میاں دے نعرے فیر وجن گے
حناپرویزبٹ
وعدے کرنا کرکے مُکرنا‘ آکڑنا‘ وگڑنا تے وگڑ کے چلانا‘ دھمکانا‘ لڑنا‘ لڑانا‘ کجھ نہ بنے تے روندے جانا‘ ایہہ وے ایہدی کل زندگی جو صرف ایہناں چار مصرعیاں تے ادھارت اے ایہدا لائیو مظاہرہ لوکاں نے آپ ویکھیا اے۔ واقعی ایہ وکھرا نکلیا‘ پہلے والیاں نوں تے اپنے کہے ہوئے دا کجھ نہ کجھ پاس رکھنا پیندا سی پر ایہنے وعدیاں دا کوئی ہلکا جیہا وی بھار نہ رکھیا تے لوک وی ایہدے بول بچن دا کوئی بھار نہ رکھ سکے۔ ایہدے گڈے ہوئے دی وجہ نال جتھے 30 دے نیڑے انصافی اراکین اسمبلی منحرف ہوئے اوتھے تائب ہون والی میری انصافی سیاسی سہیلی کہندی اے یار مگرمچھ دے اتھرو تے کدی نہیں سن ویکھے پر ہن زندہ جاوید انسانی مگرمچھ ویکھ لیا۔ کوئی بندہ ایناں وی بزدل ہو سکدا اے کہ صرف کرسی دے جان تے جلسے وچ ای رو پوے۔ پہلے دن توں رانگ نمبر نے لوکاں نوں غلط ٹریک تے پایا اپوزیشن نے صرف 30 دیہاڑیاں وچ ایہدی نام نہاد 22سالہ جدوجہد دی جھوٹی گردان فشوں کر دتی۔ پہلے کہندا سی تحریک عدم اعتماد میریاں دعاواں دی قبولیت دا نتیجہ اے میں تے پہلے ای ایہدا انتظار کر رہیا سی تاں جے لوکاں نوں دس سکاں کہ کون جھوٹا اے؟ امریکہ جا کے سٹیڈیم وچ خطاب کرن دا ڈرامہ کرکے واپس آیا تے کہندا سی ورلڈکپ جت کے آیا واں۔ ہن کہندا سی تحریک عدم اعتماد عالمی سازش اے۔ لوک تے کھل ڈلھ کے کہہ رہے نیں کہ امریکہ نوں کیہ لوڑ اے تہاڈے نال ناراض ہون دی‘ امریکہ بہادر تے اینا ںخوش سی کہ کٹھ پتلی نے امریکی شہری آئی ایم ایف دا بندہ گورنر سٹیٹ بینک تعینات کر دتا۔ ملک نوں آئی ایم ایف دے حوالے تساں کیتا۔ آئی ایم ایف دے کہن تے ڈالر نوں تسیں کھلا چھڈ دتا‘ کشمیر وچ بھارتی جارحیت تے کوئی ردعمل نہ دین دا وعدہ تسیں کیتا‘ اک دہائی توں عافیہ عافیہ پکاردے رہے جیویں ای اقتدار وچ آئے تے تہانوں سپ سُنگھ گیا‘ سی پیک روک کے ساری جانکاری امریکہ نوں دے دتی۔
امریکہ بہادر تے ایناں مطمئن سی کہ تسیں امریکی شہری حفیظ شیخ نوں خزانہ تھما دتا‘ امریکی شہری ندیم بابر دے حوالے توانائی کر دتی۔ امریکی شہری معیدیوسف نوں سلامتی دا مشیر لا دتا۔ امریکی شہری ثانیہ نشتر نوں پیسے ونڈن تے بٹھا دتا۔ امریکی شہری شہبازگل نوں جھوٹھا پراپیگنڈا کرن دی ذمہ داری دے دتی۔ برطانوی شہری شہزاداکبر نو ںجھوٹے مقدمے بنان دا کم دے دتا جنہے جو مقدمہ قائم کیتا جھوٹا نکلیا‘ نکامی دی سیاہی نہ صرف اوہدے چہرے توں واضح ہوئی سگوں اوہنے احتساب دے پورے عمل نوں ای مشکوک تے یکطرفہ ثابت کر دتا۔ برطانوی ایجنسیاں نے وی میاں نوازشریف تے شہبازشریف دے خلاف منی لانڈرنگ دے سارے الزامات نوں کوڑ قرار دے دتا۔ امریکہ تے ایناں خوش سی کہ اوہدی خوشی چھپائے نہیں سی چھپدی پاکستان وچ مہنگائی عروج تے اپڑان دا ٹارگٹ تسیں پورا کر چکے سی یوٹیلیٹی بل لوکاں دے گلاں دے طوق بن چکے سی بیرونی قرضے 52ہزار ارب روپیے تک تسیں اپڑا دتے۔ سیاسی معاملے اوس ویلے خراب ہوئے جدوں پوری دی پوری معاشیات دی لٹیا تسیں ڈوب دتی تے عملی طور تے ملک دیوالیہ کر دتا۔ ڈر اے کہ تنخواہواں دی ادائیگی لئی رقم وی خزانے وچ موجود نہیں ہووے گی۔ ایس لئی نویں بجٹ توں پہلاں ای پاکستانی اسٹیبلشمنٹ نے نیوٹرل ہون دا اصولی فیصلہ کر لیا۔ پہلی واری جدوں حامیت توں محروم ہویا تے اوکڑاں وچ پھسیا‘ پرویزالٰہی اوکڑاں دور کرن دی کوشش وچ آپ اوکڑاں وچ پھس گئے‘ ہن اوہناں نوں اپنی سپیکرشپ دے نال نال سیاست دا وی بوریا بستر گول ہون دا ڈر لگ گیا اے۔
اک ہوندا اے پارس جہنوں چھو کے ہر چیز سونا ہو جاندی اے پر تسیں اوہ واحد پتھر او جہنوں چھو کے شیخ رشید‘ اسدعمر‘ عمرایوب‘ بابراعوان‘ فواد چوہدری‘ فردوس عاشق اعوان سنے اک درجن توں ودھ سیاستداناں دا کیریئر ختم ہو گیا ہمیشہ لئی سیاست توں آئوٹ ہون دے درپیش خطرے نال نبڑن لئی اوہ بڑیاں کوشش جاری رکھے ہوئے نیں پر کامیابی دا امکان صفر اے۔ لوک سمجھ چکے نیں کہ کون جھوٹا اے تے کون سچا‘ پر سوشل میڈیا تے ایہنوں بڑا وڈا بزدار قرار دتا جا رہیا اے ایس بارے میمز دا سیلاب آ گیا اے جہناں وچوں نمایاں پیش خدمت نیں۔ جے مہنگائی کرکے رلاندا اے تے تقریراں کرکے ہساندا وی اے۔ لوکاں وچ جان دا وقت ہو چکیا اے پر اوہ تے بھڑکا رہیا اے کہ سب اپریل فول ثابت ہووے گا پر جدوں گھر دا دیوا بالن دا تیل ختم ہو جاوے گا تے سارا شوق لہہ جاندا اے فیر کم کرن والا بندا ای ترجیح ہوندا اے۔ اللہ نے اک واری سن لئی اے ہن نعرہ لگے گا دوبارہ ۔ میاں دے نعرے اک واری فیر وجن گے۔٭٭
