اک شہر قدیم دا ناں خطرے وچ اے

خالد مسعود خان

انج تے ایس ملک وچ ساریاں نوں اپنی اپنی پئی ہوئی اے پر دھن حوصلہ تے جگرا اے میرے عزیز دوست تے پیارے شہردار ایم این اے ملک عامر ڈوگر دا کہ جدوں یکم اپریل نوں پاکستان دے سارے ارکان اسمبلی نوں اپنے سیاسی مستقبل دے لالے پئے ہوئے سن ساڈے دلیر ایم این اے نوں ایس پریشان کن صورتحال وچ وی دھڑا دھڑ افتتاحی تختیاں دی تنصیب تے سنگ بنیاد رکھن دی جلدی پئی ہوئی سی۔ اک پاسے اسلام آباد وچ ایہناں دی حکومت دا مستقبل تے داء تے لگا ہویا سی تے ساری قوم عدم اعتماد دے ناں تے ہون والے جمہوری تماشے وچ مصروف سی دوجے پاسے موصوف نے لگے ہتھیں چار پنج منصوبیاں دے فیتے کٹ کے تے تختیاں دی نقاب کشائی کر کے شہر وچ پہلے توں لگیاں ہوئیاں اپنیاں ان گنت تختیاں وچ ہور وادھا فرما دتا۔
مزے دی گل ایہ وے کہ اجہی ہر تختی تے‘ جہدا گھونگھٹ موصوف نے چکیا اے‘ اوہناں دے برادر خورد عدنان ڈوگر دا ناں لازماً لکھیا ہوندا اے۔ اوہناں دے حلقے دی ہر گلی‘ ہر نالی‘ ہر سڑک‘ ہر پارک تے ہر گٹر حقیقی معنیاں وچ ڈوگروڈوگری ہویا پیا اے۔ ایہناں تختیاں نوں ویکھ کے اندازا ہوندا اے کہ ایس ست ہزار سال قدیم شہر نوں محمد بن اقسم‘ سکھاں تے فیر انگریزاں دے بعد صرف ڈوگراں نے فتح کیتا اے تے ایس شہر دا سارا ترقیاتی کم ایس خاندان نے جیویں اپنے پلیوں کیتا اے۔ ایس حلقے تے لوکاں دے ٹیکس دے پیسیاں نال بنن والے ہر منصوبے تے ڈوگر خاندان دے ناں دی تختی جگمگا رہی اے۔ چلو ملک عامر ڈوگر دی حد تک تے ایہ گل کجھ برداشت کیتی جا سکدی اے کہ موصوف پی ٹی آئی دے ایم این اے نیں تے ایس حوالے نال اجے تشہیر دے حوالے نال اعلیٰ ترین درجے تے فائز ہون دا حق وی رکھدے نیں پر ایہ گل اجے تک میرے ورگے عاجز دی سمجھ وچ نہیں آئی کہ شہر دے ایس حلقے وچ ڈوگر ڈویلپمنٹ اتھارٹی ولوں لائی گئی ہر تختی تے ملک عدنان ڈوگر دا ناں کس خوشی وچ شامل ہوندا ے؟ ایہ شاید ساڈے جمہوری سیاست دے گراس روٹ لیول تک جان دا پھل اے کہ ایم این اے دا چھوٹا بھائی وی پبلک فنڈز نال بنن والے ہر منصوبے تے لگن والی تختی وچ شامل باجہ اے تے لگدا اے کہ ایہ سارا پیسہ ساڈے ٹیکساں نال نہیں سگوں ڈوگر فیملی نے ذاتی اکائونٹ چوں خرچیا اے۔ چلو ایہناں افتتاحی تے سنگ بنیاد والیاں تختیاں دی حد تک تے فیر وی برداشت کیتا جا سکدا اے پر صورتحال ایہ وے کہ پورے حلقے وچ ہر نویں منصوبے دا ناں ایس خاندان دے بندیاں دے ناں تے رکھنا لازمی قرار پا چکیا اے۔
