آئین دی جت

طلعت عباس خان

تن اپریل دی سویرے آئینی بحران اوس ویلے شروع ہویا جدوں عدم اعتماد تحریک تے عمل ہونا سی تحریک نوں نکام بنان لئی حکمران پارٹی نے اڈی چوٹی دا زور لایا پر نہ صرف بری طرح نکام ہوئی سگوں بونتر گئی۔ آپ وی رسوا ہوئی تے ساتھیاں نوں وی رسوا کیتا۔ لگ نہیں سی رہیا کہ عمران خان کدی کھڈاری وی رہیا ہووے۔ عدم اعتماد وچ آپ حصہ نہیں لیا تن اپریل نوں ڈپٹی سپیکر قاسم سوری توں وزیر قنون‘ فواد چوہدری نے بھونڈے طریقے ن ال ایوان دی کاروائی نوں بلڈوز کرایا۔ ڈپٹی سپیکر نے غیرآئینی تے غیرقنونی رولنگ دیندے ہوئے تحریک عدم اعتماد نوں رد کر دتا۔ اوس دن ای چیف جسٹس سپریم کورٹ جسٹس عمر عطابندیال نے شام نوں ایہدے تے سوموٹو لیا۔ اتوار نوں اوسے شام سیاسی پارٹیاں نے وی پٹیشن دائر کر دتی جہدے تے پنج رکنی لارجر بنچ چیف جسٹس دی سربراہی وچ ساری پٹیشن پنج دن تک سن دے رہے۔ ست اپریل رات ساڑھے اٹھ پنج ججاں دا سانجھا فیصلہ اٹھ صفحیاں دے شارٹ آڈر دی شکل وچ آیا۔ حکم دے مطابق اسمبلی دا اجلاس بلان لئی 9اپریل سویرے ساڑھ دس وجے دا ویلا متھیا سی۔ متھے ویلے تے اجلاس تے شروع ہویا پر حکومتی وزراء سوچ کے آئے سن کہ نہ کھیڈاں گے تے نہ کھیڈن دیاں گے ایس لئی رائے شماری کران دی تھاں تقریراں دا سلسلہ شروع کر دتا گیا۔ سپیکر اسدقیصر جان بجھ کے وقفہ لیندے رہے تے کیہا مینوں آئین دی پرواہ نہیں مینوں عمران خاں دی دوستی پیاری اے۔ فیر مجبور ہو کے سپیکر نوں آپ ای مستعفی ہونا پیا۔ اوس ویلے رات دے باراں وجن والے سن۔ اسدقیصر نے ایازصادق نوں بطور سپیکر اسمبلی دا چارج دتا۔ جہدے تے ایوان وچ نو آف نو کنفیڈنس دی کاروائی شروع ہوئی۔ ٹھیک باراں وجے دو منٹ دا وقفہ لیا گیا۔ باراں وج کے دو منٹ تے ایوان دی فیر توں کاروائی شروع ہوئی۔ تلاوت تے نعت پڑھی گئی۔ قومی ترانہ ہویا ایہدے بعد تحریک عدم اعتماد تے فیر توں کاروائی شروع ہوئی۔ رات باراں وج کے پنجاہ منٹ تے کاروائی مکمل ہوئی۔ اک وجے رزلٹ دا اعلان کیتا کہ اپوزیشن نے ایس موقعے تے 174 ووٹ تحریک اعتماد دے حق وچ کاسٹ ہوئے۔ میاں شہبازشریف نے تاڑیاں دی گونج وچ خطاب کیتا۔ حکومتی ممبراں وچ صرف علی احمد خان نے ای تقریر کیتی۔ چنگا لگا‘ ساریاں نے بڑے دل نال اوہناں نوں سنیا۔ ہار جت کھیڈ تے سیاست دا حصہ ہوندی اے پر جس برے انداز نال کپتان نے عدم اعتماد دی کاروائی وچ حصہ لیا سوائے جماعت نوں شرمندگی دے کجھ نہیں دتا۔ایس موقعے تے پی ٹی آئی دے بھکانے چوں ہوا نکلدے ساریاں نے ویکھی۔ اک پاسے ایہ اسمبلی نوں تماشا بنا رہے سن تے دوجے پاسے کہیا جاندا اے ایہ بنی گالا وچ اہم ترین پوسٹنگ وچ لگے رہے۔ رات دس وجے سپریم کورٹ تے اسلام آباد ہائیکورٹ دے بوہے کھل گئے۔ ایہ بوہے وی حکومت دی نالائقی دی وجہ نال کھلے جے دن نوں ای تعاون کردے تے ایہ عزت نال ہار من کے گھر جاندے پر‘ مرزا غالب یاد آ گئے:
نکلنا خلد سے آدم کا سنتے آئے تھے لیکن
بڑے بے آبرو ہو کر تیرے کوچے سے ہم نکلے
اپنے ای پارٹی ورکراں دے خلاف سپریم کورٹ وچ اک پٹیشن وی دائر کر دتی۔

