پنجابی یونین دے پربندھ ہیٹھ پنجاب ہائوس وچ وساکھی میلہ2022

لہور (سٹاف رپورٹر) پنجابی یونین دے پربندھ ہیٹھ پچھلے دیہاڑ پنجاب ہائوس وچ پنجاب دی دھرتی دے تریخی تے ثقافتی تہوار ’’وساکھی میلہ 2022‘‘ دے عنوان نال اک پروقار تقریب دا پربندھ کیتا گیا۔ پنجاب نال تعلق رکھن والی ملکی تے غیر ملکی نامور شخصیات سنے زندگی دے مختلف شعبیاں نال جڑے لوکاں دی بہت وڈی تعداد نے رلت کیتی۔ میزبانی پنجابی یونین دے چیئرمین مدثر اقبال بٹ تے وائس چیئرمین بلال مدثر بٹ نے کیتی۔ تقریب دی صدارت ورلڈ پنجابی کانفرنس کینیڈا دے صدر جسبیر سنگھ بوپارائے نے کیتی۔ اُچیچے پروہنیاں وچ پنجابی رہنما الیاس گھمن‘ جان کاشمیری، وائس چانسلر بابا گورونانک یونیورسٹی محمد افضل ‘طاہرہ سرا، پروفیسر ڈاکٹر نبیلہ رحمان ، شاعر بابا نجمی،پرفیسر ڈاکٹر ہرجندر سنگھ دلگیرتے حمید اللہ بھٹی شامل سن۔ پنجابی یونین دے چیئرمین مدثر اقبال بٹ نے سٹیج سیکرٹری دے فرائض نبھاندے ہوئے پنجاب ہائوس دے بارے دسیا کہ پنجاب ہائوس دا مقصد پنجاب وچ اک ایسا ادارہ بنانا سی جتھے پنجابی دی مختلف جہتاں اتے کھل کے کم ہووے اوتھے پنجابی توں متعلق مختلف منصوبیاں اتے کم ہو رہیا اے جہناں لئی کسے کولوں کوئی مالی مدد نہیں لیتی جاندی۔ سب کجھ اپنی مدد آپ دے تحت کیتا جاندا اے۔ اوہناں نے آکھیا کہ وساکھی ساڈا مشترکہ تہوار اے جہڑا پنجاب دی ثقافت تے ساڈی کشادہ دلی دی عکاسی کردا اے۔ سانوں ساریاں نوں رل کے اپنی ثقافت تے پنجابی دے فروغ لئی کم کرنا چاہیدا اے۔ پروگرام دا آغاز تلاوت کلام پاک نال حافظ ممتاز ملک نے کیتا۔ ندیم اقبال باہو‘تیمور افغانی تے عنایت عابد نے عارفانہ کلام پڑھیا۔گل بات دا آغاز پروفیسر ڈاکٹر ہرجندر سنگھ دلگیر توں کیتا گیا۔ اوہناں نے آکھیا کہ سب توں پہلاں اسیں مدثر اقبال بٹ دے مشکور آں کہ اوہناں نے پنجاب ہائوس قائم کیتا تے دنیا بھر دے پنجابیاں نوں اک جگہ اکٹھے ہو کے اپنے دن منان دا موقع دتا۔ اوہناں نے آکھیا کہ گو کہ پنجابی کیلنڈر پہلی چیتر توں شروع ہوندا اے لیکن اوہدا اصل آغاز پہلی وساکھ نوں ای ہوندا اے کیوں جے اوہدوں کسان دے گھر دانے آندے نیں تے اوہدے توں پورے سماج نوں کھان لئی اناج ملدا اے۔ زاہد حسن نے آکھیا کہ وساکھی پنجاب وچ وسن والے سارے لوکاں دا مشترکہ تہوار اے۔ تیزی نال ترقی کردی ہوئی ایس دنیا وچ سانوں وساکھی دے نال نال ماحولیات دا وی خیال رکھنا اے۔ ایہہ کم حکومتاںکردیاں نیں لیکن ساڈی حکومت دی ایس ول توجہ نہیں اے۔ ایہہ کم وی سانوں ای کرنا پووے گا۔ پنجابی دے منے پرمنے شاعر بابا نجمی نے ایس موقع تے وساکھی دے حوالے نال اپنی نظم‘ عیداں ورگی کیوں نہ لگے سانوں یاروساکھی…ذاتاں پاتاں پچھے کر کے ونڈے پیارو ساکھی‘سنا کے محفل وچ سماع بنھ دتا۔ اصغر پہلوان نے جگ جگ جیوے شالا ساڈا سوہنا دیس پنجاب سنائی جہدے تے حاضرین محفل نے دل کھول کے داد دتی۔ ایس موقع تے طاہرہ سرا نے مختصر جیہے خطاب وچ بولیاں سنائیاں۔ تیرے آون تے میلہ پھبنا…وے منڈیا کنک رنگیا‘ ساڈا عمراں دا لتھیا تھکیواں‘ تیرے نال گل کر کے۔ حکیم آصف گجر نے آکھیا کہ وساکھی پنجابیاں دا قدیم تہوار اے۔ اوس دن توں خوشیاں دا آغاز ہوندا اے تے دنیا بھر دے پنجابی بلا تفریق مذہب ایس دن نوں پرجوش انداز وچ مناندے نیں۔ وائس چانسلر بابا گورونانک یونیورسٹی محمد افضل نے آکھیا پنجاب ہائوس وچ آ کے جہڑی خوشی ملدی اے اوہ کدھرے ہور نہیں ملدی۔ اپنائیت دا احساس جس قدر پنجاب دے لوکاں وچ اے۔ دنیا دے کسے خطے دے لوکاں وچ نہیں اے۔ بابا گورونانک یونیورسٹی بابا گورونانک دا پیغام پھیلان وچ اہم کردار ادا کرے گی۔ پنجابی رہنما الیاس گھمن نے آکھیا کہ وساکھی پنجاب دا اوہ تہوار اے جہدے آثار ہڑپہ دی تریخ وچ وی ملدے نیں لیکن ایس تہوار وچ اصل رنگ سکھاں نے بھریا اے۔ اسیں سارے رل کے بھرویں انداز وچ وساکھی دا تہوار منانا چاہیدا اے۔ تیمور افغانی نے ترنم دے نال ہیر وارث شاہ سنائی تے حاضرین نوں محظوظ کیتا۔ پروفیسر نبیلہ رحمان نے تقریب وچ اک موقع تے میزبان پنجابی یونین دے چیئرمین مدثر اقبال دی اک گل دے جواب وچ آکھیا کہ بیشک تہاڈے جئے بھراای بھیناں دا مان رکھدے نیں ایسے لئی پنجاب دی بھیناں بھراواں دی ای قسم کھاندیاں نیں۔ اوہناںنے آکھیا وساکھی پنجاب دا اوہ مشترکہ تہوار جہنوں اسیں رل کے منانے آں سانوں ایس تہوار نوں مذہبی بنیاداں اتے تقسیم نہیںکرنا چاہیدا ۔ اوہناں نے آکھیا کہ درشن سنگھ نے پنجابی وچ لکھن والیاں نوں اکٹھا کرن وچ اہم کردار ادا کیتا اے۔ اوہناں نے آکھیا کہ اردو وچ شاعری کرن والے ایسے شاعراں دی اک لمی فہرست موجود اے جنہاں نے پنجابی ہون دی وجہ نال پنجابی وچ وی کجھ نہ کجھ لکھیا اے۔ پنجابی اعلیٰ اخلاقیات تے اعلیٰ ثقافتی روایات دے امین نیں۔ پنجابیاں دی کشادہ دلی نے کئی موقعے تے اوہناں نوں نقصان وی پہنچایا اے۔ پروفیسر ڈاکٹر کلیان سنگھ کلیان نے آکھیا کہ قلم فائوندیشن تے پنجابی یونین دے درمیان تعلقات وچ وادھا ہو رہیا اے۔ درشن سنگھ پاکستان آئے سن اوہناں دا ایتھے آن دا تجربہ کجھ چنگا نہیں رہیا لہٰذا اوہ واپس چلے گئے سن لیکن اوہناں نے اپنا مشن جاری رکھیا۔ جنگ دے کالم نگار نعیم مسعود نے آکھیا کہ میرے اندر پنجابی وچ لکھن دا جذبہ موجود سی اوہنوں فروغ مدثر اقبال بٹ نے بخشیا اے۔ پنجابی میڈیا گروپ دے صدر ندیم رضا نے آکھیا کہ مدثر بٹ نے پنجاب ہائوس بنا کے پنجابی دے تحفظ تے فروغ دی راہواں کھول دتیاں نیں میرے لئی فخر دی گل اے کہ میں اوہناں دے مشن دا حصہ آں۔ اوہناں نے تقریب وچ رلت تے سب حاضرین دا شکریہ ادا کیتا۔ جسبیر سنگھ بوپارائے نے اپنے صدارتی خطاب وچ آکھیا کہ پنجاب گورئواں دے نام تے بوسیادیش اے تے جہڑی جگہ گورئواں دے نام توں آباد ہووے اوہ کدی ختم نہیں ہو سکدی۔گوروگوبندسنگھ نے 1699 وچ خالصہ دی بنیاد رکھ دتی سی۔ پنجاب ساڈی جنم بھومی اے ہر سکھ دا دل اوہدے لئی دھڑکدا اے۔ دنیا وچ سکھاں نوں سب توں ودھ عزت پاکستان وچ ملدی اے۔ تقریب دے اختتام اتے شرکا لئی پرتکلف افطار ڈنر دا پربندھ وی کیتا گیا۔