وطن دی ماں۔۔۔ محترمہ بلقیس ایدھی

ماں ہوراں عبدالستار ایدھی ہوراں نال رَل کے انسانیت دی خدمت دے او باب رقم کیتے نیں جیہڑے تا قیامت یاد رکھے جان گے

روہیل اکبر

عظیم لوک اوہ ہوندے نیں جہڑے درد دے صحراواں وچ بیٹھ کے لوکاں نوں بہار دی خبر دیندے نیں۔ اپنا دُکھ بھل کے لوکاں دے سکھ لئی نکل پیندے نیں۔ ایسے لوک ہر معاشرے وچ موجود ہوندے نیں مگر اسیںلوک اوہناں دی قدر نہیں کردے۔ جدوں اوہ دنیا توں رخصت ہو جاندے نیں تے فیر اسیں اوہناں نوں یاد وی کرنے آں تے اوہناں جئے افراد نوں لبھن دی کوشش وی کرنے آں ۔ ایسے افراد دنیا جہاں توں بے فکر ہو کے انسانیت دی خدمت وچ مصروف رہندے نیں۔ بہت عرصہ پہلے لہور دے دل مال روڈ اتے ریگل چوک وچ فٹ پاتھ اتے اک بندا کپڑا وچھائے چندہ اکٹھا کر رہیا سی تے لوک گزردے ہوئے اوہدی جھولی وچ پیسے پا رہے سن۔ میں وی گزردے گزردے رک گیا۔ ویکھیا تے جناب عبدالستار ایدھی صاحب کسے مستحق طالبعلم دے علاج لئی پیسے جمع کر رہے سن اوتھے اوہناں نال ڈھیراں گلاں کیتیاں۔ اوہ ایس صدی دے عظیم تے خوبصورت انسان سن جنہاں نے بہت مشکلات تے پریشانیاں نوں شکست دے کے پاکستان دی دکھی تے مجبورعوام دی خدمت دا بیڑا چکیا سی۔ آکھدے نیں کہ ہر کامیاب مرد دے پچھے اک زنانی دا ہتھ ہوندا اے۔ اوہ ماں‘ بھین تے بیوی دے نال نال دھی وی ہو سکدی اے۔ ساڈے معاشرے وچ ایس قسم دی زندہ مثال ممتاز سماجی رہناتے ایدھی فائونڈیشن دے بانی عبدالستار ایدھی نیں جنہاں نے اپنی شریک حیات دے نال رل کے دنیا دی سب توں وڈی ایمبولینس سروس بنا کے لاتعدادبندیاں دی زندگیاں بچائیاں ۔ جے عبدالستار ایدھی دے نال اوہناں دی اہلیہ محترمہ بلقیس بانو ایدھی صاحبہ نہ ہوندیاں تے شاید اج اسیں اوہناں دی خدمات توں محروم رہندے بے سہارا بالاں نوں سہارا دین والی عظیم خاتون محترمہ بلقیس ایدھی صاحبہ 74 سال دی عمر وچ پچھلے دناں انتقال کر گئیاں۔ اوہناں دا جنم وی پاکستان دے قیام دے نال ای ہویا سی۔ 14 اگست 1947 نوں بھارتی ریاست گجرات دے شہر بانٹوا وچ پیدا ہوئیاں تے فیر فیملی دے نال ہجرت کر کے کراچی آوَسیاں۔ عبدالستار ایدھی نال اوہناں دا ویاہ 1966 وچ ہویا تے 50سالہ رفاقت 2016 وچ ایدھی صاحب دے انتقال تک جاری رہی۔ محترمہ بلقیس ایدھی صاحبہ عبدالستار ایدھی دی بیوہ‘ اک نرس تے پاکستان وچ سب توں ودھ فعال مخیر حضرات وچوں اک سن جہڑی عبدالستار ایدھی دے شانہ بشانہ ہمیشہ کھڑی رہیاں۔ دکھی انسانیت دے غم دور کرن لئی دونویں زندگی بھر کوشش کردے رہے جہدی کدھرے نظیر نہیں ملدی۔ محترمہ بلقیس بانو ایدھی صاحبہ دے جان نال انسانی خدمت دے جذبے دا اک اہم ترین باب بند ہو گیا جہدی تلافی ممکن نہیں اے۔ پوری پاکستانی قوم ہمیشہ مرحوم عبدالستار ایدھی تے اوہناں دی اہلیہ بلقیس بانو ایدھی دی شکرگزار تے احسان مند رہوے گی۔ محترمہ بلقیس بانو ایدھی صاحبہ جہڑی نہ صرف کراچی بلکہ پاکستان بھر دے یتیماں ‘مسکیناں تے غریباں دی ماں سن جدوں اپنے جنم دین والے ای اپنے لخت جگر نوں کوڑا دان وچ مرن لئی چھڈ کے چلے جاندے نیں تے اوس ویلے ایہو خاتون اوہناں نوںگلے لاکے ماں دا پیار دتا کردیاں سن۔ اوہ ساڈے معاشرے وچ اسلام دا حقیقی چہرہ سن جہدا درس ساڈے نبی کریمؐ نے اج توں 14 سو سال پہلے دتا سی۔ بے سہارا یتیم بالاں دی پرورش توں لے کے بے گھر کڑیاں دے ویاواں تک بلقیس ایدھی دی خدمات ناقابل فراموش نیں۔ بلقیس ایدھی نے جھولا پراجیکٹ دے ذریعے ہزاراں انسانی زندگیاں نوں بچایا۔ اَدھی صدی توں انسانیت دی خدمت دے مشن اتے گامزن بلقیس ایدھی دا کردار ساڈے ساریاں لئی مشعل راہ اے۔ اوہناں دی انسانیت لئی خدمات نوں تادیر یاد رکھیا جاوے گا۔ محترمہ بلقیس بانو ایدھی صاحبہ نے مرحوم عبدالستار ایدھی دے مشن نوں احسن طریقے نال اگے ودھایا۔ محترمہ بلقیس بانو ایدھی صاحبہ دی عرفیت مادر پاکستان اے۔ اوہ بلقیس ایدھی فائونڈیشن دی سربراہ تے پاکستان دی سب توں وڈی سماجی تنظیم ایدھی فائونڈیشن دی چیئرپرسن وی سن۔ اپنے شوہر دے نال اوہناں نے خدمات عامہ لئی 1986 رومن میکسیسی عزاز حاصل کیتا۔ حکومت پاکستان نے اوہناں نوں اوہناں دی خدمات اتے ہلال امتیاز نال نوازیا جد کہ بھارتی کڑی گیتا دی دیکھ بھال کرن اتے بھارت نے اوہناں نوں 2015وچ مدر ٹریسا ایوارڈ نال نوازیا سی۔ روسی حکومت ولوںوی لینن پیس پرائز وی ملیا۔ محترمہ بلقیس ایدھی صاحبہ۔ مرحومہ نے دُلہا پروجیکٹ دے ذریعے ہزاراں انسانی زندگیاں نوں بچایا۔ادھی صدی توں انسانیت دی خدمات دے مشن اتے گامزن بلقیس ایدھی پاکستان دی پہچان سن تے زنانیاں لئی اک مشعل راہ اے جنہاں نے اپنے شوہر عبدالستار ایدھی دے نال ساری عمر دھی انسانیت دی خدمت کیتی۔ محترمہ بلقیس ایدھی صلہ رحمی تے انسانیت دا غیر معمولی استعارہ سن۔ ملک و قوم دے نال دکھی انسانیت دی خدمت نوں مقصد حیات بنان والی شخصیت دے انتقال اتے قوم سوگوار اے۔ ایدھی خاندان نے انسانیت دی خدمت دا حق ادا کردتا۔ ایہہ خاندان پاکستان دا طرہ امتیاز جد کہ پاکستانیاں لئی سرمایہ افتخار اے۔ اوہناں دی جہد مسلسل تے قربانیاں نوں فراموش نہیں کیتا جا سکدا۔ اوہناں دے انتقال مگروں نہ صرف پاکستان وچ بلکہ دنیا بھر وچ دعائیہ تقریباں ہوئیاں۔ لہور وچ وی ایدھی فائونڈیشن دے پربندھ ہیٹھ اوہناں دی یاد وچ زونل منیجر یونس بھٹی نے خوبصورت یاداں اتے مشتمل انمٹ پروگرام ترتیب دتا۔دعا اے اللہ رب العزت عبدالستار ایدھی تے بلقیس بانو ایدھی دی مغفرت‘ بخشش ‘ اوہناں دے درجات دی بلندی تے اوہناں نوں جنت الفردوس وچ اعلیٰ مقام عطا فرماوے۔ آمین۔ اوہناںنے سوگواراں وچ فیصل ایدھی‘ کبریٰ ایدھی‘ کتب ایدھی تے الماس ایدھی نوں چھڈیا اے۔