ایہ بوہے وی حکومت دی نالائقی دی وجہ نال کھلے جے دن نوں ای تعاون کردے تے ایہ عزت نال ہار من کے گھر جاندے پر‘ مرزا غالب یاد آ گئے:
نکلنا خلد سے آدم کا سنتے آئے تھے لیکن
بڑے بے آبرو ہو کر تیرے کوچے سے ہم نکلے
اپنے ای پارٹی ورکراں دے خلاف سپریم کورٹ وچ اک پٹیشن وی دائر کر دتی کہ ممبر اسمبلی ڈر کے پارٹی وچ واپس آ جان۔
کجھ ممبراں دے خلاف مار دھاڑ دی کاروائی وی کیتی گئی۔ اوہناں دے ایس رویے نال اوہناں دی جماعت دے ممبراں نے تنگ آ کے اپوزیشن جماعتاں وچ جانا شروع کیتا۔ اپنی ہار ویکھدے ہوئے سرکاری جلسے کردے رہے۔ روز قوم نال خطاب کردے۔ ہیلی کاپٹر تے جاندے آندے رہے۔ سوائے قوم دا پیسہ ضائع کرن دے کجھ نہ کر سکے۔ عمران خان اوہ کھڈاری نکلیا جو بچپن وچ بانٹے‘ اخروٹ کھیڈدا سی۔ جدوں ایہ ہار جاندا تے ایہ زمین تے بنائی گئی گھدی پانی نال بھر دیندا سی۔ چیف جسٹس عمر عطابندیال دی ویلے سر کاروائی نال جمہوریت دی گڈی کسے حادثے دا شکار ہون توں مساں بچی۔ ایہدے وچ ساریاں جماعتاں دی انتھک محنت شامل اے۔ ایہناں وچ پیپلزپارٹی دے آصف علی زرداری‘ بلاول بھٹو‘ سردار لطیف خان کھوسہ‘ نیئر حسین بخاری ، شہباز لطیف کھوسہ ،سینٹر مصطفی نواز کھوکھر، ن لیگ کے شاہد خاقان عباسی، احسن اقبال، ڈاکٹر طارق فضل چوہدری سابق ایم این اے انجم عقیل خان آف گولڑا نے تے دعاواں لئی لنگر کھولی رکھیا۔ سینیٹر نذیر تارڑ‘ صدر سپریم کورٹ بار احسن بھون تے سینیٹر کامران مرتضیٰ نے اہم رول ادا کیتا۔ چیف جسٹس آف پاکستان جسٹس عمرعطا بندیال دی سربراہی وچ عدلیہ نے تریخی فیصلہ دے کے چار چن لا ئے‘ چنگی شہرت پائی۔ لارجر بنچ دے ایس فیصلے نال عام شہری نوں تحفظ ملیا اے۔ خان صاحب نے قوم نال خطاب وچ کہیا کہ اوہ سپریم کورٹ دے فیصلے توں مایوس ہوئے۔ میرے خط دا ایس فیصلے وچ کدھرے ذکر نہیں کیتا۔ جد کہ میرے خلاف امریکہ نے سازش کیتی اے۔ معصوم لوکاں نوں کاش ایہ وی دس دیندے کہ مینوں سیاست وچ کون لیایا سی۔ میں تے کرکٹ توں ریٹائر ہو چکیا سی۔ مینوں کنہے دوبارہ کپتان بنایا تے کرکٹ ورلڈ کپ جتوایا۔ ایہ اوہناں دا ناں وی دس دیندے جہناں نے اوہناں نوں طاہرالقادری دے نال دھرنیاں تے بٹھایا سی۔ اوہ کون سن جہناں نے وزیراعظم میاں نوازشریف نوں پاناما کیس چوں قامہ دے ناں تے کڈھیا سی اوس ویلے تہانوں سازش وکھائی نہ دتی۔ کاش سوچدے کہ جو کم میرے توں ایہ لے رہے نیں کل ایہو لوک مینوں وی اوسے طرح باہر کڈھن گے۔ تسیں ڈاکٹر قدیر خان دی نماز جنازہ وچ شرکت نہ کیتی۔ کہندے نیں تہاڈا خط اک ڈرامہ اے۔ تسیں ایس قابل ای نہیں سی کہ حکمران بن دے۔ محسن بھوپالی وی یاد آ گئے:
جاہل کو اگر جہل پہ انعام دیا جائے
اس حادثہ وقت کو کیا نام دیا جائے
مے خانے کی تو ہیں ہے یہ رندوں کی ہے ہتک
کم ظرف کے ہاتھوں اگر جام دیا جائے
جو کجھ خان صاحب نال ہویا ایہو ساریاں نوں امید سی پتہ نہیں تہانوں کیوں امید نہیں سی۔ جس حال وچ اج تسیں او ایہ امریکہ دی سازش نہیں غریباں دیاں بددعاواں دا نتیجہ اے جہناں تے تسیں مہنگائی دے بمب برساندے رہے تے آپ پارٹی جلسیاں وچ سرکاری ہیلی کاپٹر تے جاندے آندے رہے۔ موجودہ حالات وچ کون خوش قسمت اے تے کون نہیں۔ بقول بابا کرمو دے ایہ اجے تصویر دا اک ٹکڑا ملیا اے ایہدی کسے دے کول مکمل فوٹو نہیں۔ ٹکڑے نوں اسیں مکمل فوٹو کیوں سمجھ لینے آں جد کہ ایہدے وچ اجے رنگ بھرنے باقی نیں انتظار کرنا ہووے گا‘ دعا کرنی ہووے گی۔٭٭