عمران دی سیاسی عینک دا دھندلاشیشہ

شکیل امجد صادق

امریکیاں نے حکومت نوں دھمکان دی کوشش کیتی تے پورے ٹل نال کیتی تے ایہ کوئی پہلی واری نہیں سی ہویا ہر اوس حکومت دے نال ہویا جنہے امریکہ نال اکھ چک کے گل کرن دی کوشش کیتی۔ پہلے جدوں وی انج ہویا ساڈیاں حکومتاں اوہنوں خاموشی نال ایس گل نوں پی گئیاں تے کئی واری تے اوہناں دے اگے سجدہ ریز وی ہو گئیاں تے پیراں نوں ہتھ لا کے معافی منگی۔ ایس واری عمران خان نے نہ صرف انکار کیتا سگوں اوس دھمکی نوں عوامی سطح تے وی کھول دتا جو امریکہ لئی حیرت توں گھٹ نہیں سی۔ جے کوئی ہور حکومت ہوندی تے انج نہ کردی سگوں انج کرن دی جرأت وی نہ کردی سگوں اوہناں دے پیر چٹن دی وی کوشش کردی۔ دوجی گل امریکیاں نوں ایہدی توقع نہیں سی کہ ایس واری اانج دا ردعمل وی ہووے گا۔ عدم اعتماد دی تحریک تے ایس دھمکی وچ براہ راست تعلق اے بھاویں کجھ ای بندے ایس دھمکی توں واقف تے ایہدے تے خوش سن پر زیادہ تر اوہ نیں جو حب علی دی تھاں بغض معاویہ وچ اگے ودھے تے امریکیاں نوں خوش کرن دی بھرویں کوشش کیتی۔ اسٹیبلشمنٹ وی ایس معاملے وچ تقسیم سی جہنوں غیرجانبداری دا عنوان دین دی بھونڈی کوشش کیتی گئی اصل وچ عمران خان نوں قومی غیرت تے اڑے رہن‘ عقیدہ ختم نبوت دا پرچار کرن تے اوہدے تے اڑے رہن دی سزا دتی گئی اے۔
ہن آئونے آں دوجے پہلو ول جو عمران خان دی حکومت نوں گران د ا کارن بنیا۔ عمران خان دی نادانی دی وجہ نال قوم نوں ایہ دن دیکھنے پے رہے نیں کہ اوہو پرانے چہرے وزیراعلیٰ تے وزیراعظم بن رہے گئے نیں جے عمران خان وچ تبدیلی دی قوت استعداد موجود نہیں سی تے اوہناں نے قوم دا وقت ضائع کیوں کیتا؟ اک وڈی آبادی والا صوبہ‘ اک سادہ جہی صلاحیت تے لیاقت والے عثمان بزدار دے حوالے کیوں کیتی رکھیا کہ جہناں دی ناقص کارکرگردگی نے ن لیگ دی سابقہ لٹ مار تے پردہ پا دتا تے اوہ شیر بن کے سامنے آ گئے نیں تے عدم اعتماد کروان وچ کامیاب ہو گئے نیں۔ عمران خان نوں ہن یقین کر لینا چاہیدا اے کہ اوہناں دی اہلیت تے صلاحیت اینی اعلیٰ لیول دی نہیں کہ ایس کرپٹ نظام وچ رہندے ہوئے ملک نوں معاشی‘ سیاسی تے آئینی بحراناں چوں کڈھ سکن۔ چڑیاں کھیت چگ چکیاں نیں سپ اگے ودھ چکیا اے ہن سوائے لاٹھی کٹن دے کجھ ہتھ آن والا نہیں۔ ایہ ویلا اے کہ اوہ اشرافیہ دے مفادات دے محافظ نظام توں بغاوت کرن تے نویں عوام پاکستان دوست نظام دی جدوجہد لئی چہرے بدلن تے اپنے وژن نوں لوکاں تے اوہناں دی حالت دے مطابق کرن۔ میں عمران خان دے وژن نوں اک خوبصورت مثال نال واضح کرنا واں۔ اک شادی شدہ جوڑے دے گھر دے سامنے نویں گوانڈھی آئے۔ اوہناں دی کھڑکی چوں نویں گوانڈھیاں دا گھر صاف نظر آندا سی۔ ایہ شادی شدہ جوڑے دی عورت اپنے اپنے گوانڈھیاں دی ہر چھوٹی چھوٹی گل نوں کھڑکی چوں نوٹ کردی تے اپنے شوہر نال شیئر کردی۔ اک دن جدوں اوہ دوویں ناشتہ کر رہے سن تے بیوی نے کھڑکی وچوں ویکھیا کہ سامنے والیاں نے کپڑے دھو کے کھلارے ہوئے نیں۔ ایہ لوک کنے خراب تے گندے کپڑے دھوندے نیں۔ بیوی چائے دا گھٹ لیندے ہوئے اپنے شوہر نوں بولی ذرا صاف کپڑے نہیں دھلے۔ اوہناں دیاں عورتاں نوں کپڑے دھونے ای نہیں آندے۔ اوہناں نوں چاہیدا اے کہ اپنا صابن بدلن‘ یاں گھٹو گھٹ کسے توں سکھ ای لین کہ کپڑے کس طرح دھوئے جاندے نیں۔ شوہر نے نظراں اٹھا کے کھڑکی ول ویکھیا۔ زیرلب مسکرا کے فیر ناشتہ کرن وچ مشغول ہو گیا ایسے طرح ہر واری جدوں وی اوہناں دے گوانڈھی کپڑے دھو کے کھلاردے اوس عورت دے اوہناں دے کپڑیاں تے دھلائی بارے ایہو تاثرات ہوندے۔ اوہ ہمیشہ ای اپنے شوہر دے سامنے اپنے خیالات دا اظہار کردی کہ اج فیر اوہناں لوکاں نے کپڑے چنگے نہیں دھوتے۔ دل کردا اے آپ جا کے اوہناں نوں دس دیواں کہ کس طرح ایہ اپنے کپڑیا ںدی دھلائی بہتر کر سکدے نیں وغیرہ وغیرہ غرض اوہناں دے گوانڈھیاں دا گھر تے اوہناں دے کپڑیا ںدی دھلائی ہمیشہ ای اوس عورت دی تنقید دا نشانہ بنے رہندے۔ اک سویرے جدوں ایہ عورت ناشتے دی میز تے بیٹھی تے گوانڈھیاں دے صاف ستھرے دھوتے ہوئے کپڑے ویکھ کے حیران رہ گئی تے اپنے شوہر نوں بولی ویکھیا‘ آخر اوہناں نے سکھ ای لیا کہ کپڑے کیویں دھوتے جاندے نیں شکر اے کہ اج اوہناں دے کپڑے صاف نیں پر مینوں حیرت اے کہ آخر ایہ عقل اوہناں نوں آئی کیویں؟ فیر شوہر نوں مخاطب کردے ہوئے بولی:
شاید اوہناں نے کپڑے دھون دا طریقہ بدل لیا اے یاں فیر اپنا صابن بدل لیا اے تے چپ ہوندیاں ای اپنے شوہر ولوں جواب طلب نظراں نال ویکھن لگ پئی۔ شوہر جو ناشتہ کرن وچ مصروف سی بیوی دیاں گلاں سن کے مسکراندے ہوئے‘ کھڑکی ول اشارا کردے ہوئے بولیا بیگم اج سویرے میں جلدی اٹھ گیا سی تے میں اوس مٹی گھٹے نال بھری ہوئی کھڑکی نوں چنگی طرح صاف کر دتا سی جتھوں توں سامنے والیاں نوں ویکھدی سی بالکل انج ای ساڈی روزمرہ زندگی وچ وی ہوندا اے۔
ساڈی اپنی کھڑکی صاف نہیں ہوندی تے اسیں دوجیاں تے الزام دھردے رہنے آں۔ اصل مسئلہ آپ ساڈے اندر ہوند ااے پر ساڈا اوس پاسے دھیان ای نہیں ہوندا۔ کسے نوں پرکھن دا ایہ بڑا بہترین طریقہ اے کہ سب توں پہلاں اسیں اپنی کھڑکی نوں ویکھیے‘ کیہ اوہ صاف اے؟ کیوں جے جدوں اسیں کسے نوں ویکھنے آں تے اپنی رائے دا اظہار کرنے آں تے ایس گل دا انحصار اوس کھڑکی یاں ذریعے دی شفافیت تے ہوندا اے جہدے توں اسیں کسے نوں پرکھ رہے ہونے آں۔ ایس لئی عمران خان دی سیاسی عنیک تے ویژن دا شیشہ دھندلا سی اوہ عثمان بزدار توں لے کے جہانگیر ترین‘ علیم خان‘ چوہدری سرور دے اندر جھانک ویکھ ای نہیں سکیا کہ اوہناں دے اندر شفافیت کنی اے؟ عمران نے آپ کہاڑی مار کے اپنی حکومت دے پیر تے کٹے ای نیں پر ملک نوں زخمی زخمی کر دتا اے۔ ہن اگے اگے ہوندا کیہ اے۔٭٭