آزادی دے 75ورھے‘ اک مکالمہ

اسد اللہ غالب

اسلامیہ یونیورسٹی بہاولپور وچ ہون والے لٹریری اینڈ کلچرل فیسٹیول دی چارروزہ تقریباں اختتام پذیر ہو گئیاں۔ وائس چانسلر اسلامیہ یونیورسٹی بہاولپور انجینئر پروفیسر ڈاکٹر اطہر محبوب نے آکھیا کہ لٹریری اینڈ کلچرل فیسٹیول وچ رلت لئی ملک دے طول و ارض توں آن والی نامور شخصیات دی بہاولپور وچ موجودگی تے ثقافتی تے ادبی سرگرمیاں دا انعقاد طلبا و طالبات دی ذہنی صلاحیتاں وچ اہم کردار ادا کرے گا۔ اوہناں نے لٹریری فیسٹیول دے انعقاد وچ شامل سارے ٹیم ممبراں دی انتھک محنت تے لگن نوں شاندار لفظاں وچ سراہیا۔ آخری دن شام مزاح منعقد ہوئی جہدے وچ نامور شاعر گل نوخیز اختر‘ خالد مسعود خان‘ سید سلمان گیلانی‘ طاہر شہیر‘ زاہد فخری‘ ڈاکٹر عمران بشیر نے رلت کیتی۔ قوالی دی محفل وچ مشہور قوال شیر میانداد نے سماں بنھ دتا۔ کلچرل فیسٹیول وچ ہون والے نیشنل میڈیا کنکلیو وچ آزادی دے 75 ورھے تے مرکز یقین دے موضوع اتے خصوصی مذاکرہ منعقد ہویا۔ ایس موقعے تے ناول نگار آمنہ مفتی‘محقق تے شاعر ڈاکٹر عقیل عباس جعفری‘پاکستان ہاکی ٹیم دے کپتان عمر بھٹہ‘ کرکٹر عابد علی‘ سٹیشن ڈائریکٹر ریڈیو پاکستان لہور نزاکت شکیلہ‘ سینئر کالمنسٹ تے تجزیہ نگار‘ ادیب نذیر لغاری‘ موٹی ویشنل سپیکرڈاکٹر جاوید اقبال‘ گلوکارہ راحت ملتانیکر نے رلت کیتی تے میزبانی دے فرائض کنٹرولر نیوز پنجاب سجاد پرویز نے سرانجام دتے۔ میڈیا کنکلیو وچ اظہار خیال کردے ہوئے نذیر لغاری نے آکھیا کہ پنجاب پاکستان دا مرکزی خطہ اے جہڑا ہزاراں سال پرانی تہذیب دا گہوارہ اے جہڑا پاکستان دی ساری تہذیباں نوں آپس وچ جوڑدا اے۔ آمنہ مفتی نے آکھیا کہ سوشل میڈیا دا مثبت پہلو ایہہ اے کہ تعلیم و تحقیق وچ موجودہ نسل نوں وسیع پیمانے اتے معلوماتی رسائی فراہم کر رہیا اے۔ عقیل عباس جعفری نے آکھیا کہ ایس ویلے سرکاری تے نجی سطح اتے خیال وسعت دی بحالی لئی ٹھوس قوت دی لوڑ اے۔ سٹیشن ڈائریکٹر ریڈیو پاکستان لہور نزاکت شکیلہ نے آکھیا کہ ریڈیو پاکستان کشمیر وچ جاری ظلم و ستم تے انسانی حقوق دی خلاف ورزی نوں ملکی تے عالمی سطح اتے اجاگر کرن وچ پیش پیش اے۔ قومی ہاکی ٹیم دے کیپٹن عمر بھٹہ نے آکھیا کہ ہاکی ساڈا قومی کھیڈ اے تے چھیتی ای اسیں عالمی سطح اتے ہاکی دے میدان وچ اپنی حیثیت بحال کرا لواں گے۔ کرکٹر عابد علی نے آکھیا کہ پاکستان وچ عالمی کرکٹ دی بحالی خوش آئنداے۔ اوہناں نے آکھیا کہ پاکستان سپورٹ لیگ دے ذریعے قصبیاں تے شہراں دے کھیڈاریاں نوں اپنی کارکردگی پیش کرن دا موقع ملیا اے۔ ماہر تعلیم تے آرٹس راحت ملتانیکر نے آکھیا کہ ثقافتی تے ادبی میلے علاقائی آرٹ تے کلچر دے فروغ وچ نمایاں کردار ادا کردے نیں۔ ایس توں پہلاں شہزاداحمد خالد ڈائریکٹر پریس میڈیا اینڈ پبلی کیشنز نے نیشنل میڈیا کنکلیو دی اہمیت نوں اجاگر کردے ہوئے آکھیا کہ لٹریری اینڈ کلچرل فیسٹیول وچ ایس مباحثے دے انعقاد توں حاضرین نوں اہم موضوعات اتے قومی شخصیات دے خیالات جانن دا موقع ملیا اے۔
