جی آیاں نوں

عقیل خان

پر بدقسمتی نال مملکت خداداد پاکستان وچ سیاست دا ڈھب ای وکھرا اے۔ پاکستانی سیاسی زندگی وچ قوم نے اوہ کمالات ویکھے جہناں دا کدی سوچیا وی نہیں سی جا سکدا۔ انج ای کجھ 9اپریل نوں ویکھن نوں ملیا۔ ملکی سیاسی تریخ وچ وزارت عظمیٰ دی مدت پوری کرن دا ریکارڈ تے حسب روایت نہ ٹٹ سکیا پر پاکستان وچ پہلی واری وزارت عظمیٰ دے خلاف تحریک عدم اعتماد کامیاب ہو گئی۔ ایس سنسنی خیز کامیابی دے ہر لمحے وچ کدی حزب اقتدار دے چہرے لٹکدے رہے تے کدی حزب اختلاف دے۔ ایس بپھری ہوئی تحریک عدم اعتماد دے نتیجے وچ سادگی‘ کفایت شعاری تے ریاست مدینہ دے داعی وزیراعظم عمران خان نوں اپنی وزارت عظمیٰ توں ہتھ دھونا پیا تے ایس طرح عمران خان عدم اعتماد راہیں ہٹائے جان والے ملک دے پہلے وزیر اعظم بن گئے۔
بدقسمتی نال جس لہجے تے تکبر نال نویں پاکستان دے وزیراعظم‘ وزراء تے مشیر گل کردے سن شاید اوہو اوہناں نوں لے ڈبیا۔ شیخ رشید نے جس طرح عمران خان نوں اسمان تے چڑھایا سی اوہدے توں ہر ذی شعور نوں یقین سی کہ اک نہ اک دن کھجور وچ اٹکائے گا۔ جس وقت وزیراعظم دی اسمانی فلائٹ دی لینڈنگ ہون لگی تے شیخ صاحب نوں یکدم منظر توں غایب ہو گئے۔ جے نویں پاکستان دے قیام تے ذرا جہی روشنی پائی جاوے تے سب کجھ واضح ہو جاوے گا۔ خان صاحب دی حب الوطنی تے جے کوئی شک نہ وی کیتا جاوے پر جس طرح اوہناں نے ماہرین دی ٹیم تیار کیتی تے اوس ٹیم نے کپتان سنے جو گل کھلائے اوہناں تے تھوڑی گل ضروری اے۔ چڑیا چک گئیں کھیت دے مصداق ہن چھیتی طور تے شاید کوئی تلافی ممکن نہیں‘ کیوں جے جو گڈیا گیا اوہو آخر کار کٹیا گیا۔
وزیراعظم بنن توں پہلاں تسیں نویں پاکستان دا جو روشن تے اجلا چہرہ وکھایا اوہدے تے بہت سارے لوک فدا ہو گئے پر افسوس اج تہاڈی کمانڈ تے کنٹرول تے رونا آ رہیا اے۔ تسیں دکھاں دی ماری قوم نوں جو سنہرے خواب وکھائے سن اوہ تسیں اپنے ای ہتھیں چکنا چور کیتے۔ تسیں کسے وی خواب نوں پورا نہ ہون دتا۔ جدوں اقتدار دی ہماسر تے بیٹھی اوس ویلے تقریباً سارا پاکستان تہاڈے نال سی۔ بہت ساریاں سیاسی جماعتاں تہاڈی قیادت وچ روشن پاکستان دی خواہش مند سن کیوں جے دہشت گردی تہاڈے آن توں پہلاں ای دم توڑ چکی سی۔ لوڈشیڈنگ دا جن وی قابو وچ آ چکیا سی۔ کراچی وچ امن و امان قائم ہو چکیا سی۔ ایہناں ثبوتاں نال عالمی سطح تے تہانوں بڑی پذیرائی مل رہی سی۔ بااثر ملک تہاڈی کنڈ تے سن پر ایہ سب کجھ ہون دے باوجود تسیں قوم نوں اوہ سب کجھ نہ دے سکے جہدا وعدہ کیتا گیا سی۔ وزیراعظم و گورنر ہائوس لوکاں لئی وقف کرن‘ پاکستانی‘ تارکین وطن تے دوجے ملکاں دے لوکاں نوں ملازمتاں دین‘ آئی ایم ایف دے اگے جھکن تے قرضہ لین دی تھاں خودکشی کرن‘ کرپشن مٹان‘ چوراں تے لٹیریاں نوں راہ نہ دین ورگے بہت سارے اچے اچے دعویاں وچوں کسے اک دی وی تکمیل نہ ہو سکی۔ تسیں اپنے وعدے دے مطابق مختصر تے قابل کابینہ دے نال اپوزیشن نوں اعتماد وچ لے کے لوکاں دیاں اوکڑاں گھٹ کرکے اوہناں دا معیار زندگی بہتر بنا سکدے سی پر افسوس تسیں اپنی کابینہ دے جم غفیر تے سپورٹراں دے راہیں اپنیاں ساریاں توانائی صرف ایس گل تے لا دتیاں کہ میں اپوزیشن نوں رلاواں گا۔ میں ایہناں نوں تکلیف دیواں گا ایہناں نوں میرے توں تکلیف ہووے گی تے واقعی تسیں پوری یکسوئی نال اپوزیشن دی کردار کشی دے مشن تے رہے۔ تسیں اپنی جماعت دے لوکاں تے کرپشن دے لگے داغ دھون وچ بے بس نظر آئے۔
پر خان صاحب تہاڈے سنہرے دور وچ غریب لوکاں دیاں چیکاں نکل گئیاں۔ آٹا‘ چینی‘ آئل تے میڈیسن مافیا تہاڈی حکومت دی جھولی وچ بہہ کے لوکاں نوں کنگال کردا رہیا پر عمران خان نیازی اک شان بے نیازی نال مخالفین نوں دبوچن وچ مصروف رہیا۔ تسیں لوکاں دے دکھاں دا مداوا کرن دی تھاں ساری ذمہ داری پچھلی حکومتاں تے پا کے مطمئن کرن دی نکام کوشش کردے رہے جس طرح عمران خان نے سنہرے خواب وکھا کے حکومت لئی ایسے طرح ہن اپوزیشن نے عوامی گلاں کر کے اقتدار لیا اے پر ویکھنا اے کہ سارے سیاستدان ماضی توں سبق سکھن گے یاں اوسے چلن نوں برقرار رکھن گے؟۔
امت مسلمہ نے قائداعظم دی قیادت وچ پاکستان رمضان المبارک وچ حاصل کیتا۔ رمضان دیاں مبارک گھڑیاں وچ نویں پاکستان توں واپس پرانے پاکستان وچ آئے آں۔ ہن ویکھنا ایہ وے کہ نویں پاکستان توں نکلن دے بعد حکمران قائد دے پاکستان دے نال کیہ کردے نیں؟ کیہ اوہ ہر چیز پرانی والی سطح تے لیان گے؟ یاں ہر کم نویں پاکستان والا ہووے گا؟ کیہ نویں حکومت پرانے لوکاں نوں پاکستان دیاں پرانیاں قیمتاں پرتا دیوے گی؟ کیہ چینی اک واری فیر 40روپیے‘ پٹرول 80روپیے‘ گھیو 250 روپیے‘ مرغی دا گوشت 150‘ روپیے وڈا گوشت 300 روپیے تے دوجیاں شیواں دیاں پرانیاں قیمتاں بحال ہون گیاں یاں خان صاحب دے خلاف چار گلاں بنا کے اوہو قیمتاں چلدیاں رہن گئیاں؟ ایہ گل ذہن وچ رہوے کہ نہ ایہ نواں پاکستان اے تے نہ ای پرانا‘ سگوں پاکستانیو ایہ قائد دا پاکستان اے تے ایہدی بقاء وچ ای ساڈی بقاء اے۔٭