جدید صحافت دے امام ضیا شاہد دی پہلی برسی دا اِکٹھ

ہر وڈے بندے دے پچھے اک زنانی دا ہتھ ہوندا اے تے ضیا شاہد ہوراں پچھے میری دادی تے میری والدہ دا ہتھ سی،اِکٹھ اندر امتنان شاہد دی گل بات

ارشاد شیخ

پنجابی یونین دے پربندھ ہیٹھ پنجاب ہائوس وچ جید صحافی و قلم کار ضیا شاہد دی پہلی برسی دے موقعے اُتے ’’ضیا شاہد دِیاں یاداں‘‘ دے سرناویں نال اک پروقار تقریب دا پربندھ کیتا گیا۔ تقریب دی صدارت منے پرمنے صحافی تے کالم نگار خوشنود علی خاںہوراں کیتی۔ اُچیچے پروہنیاں وچ ضیا شاہد دے صاحبزادے امتنان شاہد‘منے پرمنے کالم نگار تے گروپ ایڈیٹر روزنامہ پاکستان ایثار رانا، منے پرمنے صحافی تے دانشورقاضی طارق عزیز، سینئر صحافی زاہد گوگی تے سیرت سکالر ڈاکٹر طارق شیریف زادہ سن۔ تقریب دی میزبانی پنجابی یونین دے چیئر مین مدثر اقبال بٹ تے وائس چیئرمین بلال مدثر بٹ نے کیتی۔ تقریب دا باقاعدہ آغاز تلاوت کلام پاک نال ہویا ۔تلاوت مدثر اقبال بٹ نے کیتی۔ نعت شریف پڑھن دا شرف عثمان منیر قادری نے حاصل کیتا۔عارفانہ کلام تیمور افغانی تے ندیم اقبال باہو نے پیش کیتا۔ تقریب نال خطاب کردے ہوئے پنجابی میڈیا گروپ دے صدر ندیم رضا نے آکھیا جے پنجابی ادب وچوں وارث شاہؒ نوں کڈ دتا جاوے تے باقی بہت گھٹ بچدا اے۔ ایسے طرح صحافت وچوں ضیا شاہد نوں کڈ دتا جاوے تے صحافت وچ کجھ نہیں بچدا۔ اج دی صحافت دا مُڈھ ضیا شاہد نے بَنھیا۔ اوہناں نے عام بندے دی آواز چکی لیکن عامیانہ زبان استعمال کیتی۔ مینوں ضیا شاہد جئے استاد دے نال کم کرن دا موقع نہیں ملیا لیکن ایثار رانا تے زاہد گوگی دے ذریعے اوہناں نوں جانیا ضرور اے۔ اوہناں نے آکھیا کہ خبریں ضیا شاہد دا جنون سی تے پنجاب ہائوس مدثر اقبال بٹ دا جنون اے۔ پنجاب ہائوس وچ پنجابی دی وکھو وکھ جہتاں اتے کم کیتا جا رہیا اے۔ ایتھے بابا فرید لائبریری اے تے ای لائبریری تکمیل دے آخری مرحلے وچ اے۔ بابا گورونانک آڈیٹوریم اے تے سٹوڈیو اے۔ ایتھے پنجابی اتے تحقیق کرن والیاں نوں ہر طرح دی معاونت فراہم کیتی جاندی۔ ایتھوں تک کہ اوہناں دی معالی معاونت وی کیتی جاندی اے۔ سب توں وڈی گل اے کہ پنجاب ہائوس دے سارے منصوبے اپنی مدد آپ دے تحت چل رہے نیں۔ اوہناں لئی کسے توں کوئی مالی معاونت نہیں لیتی جاندی۔ اوہناں نے آکھیا کہ ضیا شاہد جس طرح ڈُب کے لکھدے سن پڑھن والے وی پڑھدے پڑھدے اوسے طرح اوہناں دی تحریراں وچ ڈب جاندے سن، اوہ پڑھن والے نوں روان تے ہسان دا فن خوب جاندے سن۔

