توں بسم اللہ پڑھ کے مینوں نانک دا پرشاد پھڑامیں نانک دی بانی پڑھ کے دیاں حسینی لنگر نوں
احمد اقبال بزمی
10 اپریل 2022 نوں انڈین پنجاب توں ساہت سبھا، جیرے آلا تے ہور دوجیاں ستھاں دے ممبران، پاکستانی پنجاب دی ستھ سانجھا ویہڑا پنجاب تے پنجابی سنگت پاکستان دی چھتر چھاویں اک مِلنی واسطے کرتار پور کوریڈور وچ اکٹھیاں ہوئیاں۔ ساڈے اچیچے پروہنیاں وچ جناب ڈاکٹر گرچرن نور پور جی، اشوک آرزو جی، پنجابی دے مہان شاعر دانشور بابانجمی جی، احسان باجوہ جی، نذیر جوئیہ جی، یوسف پنجابی جی تے مدثر اقبال بٹ جی شامل سن۔ پاکستانی پنجاب ولوں نذیر جوئیہ جی تے یوسف پنجابی جی دی آگوائی وچ انڈین پنجاب دے دوستاں نال اک سوہنی مِلنی کرن یار پیاریاں دا قافلہ کرتار پور کوریڈور ، نارووال پہنچیا۔ ساڈے چڑھدے پنجاب دے سجن بڑے ٹائم نال کرتار پور پہنچ کے ساڈے لہندے پنجاب دے سجناں دا بڑی شدت نال انتظار کر رہیے سن۔ اسیں ہالے کرتار پور راہدری وچ وڑے ای آں تے ڈاکٹر گرچرن نور پور جی تے اشوک آرزو جی نے اپنی پوری سنگت نال سانوں گھیرا گھت لیا۔ ساڈا بڑے ریجھ، چا نال استقبال کیتا، ساریاں سجناں نوں پھلاں دے ہار پوائے۔ انج لگیا جیویں وِچھڑے بھرا آپس وچ مِل رہے ہوون۔ کوئی وِتھ نہیں لگ رہی سی نا ہی کوئی اوپرا پن۔
مِلنی بعد اسیں سوچیا کہ سجناں نال بیٹھیا کِتھے جاوئے۔ اوہ تے بھلا ہووئے نذیر جوئیہ جی تے علی حیدر علوی جی دا جہناں بھانے سانوں وچار وٹاندرا استھان لبھ گیا۔ سب سجناں اک رل گپ شپ دی بیٹھک شروع کر لئی۔ ایس دوران اشوک آرزو جی، نذیر جوئیہ جی نوں آکھن لگے کہ یار آپاں اینے شاعر، کوئی، دانشور تے گیت کار اکٹھے ہاں کیوں نا اک سانجھا مشاعرہ ہی کر لوئیے۔ لو جی شاعر اکٹھے ہوون تے مشاعرہ نہ ہووئے ایہہ کِنج ہو سکدا اے۔
سب نے یک زبان حق اے دا نعرہ بلند کیتا۔ ایس مشاعرہ دی نظامت من فقیر( احمد اقبال بزمی) دے حصے وچ آئی جہیڑی کہ اشوک آرزو جی تے نذیر جوئیہ
جی دی محبت دا صدق اے۔ ایس مشاعرے دی پردھانگی ساڈے دونہاں پنجاباں دے مہان شاعر تے ساڈے سجن جناب بابا نجمی جی ہوراں کیتی تے اچیچے پروہنیاں وچ ڈاکٹر گرچرن نور پور جی،اشوک آرزو جی، احسان باجوہ جی، مدثر اقبال بٹ جی تے یوسف پنجابی جی سن۔ ایس پروگرام دا مڈھ ساڈے سوہنے یار صفدر ماہی ہوراں مرزا صاحباں گا کے بنھیا۔ کلاسیکل گائیکی دے انگ دا نظارہ ربابی گھرانے دے بھائی لال امرتسری ہوراں دے پوترے کلاسیکل گائیک مسلم شگن ہوراں پیش کیتا۔ گل بات دوران مدثر اقبال بٹ جی ہوراں آکھیا کہ اسیں بہت جلد ایتھے کرتار پور پنج سو بندیاں دی اک کانفرنس کرن جا رہے تے ساڈی خاہش ہوئے گی کہ چار سو بندے چڑھدے پنجاب ولوں ہوون۔ مشاعرے وچ رلت کرن والے لہندے تے چڑھدے پنجاب دے شاعراں جہناں اپنے شعراں راہیں سب دے دل موہ لے اوہناں دے ناں کجھ اِنج نیں۔بابانجمی جی،بابا احسان باجوہ جی،ڈاکڑ گرچرن نور پور جی،اشوک آرزو جی، بِٹو لہری جی،ترسیم چولہ جی،سردار مختیار سنہیر،بابا وارث بے دھیانا جی،حمید ناصری جی،یوسف پنجابی جی،نذیر جوئیہ جی،علی حیدر علوی جی،سجاد بخاری جی،پرتاپ ہیرا جی،سردار مختار سنگھ بررڑر جی،سردار دلجیت سنگھ نور پور جی،شفقت حسین جی تے افضل پٹواری جی ۔
مشاعرے دے اخیر وچ انڈیا توں آئی پوری سنگت نے ڈاکڑ گرچرن نور پوری تے اشوک آرزو جی دی آگواہی ہیٹھ پاکستانی پنجاب دے سب سجناں نوں بہت سوہنیاں ریشمی چادراں مان ستکار لئی پیش کیتاں تے خاص طور تے بابا نجمی جی نوں انڈین صافہ نال پگ وی دان کیتی نالے ساڈی ماں جی دا سوٹ وی بابا جی دے قدمی دھریا۔ ساڈے پاکستانی پنجاب دے مزید سجناں وچ راجہ ریاض جی، امانت گجر جی، ڈاکڑ شمائلہ اعظم جی، امانت گجر جی، محمد یعقوب جی، محمد امین جی، ایوب کیلاش جی، راول مراد جی تے ہمایوں پیارا جی تے انڈین پنجاب توں وی ہور مزید پیارے سجن وچ شامل سن۔ یقین کرو اِیناں سوہنا تے اِیناں بھرواں اکٹھ سی کہ اوس وچ بابا فرید توں لے کے بابا نجمی تیک سب بابیاں دا انگ رنگ ڈھنگ جھلک رہیا سی۔ وِچھڑن والے سب اک دوجے نوں مڑ مڑ جپھیاں پا رہے سن تے وچھڑن نوں کسے دا وی من نہیں کر رہیا سی پر کیہ کرئیے باڈراں دیاں مجبوریاں۔ لیکن جاون ویلے اِنج لگ رہیا سی کہ دونہاں پاسے دے سجناں اپنے دل اک دوجے نال جیویں وٹا لئے ہوون۔ ہن انج سی کہ ساڈے وچ اوہناں دا دل دھڑک رہیا سی تے اوہناں وچ ساڈا۔ مینوں حمید ناصری جی دی بولی رہ رہ کے یاد آ رہی سی کہ۔
ماہی وسیا اے من وچ میرے میں تے ہن میں نا رہی
