پاک بھارت تعلقات دا فروغ ضروری!

اسدمفتی

مسلم لیگ ن دے صدر تے پہلی واری پاکستان دے وزیراعظم بنن والے میاں شہبازشریف نے کہیا اے کہ اسیں بھارت دے نال بہتر تعلقات ول پیش قدمی تے سارے تصیفہ طلب مسئلے حل کرنا چاہنے آں جہناں وچ مسئلہ کشمیر وی شامل اے۔ مسلم لیگ ن دے سربراہ نے دسیا کہ پچھلے دیہاڑے مینوں وزیراعظم مودی دا فون آیا سی ساڈی کافی تفصیلی گل بات ہوئی جہدے آخر وچ اوہناں نے مینوں مبارک دتی تے نیک خواہشات دا اظہار کیتا۔ میں وی اوہناں دا شکریہ ادا کیتا۔ شہبازشریف نے پاکستان تے بھارت وچکار تعلقات بہتر بنان لئی جہڑے اقدامات دا اعلان کیتا اے اوہناں دا مقصد ایہہ وے کہ جنوبی ایشیا وچ حقیقی امن تے سلامتی قائم ہووے تے کشمیر سنے سارے مسئلیاں دے حل لئی اپنیاں کوششاں دا عملی آغاز کیتا جا سکے۔
شہبازشریف بنیادی طور تے مثبت سوچ رکھن والے بندے نیں اوہناں نے کئی واری اپنی ایس فکرونظر دا اظہار کیتا اے کہ تہانوں منزل تے اپڑن لئی پہلی پوڑھی تے پیر رکھنا پیندا اے۔ ساڈی تریخ سانوں دسدی اے کہ ایتھے تشدد‘ جارحیت تے آمریت دے طریقیاں نال کوئی مسئلہ حل نہیں ہویا تے جے حل ہویا وی اے تے اوہ دیرپا ثابت نہیں ہو سکیا۔ ہن لوکاں دی غالب اکثریت دوہاں ملکاں دے وچکار مفاہمت تے دوستی چاہندی اے تے سارے حل طلب مسئلے جمہوری طور طریقیاں تے پرامن گل بات راہیں حل کرن دی خواہش مند اے جہنوں ہن تک نظرانداز کیتا جاندا رہیا اے۔ پر ہن انج لگدا اے کہ ایس خواہش نوں زیادہ دیر تک نظرانداز نہیں کیتا جا سکے گا تے پاکستان و بھارت امن و مفاہمت ول پیش قدمی کرن تے مجبور ہو جان گے کہ نہ صرف ایہناں دوہاں ملکاں سگوں پورے جنوبی ایشیا دا مفاد ایہدے وچ اے کہ ایس پورے خطے وچ امن و سلامتی نوں یقینی بنایا جاوے ایس امن و سلامتی نوں یقینی بنان لئی پاک و ہند دے وچکار مفاہمت پہلی شرط اے۔
پاکستان تے بھارت ورھیاں توں اپنے اپنے موقف تے ڈٹے رہن دی تھاں گل بات تے مکالمے دی راہ لبھن کہ پاک و ہند دی ساری تریخ نکام مذاکرات نال بھری اے۔ دوستی دا سوال تے اک پاسے رہیا سوچن دی گل ایہہ وے کہ کیہ اسیں آپسی دشمنی دے متحمل ہو سکنے آں؟ میرے حساب نال ایس ویلے سب توں اہم مسئلہ دوہاں ملکاں وچ لوکاں دی آمدورفت دے حوالے نال کم کرن دی لوڑ اے ایس نال رائے عامہ وچ تبدیلی دے موقعے پیدا ہون گے۔ دوہاں ملکاں وچ شکوک و شبہات اینے پھیلا دتے گئے نیں کہ پچھلے 75 ورھیاں توں اسیں صرف اک دوجے تے الزامات دی بوچھاڑ ای کردے آئے آں جد کہ دوہاں ملکاں دی دوستی نہ صرف ممکن اے سگوں ضروری وی اے۔ میرے حساب نال حالیہ تحریک عدم اعتماد وچ میاں شہبازشریف دی نمایاں کامیابی پاک بھارت امن دوستی لئی اک نیک شگون اے۔ ہر اوہ دن جدوں دشمنی دے خدشے وچ شدت پیدا نہ ہووے تے ایہ اک بہتر قدم اے جہنوں میں اک نعرے دی صورت وچ انج کہنا چاہواں گا بھارت چلو شہباز شریف ہم تمہارے ساتھ ہیں۔
پہلی واری وزیراعظم بنن والے بھارت نال دوستی کرن دے خواہش مند شہبازشریف نے لگی لپٹی رکھے بناں کہیا کہ ایہ ہندوستان تے پاکستان وچکار تعلقات نوں بہتر بنان لئی سنہری موقع اے۔ مسئلیاں دے حل دا بہترین موقع اے۔ میں اجہیاں کئی مثالاں پیش کر سکنا واں جدوں حریفاں نے یاں اک دوجے دے مخالفاں نے ساڈے مسئلیاں توں وی ودھ مشکل مسئلیاں نوں حل کیتا اے۔ مینوں اوہ دن وی یاد اے جدوں وزیراعظم توں پہلے واجپائی بھارت دے وزیر خارجہ سن اودوں پاکستان تے بھارت وچکار جے بہت چنگے نہیں تے چنگے تعلقات ضرور سن۔ فیر جدوں واجپائی بحیثیت وزیراعظم بس دے راہیں لہور اپڑے تے کارگل دا حادثہ پیش آگیا ایہ حادثہ پرویزمشرف دا پیدا کیتا ہویا سی۔ نوازشریف نوں وزیراعظم ہوندے ہوئے وی ایہدا پتہ نہیں سی۔ ایہو وجہ اے کہ نوازشریف سول معاملیاں وچ فوجی مداخلت تے کدی خوش نہیں ہوئے اوہ فوج دی سویلین معاملیاں وچ بے تکی مداخلت تے نکتہ چینی کردے رہے نیں۔ ہن وی کر رہے نیں‘ ایہ کوئی معیوب گل نہیں۔ اودھر میں پاکستان تے بھارت دے ارباب اختیار اگے درخواست کراں گا کہ اوہ اپنی ماہوار ایٹمی دھمکیاں دی تھاں دوستی لئی ہتھ ودھان۔
ایتھے میں ایہ گل تے نکتہ سمجھن وچ حق بجانب آں کہ میاں نوازشریف دے بعد کسے حکمران وچ اینی سوجھ بوجھ نہیں کہ اوہ برصغیر وچ ودھدی ہوئی خاک و خون دی آندھی نوں سمجھ سکے۔ میں ایہ گل پوری دیانت داری نال کہنا واں کہ پاک بھارت دوستی دے ایس ٹُٹے ہوئے سلسلے نوں اوتھو ںجوڑیا جاوے جہنوں اعلان لہور کہندے نیں تے جو نوازشریف دے مرہون منت اے۔ کسے عارف نے کنی پرمغز گل کہی اے کہ جہڑیاں حقیقتاں دا سامنا جرأت تے صاف گوئی دے نال نہ کیتا جاوے اوہ پلٹ کے ساڈی ای کنڈ تے وار کر بیٹھدیاں نیں۔ ہن ویکھنا ایہہ وے کہ ایس نظریے تے شہبازشریف پورے اتردے نیں یاں نوازشریف نوں ملک بدر کرن والے۔٭٭