مینوں یاد اے کہ ایس سلسلے وچ ملک دی اعلیٰ عدلیہ نے اک فیصلہ وی دتا سی جہدے تحت پبلک فنڈز نال تعمیر ہون والے منصوبیاں دا ناں عوامی نمائندے اپنے یاں اپنے رشتے داراں دے ناں تے نہیں رکھ سکدے پر ایس فیصلے تے کدھرے وی عمل نہیں ہو رہیا۔ پورے پاکستان وچ ایہو چلدا اے تے جتھے جائو اوتھے ہر گلی‘ ہر سڑک‘ ہر پارک تے ہر نالی دی تعمیر تے اوس علاقے دے ایم این اے تے ایم پی اے دے ناں دی تختی لگی ہوندی اے پر ملتان وچ تے حد ای ہو گئی اے۔ ادھے شہر تے مشتمل ایس حلقہ این اے 155 دی ہر گلی دی نکڑ تے ایسے اک خاندان دے ناں دی تختی ’’لشکاں‘‘ مار رہی اے تے اوہدے تے ایم این اے دے بھائی دے ناں دا دم چھلا وی لگا ہویا اے۔
یکم اپریل نوں جدوں دنیا بھر وچ لوک دوجیاں نوں احمق تے بے وقوف بنان لئی اپریل فول بنان وچ مصروف سن میرے ایس پیارے ایم این اے دوست نوں ملک وچ لگے سیاسی اپریل فول میلے وچ فارغ بیٹھن دی تھاں افتتاحواں دی سوجھی ایس لئی اوہناں نے اسلام آباد تو ںملتان دوڑ لائی تے ایتھے اپڑ کے اک ٹھیکیدار‘ دو تن مزدور‘ اٹھ دس چمچے‘ تن بوریاں سیمنٹ‘ دو ریڑھیاں ریت تے چار پتھر دیاں تختیاں پھڑیاں تے چل پئے منصوبیاں دا آپے ای افتتاح کرنے‘ شاید اوہناں نوں ایس لئی جلدی سی کہ جے اسمبلیاں ٹٹ گئیاں تے ایہناں لاوارث منصوبیاں دا افتتاح کون کرے گا ایس لئی بڑی سمجھداری دا ثبوت دیندے ہوئے تن اپریل توں تن دیہاڑ پہلاں ای سویرے سویرے اوہناں نے ریڈیو پاکستان ملتان تے ہلا بول دتا‘ اک عدد آڈیٹوریم دا افتتاح تے اک عدد لفٹ دی تنصیب دے سنگ بنیاد دا مرحلہ طے کیتا۔ دنیا بھر وچ ریڈیو سٹیشن وڈیاں وڈیاں عمارتاں توں دو دو کمریاں وچ منتقل ہو رہے نیں تے وڈیاں وڈیاں عمارتاں ریڈیو سٹیشن لئی غیرضروری ہوندیاں جا رہیاں نیں اجہے وچ کروڑاں روپیے دی ملکیت نال اک آڈیٹوریم دی تعمیر سوائے پیسے دے ضائع تے قومی دولت نوں برباد کرن دے ہور کجھ نہیں۔ ملتان شہر دے مہنگے ترین علاقے وچ چار ایکڑ توں ودھ زمین تے چار منزلہ ایہ عمارت پہلے ای لوڑ توں ودھ اے تے ایہدا کافی حصہ سکھنا پیا اے۔ ایس عمارت دی چوتھی منزل تے کدی پی ٹی وی دے دفتر ہوندے سن جو ہن پی ٹی وی دی اپنی عمارت بن جان دے بعد سکھنے پئے نیں۔ تریجی منزل تے اکادمی ادبیات پاکستان دا ریجنل آفس تے پی آئی ڈی دا دفتر اے تے ریڈیو پاکستان ایہناں دوہاں اداریاں توں دفتراں دا کرایہ وصول کردا اے۔ ریڈیو پاکستان ملتان نوں بنے 52 ورھے ہو چکے نیں تے اج تک دو سو بندیاں تے مشتمل کوئی تقریب نہیں ہوئی پر ہن اچانک ایتھے دو سو بندیاں دا آڈیٹوریم بننا شروع ہو گیا اے۔ ایہدی لاگت تن کروڑ روپیے اے تے ایہ میرے دوست ایم این اے دے والد ملک صلاح الدین ڈوگر دے ناں اے۔ لفٹ تے لگن والے ڈیڑھ کروڑ روپیے دا جرمانہ ایس توں وکھرا اے۔ اللہ خیر ای کرے کدھرے جاندے جاندے موصوف ایس ہزار سال قدیم شہر دا ناں ای اپنے کسے مرحوم عزیز دے ناں تے نہ رکھ دین۔٭