اللہ جانے ساڈی آزمائش کدوں مکنی ایں؟

خالد مسعود خان

ملک وچ اقتدار بدلیا۔ آئین تے جمہوریت دی جت ہوئی عمران خان دے جمہوری طریقے توں فارغ ہون دے نتیجے وچ قوم نوں جہڑی جمہوریت نصیب ہوئی اے اوہدا پھل ایہہ وے کہ مرکز وچ اباجی تے ملک دے سب توں وڈے صوبے وچ اوہناں دا پُتر ہووے گا۔ اسلام آباد راہیں میاں شہبازشریف پاکستان تے لہور وچ بہہ کے حمزہ شہباز پنجاب دی حکومت نوں چلان گے۔ پاکستان دی سب توں وڈی جمہوری سیاسی پارٹی ہون دی دعویدار مسلم لیگ ن دے کول خاندان شریفاں توں علاوہ اک بندہ وی انج دا نہیں جو ملک و قوم دی حکمرانی دا اہل ہووے۔ کیہ جمہوریت اے تے کیہ ایس ملک دی قسمت اے۔
عمران خان وزارت عظمیٰ توں فارغ ہو گئے تے ملک وچ جمہوریت دا بول بالا وی ہو گیا پر سوال ایہ وے کہ ایہ کیسا جمہوری پارلیمانی سسٹم اے جو اپنی کیہ جلوہ گری وکھا رہیا اے؟ اک سوچوہتر ارکان اسمبلی اک اجہے بندے نوں ایس ملک دا وزیراعظم نامزد کر رہے نیں جہدے دامن تے مقصود چپڑاسی دی گھلی ہوئی ٹی ٹیاں دے چھینٹے اجے وی نہیں سُکے۔ اودھر ایہ عالم سی کہ پنجاب تے عمران خن نے تریخ دا نااہل تے فارغ ترین بندہ وزیراعلیٰ بنا کے مسلط کیتا سی تے اودھر ہن ایہ عالم اے کہ ہن ایس عہدے لئی اوہ بندہ امیدوار اے تے صرف میدوار ای نہیں متوقع وزیراعلیٰ وی اے جہدی کرپشن دیاں کہانیاں دی گونج اجے ختم نہیں ہوئی۔ دوران تفتیش جدوں حمزہ شہباز دے والد گرامی قبلہ شہبازشریف توں وکھووکھ بینکاں وچ لگن والی کروڑاں ارباں روپیے دی ٹرانزیکشنز دے بارے سوال کیتا گیا تے شہبازشریف صاحب نے بڑے مزے نال جواب دتا کہ مینوں ایہدا کوئی پتہ نہیں۔ ایہ گل میرے پُتراں توں پچھی جاوے۔ یعنی ایہناں بے نامی ٹرانزیکشنز دے بارے آپ میاں شہبازشریف دے کول کوئی تسلی بخش جواب نہیں سی تے ایہ ساڈی جمہوریت دا حسن اے کہ منی لانڈرنگ دے کیس وچ ضمانت تے آزاد گھمن والے باپ تے بیٹا ہن پاکستان دے وزیراعظم تے پنجاب دے وزیراعلیٰ ہون گے۔ بلاول بھٹو نے بالکل ٹھیک کہیا اے کہ جمہوریت بہترین انتقام اے اجے ایہ انتقام پاکستان دے لوکاں توں لیا جا رہیا اے۔
ساڈے ایتھے کس قسم دی سیاست دا چلن اے تے کس طرح دی جمہوریت اے؟ ہر پارٹی نوں رضاکارانہ ایس قسم دے ورکراں دی چوکھی گنتی میسر اے جو بناں سوچے سجھے اپنی اپنی لیڈرشپ دی انھی تقلید وچ مبتلا نیں۔ کوئی ورکر اپنی لیڈرشپ اگے کوئی سوال نہیں کردا اوہدے کسے وی فیصلے تے اعتراض نہیں کردا اوہدے کسے اقدام تے غوروفکر نہیں کردا تے اوہدے کسے حکم توں سرتابی نہیں کردا۔ ایس دنیا وچ بہت سارے مذہباں دے اکابرین نوں وی اجہے بے لوث تے مخلص پیروکار نصیب نہیں ہوئے جنے مخلص تے بے لوث کارکن ساڈی سیاسی جماعتاں دے سربراہواں نوں ملے نیں۔ یقین نہ آوے تے میاں نوازشریف‘ عمران خان‘ آصف علی زرداری تے مولانا فضل الرحمن نوں ویکھ لوو پر ایس معاملے وچ جناں مزہ الطاف حسین نے اٹھایا اے اوہدی تے تریخ وچ کوئی مثال گھٹ ای ملے گی۔ جس عقیدت تے احترام نال اوہناں دے ورکراں دا ٹیلی فونک خطاب سن دے سن اونی عقیدت تے وارفتگی نال تے بدھ بھکشو اپنے دالائی لامہ دا خطاب وی نہیں سن دے ہون گے۔ ایہ سب کجھ ساڈی جمہوری سیاسی پارٹیاں وچ لاگو ڈکٹیٹر شپ تے کارکناں دی احمقانہ تابعداری دا حسین امتزاج اے تے ایہدے باوجود ساڈے ایتھے جمہوریت اے۔
کل تک میاں نواز شریف ڈاڈھے بیمار سن تے اوہناں دی جان نوں خطرہ وی سی اوہناں دے پلیٹ لیٹس المعروف اوہناں دیاں پلیٹاں بڑیاں خراب ہو چکیاں سن تے اینیاں گھٹ پلیٹاں دے نال اوہناں دا زندہ رہنا اک کرشمہ سی تے اوہ ایس حالت وچ نہ صرف ایہ کہ اوہ سفر دے قابل نہیں سن سگوں انج کرن وچ اوہناں دی جان نوں ڈاڈھا خطرہ سی پر ایہ صرف جمہوریت دا پھل اے کہ جیویں ای عمران خان دے خلاف عدم اعتماد دی تحریک وچ جان پے گئی میاں نوازشریف دے پلیٹ لیٹس وچ وادھا ہوندا گیا جیویں ای عدم اعتماد لئی درکار اک سو بہتر ارکان اسمبلی دی گنتی پوری ہوئی میاں نوازشریف دے پلیٹ لیٹس وی نہ صرف پورے ہو گئے سگوں نارمل توں وی ودھ گئے تے چھیتی طور تے اپنے سفر دے قابل وی ہو گئے تے ایس جمہوری اپریشن دا اثر صرف اکلے میاں نوازشریف تے ای نہیں ہویا سگوں عدم اعتماد دی ایس ہیوی ڈوز دا اثر قبلہ اسحاق ڈار تے وی اوسے طرح ہویا جس طرح میاں نوازشریف تے ہویا تے اوہناں دی کمر دا درد عدم اعتماد دی کامیابی دے جادوئی علاج نال بالکل غایب ہو گیا اے تے اوہ وی کجھ دیہاڑیاں وچ پاکستان پدھار رہے نیں۔
اسیں وی کیہ بدقسمت لوک آں کہ کدی سانوں ملتان وچ ایہ چوائس ملدی اے کہ اسیں حاجی بوٹا تے ملک صلاح الدین وچوں کسے اک بندے دا اپنے واسطے رکن قومی اسمبلی دا انتخاب کر لیے تے کدی ایہ تبدیلی نصیب ہوندی اے کہ عثمان بزدار دے بعد سانوں حمزہ شہباز بھگتنا پوے گا۔ عثمان بزدار جے عمران خان دی ضد تے انا نہ ہوندا تے اوہ بزدار قبیلے دی سربراہی دے زور تے کسے تحصیل دا ناظم ہوندا تے حمزہ شہباز جے فرزند شہبازشریف نہ ہوندا تے ودھ توں ودھ گوالمنڈی توں مخصوص سیٹ تے کونسلر ہوندا پر کہاوت اے کہ ’’روپ رون تے کرم کھان‘‘ اوہ میاں نوازشریف دے بھتریئے تے میاں شہبازشریف دے پُتر نیں ایس لئی اوہ اک انگریزی لفظ By Default دے مطابق ساڈے حکمران بنن لئی ساریاں خصوصیتاں رکھدے نیں جو موجودہ سیاسی منظرنامے وچ ساڈا مقدر نیں۔ مفتی محمود دے بعد مولانا فضل الرحمن تے ہن مولانا اسعدمحمود‘ ذوالفقارعلی بھٹو‘ فیر بینظیر بھٹو تے ہن زرداری توں ہوندے ہوئے بلاول زرداری تک‘ عبدالغفار خان توں ولی خان تے فیر اسفندیار توں ایمل ولی دا سفر ساڈی سیاسی تریخ دا سب توں تابناک جمہوری باب اے۔ اللہ جانے ساڈی آزمائش کدوں مُکے گی۔٭