شہبازکرے پرواز

صوفیہ بیدار

سیاست‘ ویاہ تے نوکری تنے بڑے برداشت دے ادارے نیں۔ عدم برداشت ایہناں دے خاتمے پاروں جنگل د ے آزاد انسان تے کنیاں کاٹھیاں پائیاں گئیاں تے اوہ اک سماجی زندگی لئی تیار ہویا اک وعدے تے گواہی نبھان لئی دس دس بچے پالنے‘ پہاڑ کٹن چل پیا ہتھ وچ پھاوڑا تے کہاڑی حالاں کہ اوہدا اک افکار اوہنوں ایس ساری مشقت توں وی بچا سکدا اے تے غیرت دے ناں تے سر تے پئی دستار دے وعدیاں بھرے کس بل توں وی۔ نوکری کرکے تے اسیں ویکھیا کس طرح اپنے سامنے اپنے خلاف سخت موقف سننا پیندا اے فیر وی اکٹھے نہ صرف میٹنگاں کرنے آں اکٹھے کھانے کھانے آں عدالتاں وچ اک دوجے دا سامنا کرنے آں دوجے افسراں وانگوں مینوں وی ڈھیر سارے عدالتی سمن آندے سن تھیٹر تے دوجیاںمخالفانہ درخواستاں‘ چپقلشاں پاروں بڑی واری لوک دوستاں نال لڑان لئی وی آپ ای خط لکھ دیندے سن۔ یونان وچ لیٹرز دی تے انتہا ویکھی۔ سیاست دا مقام برداشت دے حوالے نال ایس لئی زیادہ اے کہ اوہ صلح کرن تے اسیں مصلحت کہنے آں مصالحت کریئے تے ڈیل تے پرامن ڈیل کر ای لیے تے لوٹا کریسی جد کہ ویاہ دے ادارے تے عدلیہ دی مصالحتی کونسل وچ انتہا توں ودھ موقع دتا جاندا اے کہ اتحاد کر لیے تے جے انج ہو جاوے تے بہت قابل داد سمجھیا جاندا اے شروع وچ برصغیر دی سیاست وچ وی ملکی مفاد وچ معاہدے تے اتحاد نوں چنگا سمجھیا گیا۔ لوکاں نوں اپنی خوشحالی‘ وطنیت‘ کشمیر تے بھارت توں جنگ توں علاوہ پنجواں کوئی موضوع نہیں سی ہوندا۔
مزدور طبقے نوں تے قناعت تے دینداری نے مطمئن کر رکھیا سی حالاں کہ غریب اپنی غربت تے مان کردے سن امیراں توں سڑن دا چلن نہیں سی۔ امیر وی جدی پشتی والے سن چھچھورے نہیں گڈیاں اوہناںدے کول سن جو اوہناں نوں سچ مچ افورڈ کر سکدے سی ایہ نہیں کہ راہ وچ پٹرول ختم اے یاں پرزے کھڑک رہے نیں ایس تفریق دے دوجے مسئلے یقینا ہون گے پر جو مسئلے برابری دے مسئلے‘ سوشلزم تے شعورو آگاہی نے دتے نیں اوہناں دا شمار نہیں۔ شعور دا تحفہ بھٹو صاحب نے دتا تے لوکاں نوں تربیت بناں مل مالکان دیاں ٹائیاں کھچ لین‘ ڈھڈ چوں دولت کڈھن‘ رشوت خور نوں سڑک تے کھچن دے حوصلے دتے دور کیوں جائیے اوہناں دیاں تقریراں سن سن کے دل کردا سی اپنے ای امیر رشتے داراں نوں سدھا کر دیئے فیر کمیونزم دم توڑ رہیا سی اوہدی تھاں ہولی ہولی اسلامی سوشلزم دا نعرہ لگا حالاں کہ دوویں وکھریاں چیزاں سن پر وقتی سیاست نے انتہاپسندی دا راہ وکھایا جنے پرسکون میں مذہبی لوک اپنے بچپن وچ ویکھے نیں فیر کدی نہیں‘ سارے دے سارے سیاست وچ چلے گئے ہن حالات ایہ نیں کہ حکومت کسے اک مکتبہ فکر دی چل ای نہیں سکدی ایتھے فکری محاذ تے وی ’’ونڈی‘‘ ضرور پوے گی ہمیشہ لسانی بنیاداں تے کراچی وچ صوبائی بنیاداں تے ای تے مذہبی و فرقہ جاتی وکھرا کوئی اک نظریہ موجود صورتحال وچ مسلط ہونا ناممکن اے۔
