شکاگو توں آئے سِکھاں دے وفد دا دورہ پاکستان

رلتیاں منگ کیتی کہ بابا گرونانک دا جنم دیہاڑ نانک شاہی کیلنڈر دے مطابق 14اپریل یکم وساکھ نوں منایا جاوے

مرزا عثمان بیگ

بابا گرونانک دا جنم دیہاڑ نانک شاہی کیلنڈر دے مطابق 14اپریل یکم وساکھ نوں منایا جاوے،تریخی حوالہ جات دے مطابق بابا گرونانک دی پیدائش دی اصل تریخ پہلی وساکھ 14اپریل اے،دنیا بھر دے محققین اصل نانک شاہی کیلنڈر نوں تسلیم کر رہے نیں۔
ایہناں خیالات دا اظہار کردے ہوئے شکاگو توں آئے سکھاں دے اک وفد دے سربراہ سردار امردیوسنگھ بندیشا تے سیکرٹری سکھ مذہبی امور محترمہ جسویرکور نے کیتا۔ اوہناں دا آکھنا سی سکھ مذہب دی تریخ دے مطابق بابا گرونانک جی دا اصل جنم دیہاڑ 14اپریل پہلی وساکھ 1469 اے جہنوں بکرمی کیلنڈر دے مطابق کتک پورن ماشی دے مطابق منایا جاندا اے جہڑی کہ غلط تریخ اے۔ سکھ ماہراں نے تحقیق کر کے ایس حوالے نال واضح کیتا اے کہ اصل تریخ پہلی وساکھ 14اپریل اے تے اسیں سارے ایسے تریخ دے مطابق گرونانک دا جنم دیہاڑ منان لئی پاکستان آئے آں۔
سردار پال سنگھ پوریوال نے مول نانک شاہی کیلنڈر ترتیب دتا اے۔ جہدے وچ اوہناں نے پنجابی مہینیاں دے حساب نال بارہ مہینیاں دے خاص تہواراں دی تریخاں نوں مستند حوالہ جات دے نال مرتب کیتا اے جہنوں دنیا بھر دی سکھ مذہبی تے سیاسی تنظیماں تسلیم کر چکیاں نیں۔حکومت پاکستان ولوں اوہناں دی ایس خدمات دے بدلے ہجری کیلنڈر لائف ٹائم ایوارڈ نال نوازیا گیا۔ اوہناں دی خدمات دے بدلے دیال سنگھ کالج لہور دی لائبریری وچ پال سنگھ پورے وال کارنر وی اوہناں دے ناں نال منسوب کیتا گیا اے۔
امریکہ توں آئے سکھ ریلجس سوسائٹی دے ممبراں دا آکھنا سی کہ اسیں نانک شاہی کیلنڈر دے مطابق اصل تریخ دے مطابق بابا گرونانک جی دا جنم دیہاڑ منان آئے آں۔ ایس وفد وچ شامل ڈاکٹر اندرویر سنگھ گل ، رفی گریووال ٹورنٹو ، ترلوچن سنگھ لچھر ، ڈاکٹر کمنیو کور ، سردار جیت سنگھ ، کرمجیت کور ،محترمہ پرمندر کور ، شامل نہیں۔ایس وفد دا آکھنا سی کہ سانوں پاکستان وچ بہت ساری محبت ملی جہدا سوچیا نہیں سی۔ پاکستان وچ ساڈی تریخ دے آثار بہت زیادہ نیں جنہاں نوں اک واری ویکھنا ممکن نہیں اے۔ پاکستان دی مہمان نوازی ہمیشہ یاد رہوے گی۔ گرونانک جی دے پیغام انسانیت دے ذریعے سارے انساناں نوں جوڑیا جا سکدا اے۔