت پیر ڈاکٹر فرخ حفیظ دا آڈیو لیکچر سن کے سماعتاں نوں معطر کیتا جاندا تے لیکچر ختم ہون تے ڈاکٹر شریف ایس علمی‘ فکری تے اصلاحی لیکچر دی ہور تشریح کردے۔ اہم نکات نوں دہراندے تے ساڈے جئے ہم نشیناں دے من وچ روشنی بھر دیندے۔ اوہناں دی تشریحات سن کے محفل وچ شریک ہر بندا اپنے باطن دی لونوں تیز ہوندے محسوس کردا‘ محفل دے دوران اکٹھے کھاناکھاندا جاندا۔
ایسے مستقل معمول دے تسلسل وچ جمعہ 11مارچ نوں 50آپریشن مکمل ہون مگروں شام ست وجے حسب معمول فیر توں محفل سجی‘ ڈاکٹر محمد شریف ہمیشہ وانگوں محفل دے دلہا بنے چہکدے تے مہکدے رہے تے سارا ماحول خوشبوواں نال مہکدا رہیا۔ اکٹھے ڈنر کیتا۔ہسپتال دے مستقبل دے منصوبیاں اتے مشاورت ہوئی‘ گپ شپ دے کئی دور چلے‘ ہلکا پھلکا ہسی مذاق وی چلدا رہیا۔ ڈاکٹر محمد شریف خوش گفتاری تے خوش کلامی دا جادو جگاندے رہے تے اسیں سر دھندے رہے۔ ساڈے نو وجے شام ایہہ بیٹھک ختم ہوئی تے اسیں اک دوجے نال الوداعی مصافحیاں تے معانقیاں مگروں اپنے اپنے گھراں نوں واپس چلے گئے۔ ایہہ مجلس ڈاکٹر محمد شریف دے نال آخری ملاقات ثابت ہوئی۔ گھر پہنچ کے اوہ نماز تے تلاوت قرآن مگروں سو گئے۔ رات تن وجے اچانک اوہناں دی طبیعت وگڑن تے اوہناں نوں جناح لے جایا گیا جتھے اوہ دو دن آئی سی یو وچ موت و حیات دی کشمکش وچ مبتلا رہن مگروں سانوں ساریاں نوں روندا بلکدا چھڈ کے ایس جہان رنگ و بو توں ہمیشہ لئی رخصت ہو گئے۔ اوہناں نے ایہہ وی سوچیا کہ انج اچانک چلے جان توں اوہناں نال محبت کرن والے اوہناں دے پیاریاں دے دل کنے ویران تے خالی خالی ہو جان گے۔
دوستو !

خوشاب شہر وچ جناب محمد لطیف دے گھر یکم اپریل1958 نوں پیدا ہون والے‘83وچ نشتر میڈیکل کالج ملتان توں ایم بی بی ایس دی ڈگری لے کے 63 سال انساناں دی بستیاں وچ اجالے بون‘ شفا ونڈن تے روشنیاں تقسیم کرن والے… پنج دھیاں تے اک پتر دے پیو ڈاکٹر محمد شریف دی نماز جنازہ لئی اوہناں دے آبائی شہر دے معروف روحانی مرکز دربار بادشاہاں وچ 14مارچ دی اداس شام صفاں آراستہ ہوئیاں تے تاحد نظر لوکاں دا ہجوم دکھائی دتا۔ لوکاں دی اکھاں توں ٹپکدے اتھرو دس رہے سن کہ جان والا اوہناں نوں کنا عزیز سی۔ ڈاکٹر محمد شریف نہیں رہے‘ اسیں وی نہیں رہنا‘ موت نوں ہر ویلے یاد رکھو‘ کسے ویلے وی زندگی دا چانن بجھ سکدا اے۔ نفرتاں تے عداوتاں نوں محبتاں وچ بدل لو…احسان دانش نے آکھیا سی:
قبر کے چوکھٹے خالی ہیں انھیں مت بھولو
جانے کب کون سی تصویر لگا دی جائے
لیکن اسیں قبر دے چوکھٹیاں نوں بھلے رہندے آں۔ دنیا دے لوبھ لالچ تے دنیاداری دے دھندیاں وچ ایس طرح الجھ کے رہ جاندے آں کہ کسے دوجے جہان دا تصور وی باقی نہیں رہندا۔ ایتھوں تک کہ کوچ دا نقارہ وج اٹھدا اے تے سب ٹھاٹھ باٹھ ایتھے پیا رہ جاندا اے…
لوکو! جان لوو کہ روئے زمین تے ہر شے فانی اے۔ باقی رہے نام اللہ دا
دعا اے اللہ کریم ڈاکٹر محمد شریف دی روح نوں آسودگی بخشے‘ اوہناں دی قبر نوں نور نال بھر دیوے تے اوہناں نوں اپنے حلقہ خاصاں وچ جگہ دیوے…
لے او یار حوالے رب دے تے میلے چار دناں دے
اس دن عید مبارک ہوسی جس دن فر ملاں گے