اسلامیہ یونیورسٹی بہاولپور وچ دوجے سالانہ ادبی تے ثقافتی میلے دے افتتاحی سیشن دی صدارت وائس چانسلر پروفیسر ڈاکٹر اطہر محبوب نے کیتی تے خطبہ استقبالیہ پیش کیتا۔ اپنے خطاب وچ پروفیسر ڈاکٹر اطہر محبوب نے آکھیا کہ اسلامیہ یونیورسٹی بہاولپور ادبی تے علمی سرگرمیاں دا مرکز بن چکی اے تے یونیورسٹی وچ روزانہ دی بنیاد تے قومی تے علمی سیمینار کانفرنساں تے ورکشاپاں منعقد ہوندیاں نیں جنہاں وچ دنیا بھر دے دوجے ملکاں توں آئی ہوئی نامور شخصیا ت دی رلت ہوندی اے۔ اسلامیہ یونیورسٹی بہاولپور نے پچھلے 3ورھیاں وچ غیر معمولی ترقی کیتی جنہاں وچ شعبہ جات دی تعداد ودھ کے 132 ہو گئی اے تے طلبا و طالبات دی تعداد ودھ کے 60,000ہو گئی اے تے اسلامیہ یونیورسٹی بہاولپور پنجاب دے علاوہ دوجے صوبیاں توں آئے ہوئے طلبا و طالبات دی وی ترجیح بن چکیا اے تے سینکڑاں دی تعداد وچ دوجے صوبیاں توں آئے ہوئے طلبا زیر تعلیم نیں۔ ایس موقعے تے نامور آرٹسٹ توقیر ناصر‘ عارفہ زہرا تے عذرہ آفتاب نے اچیچی گل بات کیتی۔توقیر ناصر نے آکھیا کہ اوہ اسلامیہ یونیورسٹی بہاولپور آ کے ایتھے دی تعلیمی ترقی تے جدیدیت ویکھ کے بہت زیادہ متاثر ہوئے نیں۔ اوہناں نے آکھیا کہ اسلامیہ یونیورسٹی بہاولپور تعلیم دے میدان وچ نویں کمالات سرانجام دے رہی اے تے ایہہ اوہناں لئی خوشگوار حیرت دا کارن بنیا اے۔ محترمہ عذرہ آفتاب نے نوجواناں نوں آکھیا کہ اوہناں دے کول ویلا اے اپنی توانائیاں نوں مثبت سرگرمیاں وچ استعمال کردے ہوئے نہ صرف اپنی کامیابی بلکہ ملک و ملت دی کامیابی داکارن بنن۔ سیدہ عارفہ زہرہ نے آکھیا کہ نویں علمی تے فنون حاصل کرنا نوجوانوں دی پہلی ترجیح ہونا چاہیدا اے تے اوہ ہر ویلے معلومات وچ اضافہ دے جستجو وچ لگے رہن تے حصول علم نوں اپنا شعار بنان۔ روبرو دے سلسلہ وچ سید تابش الوری‘ سید علی معین تے سیدہ عارفہ زہرہ نے بالترتیب اطہر لاشاری‘ ذیشان تبسم تے اویس ربانی نال گل بات کیتی۔ پہلے دن قرات تے نعت دے عالمی مقابلہ وچ پوزیشن حاصل کرن والے طلبا و طالبات نے قرات تے نعت پیش کیتی تے پوزیشن ہولڈراں وچ شیلڈز تقسیم کیتی گئیاں۔ ایہہ چار روزہ ادبی میلہ جمعہ تک جاری رہیا جہدے وچ نامور شخصیات شریک ہوئیاں۔ دن دے دوجے حصے وچ لوک موسیقی سازاتے مشتمل پرفارمنسز کیتیاں گئیاں جہدے وچ نامور سرائیکی ہوسٹ عارف ملغانی تے راحت ملتانیکر نے خصوصی گل بات کیتی۔ ادبی تے ثقافتی سرگرمیاں دا آغاز عباسیہ کیمپس وچ کیتا گیا سی جہدے وچ فرحت عباس شاہ دے نال اک خصوصی شام منعقد کیتی گئی تے اوہناںدی کتاب ’’مزاحمت کریں گے ہم‘‘ دی تقریب رونمائی منعقد ہوئی جد کہ اگلے سیشن وچ اٹھ کتاباں دی تقریب رونمائی منعقد ہوئی۔ افتتاحی تقریب وچ پروفیسر ڈاکٹر شاہد حسن رضوی دی کتاب بے مثل ریاست دا شہر بے مثال‘ پروفیسر ڈاکٹر آفتاب حسین گیلانی خطہ بہاولپور دامختصر جغرافیائی‘ تریخی انتظامی تے ثقافتی جائزہ ڈاکٹر عصمت دران دریائے آمو دے کنارے نصیر احمد ناصر صحرانوورد‘ ڈاکٹر حسن صہیب مراد علم عمل تے زندگی‘ ریاض الحق بھٹی کالم کہانی‘ ظفر اقبال سندھو کلاس روم تے پروفیسر ڈاکٹر شفیق احمد دی کتاب گلدستہ شامل نیں۔بہاولپور جئے علاقے وچ ایہہ تقریباں بہار دا جانفزا تے خوشگوار جھونکا نیں۔