مفت مشورے

امرجلیل

مفت مشورہ دینا میری عادت اے۔ میرے والدین‘ میرے استاداں نے‘ اڑوس پڑوس دے سیانیاں نے مینوں دوجیاں نوں خواہ مخواہ مشورے دین توں باز رکھن لئی بڑے جتن کیتے پر سب نکام رہے۔ میں مشورے دین توں باز نہیں آیا۔ میں یقین نال کہہ سکنا واں کہ مردے دم تک میں مشورے دین دی عادت نہیں چھڈاں گا۔ مرن دے بعد وی مشورے دین دی عادت توں باز نہیں آواں گا جے تسیں صاحب ثروت او تے تہاڈا اٹھنا بیٹھنا‘ سونا جاگنا‘ کھانا پینا‘ اوڑھنا بچھونا‘ مرنا جینا ایئرکنڈیشن ماحول وچ اے تے تسیں ایہدے عادی ہو چکے او تے فیر میرا مفت مشورہ اے کہ تسیں اپنی آخری آرام گاہ لئی چنگی تھاں دا نتخاب کر لوو۔ پسندیدہ تھاں تے اپنی آخری آرام گاہ لئی دو گز زمین خرید لوو۔ کراچی دے چنگے علاقیاں وچ آخری آرام گاہ لئی دو گز زمین دی قیمت دس لکھ توں ودھ گئی اے۔ میرا مشورہ اے کہ تسیں فوراً توں پہلاں کسے اعلیٰ مقام تے اپنی آخری آرام گاہ لئی دو گز زمین خرید لوو۔ اک اندازے موجب آن والے ویلیاں وچ دو گز زمین دی قیمت دس لکھ توں ودھ کے اک کروڑ روپیے ہو جاوے گی۔ دو گز زمین خریدن دے بعد تسیں کسے ماہر تعمیرات نال جدید طرز دی آخری آرام گاہ بنوان لئی گل بات کر لوو۔ تہاڈی آخری آرام گاہ مکمل طور تے ایئرکنڈیشنڈ ہونی چاہیدی اے۔ جے تسیں واقعی ٹاٹا تے برلا دی ٹکر دے صاحب ثروت او تے فیر میرا مشورہ اے کہ تسیں اپنی آخری آرام گاہ تے سنگ مر مر دا مقبرہ بنوا لوو۔
اک پتے دی گل دس دیواں میں تہانوں ‘مرن دے بعد تسیں اپنا مقبرہ نہیں ویکھ سکدے ایس لئی زندہ ہوندے ہوئے تسیں اپنا مقبرہ بنوا لوو۔ اپنا مقبرہ ویکھدے رہوتے خوش رہو۔ اک صاحب نے سڑ بھج کے کہیا سی تسیں ساریاں نوں مشورے دیندے پھردے او‘ کدی تسیں آپ وی ایہناں مشوریاں تے عمل کر کے ویکھیا اے؟ سوال پچھن والے نوں میں سر توں پیراں تک ویکھدے ہوئے کہیا میری گل غور نال سن سیانے! میں تہانوں مفت وچ مشورے دینا واں‘ مشوریاں تے عمل کرنا تہاڈا کم اے‘ میرا نہیں‘ گل سمجھ وچ آ گئی یاں سروں لنگھ گئی؟ بہت پہلے دی گل اے۔ کراچی دے دلفریب علاقے وچ صدر وچ سیلنڈر نما ٹیلی فون بوتھ لائے گئے سن۔ واہوا کھلے کھلے ہوندے سن‘ دو لوک ٹیلی فون بوتھ وچ وڑ کے کئی کئی گھنٹے گلاں کردے رہندے سن۔ میں لوکاں نوں مشورہ دتا کہ بھائی ٹیلی فون بوتھ بڑے کھلے نیں ایہناں وچ وڑ کے گھنٹوں گلاں کرن توں علاوہ ٹیلی فون بوتھاں دے کارآمد استعمال بارے سوچو تے عمل کرکے وکھائو۔ لوکاں نوں میرا مشورہ چنگا لگا‘ لوکاں نے ٹیلی فون بوتھاں وچ کوڑا کرکٹ سٹنا شروع کر دتا۔ صدر وچ صاف ستھرے بیت الخلاء ہوندے سن لوک میرے مشوریاں تے عمل کردے ہوئے صدر دے ٹیلی فون بوتھاں نوں بیت الخلاء دے طور تے استعمال کرن لگے تے فیر جدوں ٹیلی فون بوتھاں چوں لاشاں برآمد ہون لگ گیاں‘ اودوں میں ٹیلی فون بوتھاں بارے لوکاں نوں مشورے دینا چھڈ دتا۔ تسیں میرے توں پچھ سکدے او کہ کیہ میں آپ وی ٹیلی فون بوتھ‘ بیت الخلاء دے طور تے استعمال کردا سی۔ میں کئی واری عرض کر چکیا واں کہ میرا کم اے تہانوں مشورہ دینا‘ مشوریاں تے عمل کرنا تہاڈا کم اے میرا نہیں۔ جدوں صدر وچ ٹیلی فون لگے سن اودوں ڈالر ڈیڑھ روپیے دے برابر ہوندا سی اک روپیے وچ سولاں آنے ہوندے سن‘ تسیں اک آنے دے دو سکے ٹیلی فون بکس وچ پا کے لگاتار گل کر سکدے سی۔ میرے کول بکس وچ جمع پونجی کڈھن دا گُر سی۔ صبح سویرے محکمہ ٹیلی فون دے لوک ٹیلی فون بوتھاں دے بکس چوں پچھل یدن دی جمع پونجی کڈھن آندے سن میں ہر رات دیر گئے‘ ٹیلی فون بوتھ دے بکساں چوں پونجی کڈھ لیندا سی۔ سویرے جدوں محکمہ ٹیلی فون دے لوک پچھلے دن دی جمع پونجی کڈھن آندے سن اودوں اوہناں دے پلے اک دمڑی وی نہیں سی پیندی۔ آخر کار سرکار نوں جدید ٹیلی فون بوتھ لگوا کے کراچی دی شان و شوکت ودھان دے ارادے توں دستبردار ہونا پیا۔
اک پتے دا مشورہ دینا واں میں تہانوں‘ تسیں زندگی بھر فقیر نوں یاد رکھو گے۔ تسیں کدی خاطر وچ مت لیانا کہ کیہ کہیا گیا اے۔ تسیں بس ایناں ویکھیا کرو کہ جو کجھ تسیں سنیا اے‘ پڑھیا اے‘ اوہ کنہے کہیا اے۔ یاد رکھو کہ سنی ہوئی گل اہم نہیں ہوندی۔ اہم ہوندی اے گل کہن والے دی شخصیت‘ ناں تے شان‘ کسے ایرے غیرے نتھو خیرے دے منہ چوں کدی تسیں وڈی گل نہیں سنو گے۔ وڈی گل‘ وڈے لوکاں دے منہ چوں نکلدی اے۔ ایس قسم دے مشورے دے تے دینا واں پر کدی کدائیں مینوں آپ ایہناں مشوریاں دا خمیازہ بھگتنا پیندا اے۔ میرے دتے ہوئے مشورے تے غور کرن دی تھاں لوک مینوں ویکھ کے میرے دتے ہوئے مشورے نوں کجھ نہیں سمجھدے۔ لوک میرے ماضی تے حال توں چنگی طرح واقف نیں۔ اوہ جان دے نیں کہ گینز بک آف ورلڈ ریکارڈز وچ شامل دنیا بھر دے بدنام جھوٹیاں دی فہرست وچ میرا ناں سرفہرست اے پر میرا اک مشورہ لوکاں نوں بڑا چنگا لگا اے کہ کہی ہوئی گل نوں اہمیت نہ دیو‘ اہمیت دیو گل کہن والے دی نیک نامی‘ ساکھ نوں‘ میرے ایس مشورے تے لوکاں نے صدق دل نال یقین کر لیا اے۔ میرے گھنائونے ماضی تے حال نوں سامنے رکھدے ہوئے اوہ میرے کسے مشورے نوں اہمیت نہیں دیندے۔ ہیراپھیری میری فطرت وچ شامل اے۔ میں اوہناں نوں جدوں سقراط تے افلاطون دا کوی مقولہ اپنے ولوں سنانا واں اودوں اوہ فوراً سقراط تے افلاطون دا مقولہ اک کن توں سن کے دوجے کن چوں کڈھ دیندے نیں۔٭٭