پنجابی فلم انڈسٹری دے منے پرمنے اداکارشوندر ماہل نوں لائف ٹائم اچیومنٹ ایوارڈ مل گیا

ایہہ پُرسکار اوہناں فلم انڈسٹری لئی خدمات دے اعتراف وچ اک شاندار تقریب اندر دِتا گیا

علی حسنین مسعود

شوندر ماہل پنجابی فلم انڈسٹری دے منے پرمنے اداکار نیں۔اوہناں نوں بچپن وچ فلماں دیکھن دا شوق سی تے ایہی شوق اوہناں نوں اداکاری وَل لے گیا۔شوندر ماہل بارے ایہہ گل بڑی مشہور ہے کہ اوہ انٹرویوز وچ ہمیشہ سچیاں گل کردے نیں تے دل بہت صاف تے بھلے انسان نیں ۔جس دے تعریف کرن تے ہر کوئی مجبور ہوجاندا۔اوہ دے سفر دا آغاز دلی دے اک پوسٹر توں جندے وچ لکھیا سی ’’اداکاری لئی نوے چہرے دیاں لوڑاے‘‘اوہناں نیں آڈیشن دتا تے کاسلیکٹ ہوگئے اوس توں بعد اوہناں دے سفر دا آغاز تے اج پنجابی فلماں اوہناں توں بغیر ادھوریاں نیںاوہ ہر وڈی فلم وچ نظر آندے نیں تے ایہہ سفر کامیابی نال جاری اے۔اوہناں نیں بالی ووڈ دی فلماں وی کیتیاں نیں۔روزوار بھلیکھا نال گل کردے اوہناں نیں دسیا کہ شروع وچ اسی کجھ اداکار پاکستان دی ہٹ فلماں دی کہانیاں چک کے تھوڑی بوہت تبدیلی کرکے انڈیا وچ فلماں بنائیاں جوکہ بہت کامیاب ثابت ہوئیاں۔ہن تک شوندر ماہل ہن تک مختلف زباناں وچ 400توں ودھ فلماں کرچکے نیں ۔فلم پنجابی دی کامیابی دا کریڈٹ اوہ من موہن سنگھ نوں دیندے نیں اوہنا دا کہنا اج پنجابی فلم انڈسٹری پوری دنیا وچ ویکھیا جارہیا نیں تے وڈی سطح تے کاروبار کررہیاں نیں۔دوویں پنجاباں دی سانجھی فلم ’’چل میراپُت‘‘دے بارے گل بات کردیاں ہوئیاں کہیا کہ ایہہ اک کڑی جڑ گئی اے لہندے تے چڑھدے پنجاب دی۔ ہن فلماں وچ دونوں ملکاں دے فنکار رل مل کے کام کررہے نیں۔شوندر ماہل نیں دسیا کہ اسی میاں نواز دے دور وچ پاکستان فلم’’دور نہیں ننکانہ‘‘دی شوٹنگ لئی آئے سی ۔فلم شوٹنگ دے نال نال پاکستان پھرن دا موقعہ ملیا ۔پاکستان دی حکومت تے لوکاں نیں سانوں بہت مان دتا تے بوہت ودھیا مہمان نوازی کیتی ۔شوندر ماہل دا کہنا اے کہ میں اج ایس مقام تے کدے وی نہ ہندا جے میری گھر والی دی نوکری نہ ہندی۔میری گھر والی نے اوکھے ویلے وچ بوہت ساتھ دتا ،سانوں شہر وی چھڈنا پئیا بوہت مشکلاں وی آئیاں پر اوہناں ہر تھاں میرا ساتھ دتا تے اج ایس مقام تے اپڑیا۔شوندری ماہل پاکستان دی موسیقی نوں بوہت پسند کردے نیں تے اوہناں دی خواہش ایہہ کہ لہندے چڑھدے پنجاب دی سانجھ بنی رہے دونوں ملک کے کام کرن پیار امن تے دوستی دے رشتے نوں اگے لے ٹرن کیونکہ فن تے فنکار دی کوئی سرحد نئیں ہندی۔ شوندر ماہل نوں انڈسٹری وچ 50سال مکمل ہوگئے نیں تے لائف ٹائم اچیومنٹ ایوارڈ وی اوہناں دے ناں ہویا۔ایوارڈ ملن تے اوہناں د اکہنا سی کہ میں اپنی زندگی وچ بڑے اوکھے ویلے ویکھے نیں پر کدی ہار نئیں منی تے صاف دل تے صاف نیت نال محنت کیتی اے تے محنت کدے وی ضائع نئیں ہندی اوہندا پھل اک دن ضرور ملدا اے۔میرا ایہی سنہیا اے کہ سچے دل تے صاف نیت نال محنت کردے رہو،نفرت نہ پھیلائو سب واسطے اچھا سوچو اک دن ضرور کامیابی ملے گی۔ میں اپنے پیار کرن والیاں دا ڈونگے دل دھنوادی تے شکرگزار ہاں اور ہمیشہ رہواں گا۔