اجہے حالات وچ مہنگائی کمر توڑ قسم دی رکی ہوئی آمدنی روپیے دی ڈگدی قدر ڈالر دی اٹھان ‘ انتظامی بدحالی ایس حد تک کہ حکمراناں نوں ایہ نہ پتہ ہووے کہ پنجاب دی صرف 9 ڈویژن نیں تے گوجرانوالہ نوں چھڈ کے باقی ساریاں دے 4,4 ضلعے نیں صرف گوجرانوالہ دے 9 ضلع نیں تھرو پراپر چینل جے روزانہ کاغذ ضائع کر کے دو چار حکم نامے ای عوامی فلاح وچ گھل دتے جاندے تے حکومت دا اک روپیہ خرچ ہوئے بناں نرخنامیاں دیاں لسٹاں دکانا تے لگ جاندیاں۔ دفتراں دی حاضری ٹھیک ہو جاندی کوڑا کرکٹ دے ڈھیر اٹھ جاندے سائلین نہ رلدے کہ دو چھٹیاں سنے جمعہ دیہاڑے ای دن توں سارا عملہ سر تے ٹوپی رکھ کے یاراں وجے توں ای کم تو ںانکار کرنا شروع کر دیندا اے ہفتے چوں تن دن نکل جاندے سن حالاں کہ ایہ نوٹیفکیشن کسے ویلے وچ بجلی بچان لئی کیتا گیا سی بعد وچ کابل لوکاں نے مستقل بنا لیا۔
میاں شہبازشریف دی رفتارتوں کون واقف نہیں اوہناں نے جس طرح پہلے سرکاری ملازماں دیاں دوڑاں لگوائیاں سن۔ ملک دی مشینری نوں فیر توں پہیے لا دتے نیں پر ایس واری اوہناں نوں زنگ آلود کھڑ کھڑ کردی عدم توجہ دا شکار بیمار تے پراپیگنڈا شدہ حکومتی مشینری ملی اے پر آفرین اے ایس ورک ہالک بندے تے جنہے نہ دن ویکھیا نہ رات نہ بارش نہ طوفان صحت تے خیر اوہ اپنی قربان کر ای چکے نیں۔ ’’اس جان کی پروا کون کرے‘‘ جہڑی اوہناں نے پہلی تقریر قومی اسمبلی وچ کیتی اوہ اپنی ذات تے کیتے جان والے کسے وی طنز دے نشتر دا جواب دتے بناں ملک دے ہر شعبے دے حوالے نال سی جس اتحادی تے دوجے مسئلے ذات دے نال اوہ حلف اٹھا رہے سن کوئی عام بندہ اینے منفی پراپیگنڈے دس طرح دیاں ندرونی تے بیرونی سازشاں وچ اٹھ ای نہیں سکدا۔ اینے پریشر وچ کم کرنا اوہناں دی عادت اے اوہناں دی ذات تے خانگی زندگی تے وی چکڑ اچھالیا جا رہیا ہووے مذاق اڑائے جا رہے ہون پر شہباز دی پرواز نوں کون روک سکدا اے اقبال یقینا انج دے ای لوکاں لئی کہہ گئے سن:
تو شاہین ہے بسیرا کر پہاڑوں کی چٹانوں پر‘‘
لوک جناں مرضی پراپیگنڈا کر لین سازشاں دس گنا ودھ جان پر اوہ شہبازشریف دی پرواز دا مقابلہ کر ای نہیں سکدیاں۔ واپس آن تے جی آیاں نوں‘ تسیں پنجاب وچ کم کیتا ایہدی مثال نہیں ملدی ہن پورے ملک دی خاطر اپنے تے اٹھن والی ہر انگلی تے توہین آمیز جملیاں دا اک ای جواب سی (تے اوہ وی الللہ ولوں بڑے متکبر نوں) تے تکبر دا جواب اوہ اچکن سی جہنوں پا کے تسیں ملک و قوم دا حلف لیا اوہ حلف لیندے نہ تہاڈی زبان لڑکھڑائی نہ نیت‘ تسیں صبر توں کم لیا ایسے لئی اللہ نے متکبر ترین لوکاں نوں اوہ منظر وکھایا جدوں تسیں اسلامی جمہوریہ پاکستان دے 23ویں وزیراعظم دا حلف اٹھا رہے سی ایہو جواب سی ساری نفرت‘ بغض‘ انتقام تے تذلیل دا تے ایہ جواب صرف اللہ دی قدرت ای دے سکدی اے۔٭٭