زاہد گوگی نے آکھیا کہ پہلے مینوں راوین ہون اتے فخر سی۔ اج مینوں خبریں وچ کم کرن اتے فخر محسوس ہوندا اے۔ میں ضیا شاہد نوں انتہائی مہربان تے محبت کرن والا پایا اے اوہناں دی سختی اک استاد دی سختی سی جہڑی اپنے شاگرد نوں کسے مقام اتے پہنچان لئی ہوندی اے۔ اعظم توقیر نے آکھیا کہ خبریں اک یونیورسٹی اے جتھوں سِکھن والے نوں سارے معتبر سمجھدے نیں تے اوہناں نوں انٹرویو دے بغیر ای نوکری اتے رکھ لیندے نیں۔
قاضی طارق عزیز نے آکھیا کہ ضیا شاہد ایسے غریب دی آواز سن جہناں دا استحصال سیاستدان‘ سرمایہ دار گو کہ ہر طاقتور کر رہیا سی۔ ضیا شاہد قلم دی حرمت دے پاسبان سن۔ میں اوہناں دی محبتاں دا مقروض آں۔ جے خبریں نوں کدی میری لوڑ پئی تے میں اوہدے کم لئی تیار آں پچھے نہیں ہٹاں گا۔
ایثار رانا نے آکھیا کہ ضیا شاہد نال میرا جہڑا تعلق اے اوہنوں لفظاں وچ بیان نہیں کر سکدا۔ میں اخبار فروش سی۔ غربت وچ اکھ کھولی سی۔ میرے جئے غربت توں خوفزدہ بندے نوں اوہناں نے نکھاریا تے اک اخبار دا ایڈیٹر بنایا۔ ضیا شاہد دے لکھاں شاگرد نیں لیکن جدوں اوہناں دے نمبر ون شاگر ددی گل ہووے گی تے اوہدے وچ میرا ناں ای آوے گا۔ ضیا شاہد دے میرے اتے بہت قرض نیں۔ مالی ای مقروض نہیں میری روح وی اوہناں دی مقروض اے۔ میں اوہناں دا قرض کدی ادا نہیں کر سکدا۔ صحافت وچ اپنا وجود برقرار رکھن لئی مینوں بہت مشکلاں دا سامنا کرنا پیا۔ جے ضیا شاہد دی سرپرستی نہ ہوندی تے میں کامیاب نہیں ہو سکدا سی۔ میں ضیا شاہد نوں ورکرز دے درد نوں محسوس کردے تے روندے ہوئے وی ویکھیا اے۔ ضیا شاہد نوں سمجھنا تے اوہناں نوں بیان کرنا آسان نہیں اے۔ اوہناں نے آکھیا کہ خوشنود علی خان دی سخت سکروٹنی نے وی میری پیشہ وارانہ صلاحیتاں نوں نکھاریا اے۔ ضیا شاہد تے خوشنود علی خان دے اشتراک نے خبریں بنایا اے۔
سیرت فائونڈیشن دے چیئرمین ڈاکٹر طارق شریف زادہ نے آکھیا کہ میں ضیا شاہد وچ حب رسولؐ نوں پایا اے اوہ آپؐ طائف دا ذکر سن کے آبدیدہ ہو جاندے سن۔ اوہ اینی مصروفیات دے باوجود کتاباں دا مطالعہ ضرور کردے سن۔ ایس موقع تے اوہناں نے ضیا شاہد دے ایصال ثواب لئی دعا وی کرائی۔ منے پرمنے صحافی تے کالم نگار خوشنودعلی خان نے آکھیا کہ ضیا شاہد نوں سارے جاندے نیں لیکن ضیا محمد بہاولنگر ی نوں کوئی کوئی جاندا اے جہڑا خیر المدارس ملتان توں پڑھیا سی۔ ایسے وجہ نال اوہناں وچ حب رسولؐ اوہناں دے اندر سی۔ اوہناں نے آکھیا کہ میں 103عمرے تے پنج حج کیتے نیں۔اوہناں وچ وی ضیا شاہد دا حصہ اے پاکستان دی کہانی وی بڑی عجیب اے۔ جے پاکستان نہ نکلدا تے خبریں وی نہ نکلدا۔ جدوں روزنامہ پاکستان دی اشاعت شروع ہوئی سی میرا تے ضیا شاہد دا استعفیٰ اکبر بھٹی دے کول سی۔ اسیں طے کر لیتا سی کہ پہلے روزنامہ پاکستان نوں کامیاب بناواں گے اوہدے مگروں کجھ ہور سوچاں گے۔ اوہناں نے آکھیا کہ عمران خان وی ضیا شاہد دی پراڈکٹ اے۔ اوہو اوہناں نوں سیاست وچ لیائے سن۔ اوہناں نے آکھیا کہ عراق دی جنگ دے موقعے تے ضیا شاہد اوس ویلے دے حکمران دے نال جہاز وچ بیٹھے سن کہ اوس حکمران نے اوہناں نوں جہاز توں سُٹن تک دی دھمکی لا دتی سی۔ روزنامہ جنگ نوں جنگ بنان وچ ضیا شاہد دا اہم کردار اے۔
میزبان پنجابی یونین دے چیئرمین مدثر اقبال بٹ نے سٹیج سیکرٹری دے فرائض نبھاندے ہوئے آکھیا کہ ضیا شاہد نال میری رفاقت 30سال اتے محیط اے۔ میں اوہناں توں وڈا صحافی نہیں ویکھیا جہنے تھلڑے لیول توں شروع کر کے خبریں جیا وڈا ادارہ بنا دتا۔ صحافت دی دنیا وچ اوہناںنے جہڑا کم کیتا ساڈا فرض بندا اے کہ اسیں اوہناں دے ایس کم نوں دوجیاں تک وی پہنچائیے تے اوہناں نوں خراج تحسین پیش کریے۔ الیکٹرانک تے پرنٹ میڈیا اتے ضیا شاہد دی مختلف جہتاں اتے کم ہونا چاہیدا اے۔ پنجابی میڈیا گروپ دے صدر ندیم رضا ایس حوالے نال اک ڈاکیومنٹری بنا رہے نیں جہدے وچ ضیا شاہد دی زندگی دے مختلف پہلوواں اتے چانن پایا گیا اے۔ اوہناں نے آکھیا کہ ضیا شاہد نے پنجابی دا اخبار خبراں کڈیا سی۔ میں اوہناں دے جانشیناں نوں آکھنا واں کہ اوہ دوبارہ توں اوہدی اشاعت شروع کرن۔ اوہدے لئی جہنی معاونت چاہیدی اے بھلیکھا اخبار دی پوری ٹیم اوہناں دی معاونت لئی موجود اے۔ ضیا شاہد دے صاحبزادے امتنان شاہد نے آکھیا کہ ہر وڈے بندے دے پچھے اک زنانی دا ہتھ ہوندا اے۔ ضیا شاہد دے پچھے میری دادی تے میری والدہ دا ہتھ سی۔ اوہناں نے آکھیا کہ ضیا شاہد اکثر خوشنود علی خان دے حوالے نال آکھیا کردے سن کہ پورے پاکستان وچوں اوہناں توں چنگا کوئی رپورٹر نہیں اے۔ اوہناں نے آکھیا کہ مینوں یاد اے کہ نواز شریف اپنی ایف ایکس اتے ساڈے شادمان والے گھر ضیا شاہد نال ملن آندے سن۔ ضیا شاہد اختلاف رائے نوں پسند کردے سن۔ مینوں اوہناں دا سب توں بوہتا سامنا ہوندا سی۔ دفتر مگروں گھر وچ وی اوہناں دا سامنا کرنا پیندا سی۔ میں اوہناں نوں پاکستان دی موجودہ صورتحال اتے آخری وقت وچ وی پریشان ویکھیا اے۔ اوہناں نے مدثر اقبال بٹ نوں مخاطب کر کے آکھیا کہ اسیں عیدالاضحی مگروں پنجابی دا اخبار روزنامہ خبراں دی اشاعت شروع کر دیاں گے۔ میزبان مدثر اقبال بٹ نے تقریب دے اختتام تے رلتیاں دا شکریہ ادا کیتا۔