سائیں اختر حسین لاہوری (پنجابی شاعر)

ایم آر شاہد

9بھیناں دے اکلّے بھرا سائیں اخترحسین لاہوری 5نومبر 1937ء نوں رنگ محل لہور وچ پیدا ہوئے۔ ایہناں دے والد محمد عبداللہ پہلے راج گیر سن۔ بعد وچ بڑے غلام علی خان دے شاگرد بن کے موسیقی نال وابستہ ہو گئے۔ سائیں اختر نے لنگے منڈی دے سکول (جتھے ایہناں دیہاڑیاں سکوٹراں دا اڈا قائم اے) توں پرائمری دے بعد دیال سنگھ ہائی سکول سید مٹھا بازار وچ داخلہ لیا۔ گھر دے مالی حالات خراب سن ایس لئی نویں جماعت وچ ایسے سکول دے اندر نائب صدر بن گئے۔ ایس دوران پرائیویٹ تعلیم دا سلسلہ جاری رہیا۔
میٹرک دے بعد ٹی اینڈ ٹی وچ نوکری مل گئی۔ اوہناں نے ایتھے ٹریڈ یونین سرگرمیاں وچ بھرواں حصہ لیا۔ ہڑتالاں کیتیاں‘ احتجاج کروائے‘ فیر جیل یاترا پاروں تنزلی ہوئی‘ ترقیاں کیتیاں‘ محکمانہ فائل تے ’’اینٹی سٹیٹ‘‘ تے ’’عادی ہڑتالی‘‘ ورگے الفاظ موٹے حرفاں وچ لکھے گئے تے جدوں ایہ مرحلہ آیا تے اوہناں نے گزارے لئی وکیلاں نوں قنون دیاں کتاباں ویچنیاں شروع کر دتیاں۔ 33 ورھے لنگھ گئے‘ ایہو نس بھج سائیں اختر دا ذریعہ روزگار رہیا۔ ایہناں دا بچپن بڑا اداس تے اکلّے گزریا۔
شعروشاعری دا آغاز سائیں اختر نے سکول دے زمانے وچ کیتا پر ایس فن نوں جلا استاد دامن دی شاگردی وچ آن دے بعد ملی۔ اوہناں دی استاد دامن نال رفاقت تقریباً 35 ورھے رہی۔ قیام پاکستان دے بعد فسادیاں نے استاد دامن نوں کانگریس دا شاعر قرار دے کے بھگوان پورہ بستی وچ اوہناں دی دکان تے لائبریری ساڑی تے اوہ ٹیکسالی وچ واقع شاہ حسین دے حجرے وچ رہن لگ پئے۔ سائیں اختر دی اکلوتی شاعری دی کتاب ’’اللہ میاں تھلے آ‘‘ 1999ء وچ چھپی۔ 38 ورھے دی عم روچ دولہا بنن والے سائیں اختر تن بچیاں تے پُتر خضرعباس دے والد سن۔ ویاہ دے بعد لہور وچ گزر مشکل ہوئی تے سائیں فیملی سنے رانا ٹائون ٹر گئے۔ ہور توفیق ملی تے کالاخطائی روڈ تے واقع آبادی برکت ٹائون وچ پنج مرلے دا مکان خرید لیا۔ اوتھے ای رہندے سن۔٭