نویں حکومت تے انتخابی اصلاحات

اوورسیز پاکستانیاں نوں ووٹ دا حق دِتا جانا اک ودھیا قدم اے

تحریر۔امبرین راحیل

جدوں توں متحدہ اپوزیشن برسراقتدار آئی اے اوہدوں توں اوہ اوورسیز پاکستانیاں دے ووٹاں دے پچھے ہتھ دھو کے پئی ہوئی اے۔ اوہ ایس حق نوں ہر صورت ختم کرنا چاہندی اے۔میں آپ چونکہ باہر رہ کے آئی آں تے میرا خاوند اجے وی پاکستان توں باہر وںملک لئی زرمبادلہ کما رہیا اے تے ایہناں پاکستانیاں توں ودھ محب وطن وی کوئی نہیں ہے۔ باہر رہ کے پاکستان دی محبت انسان اپنے انگ انگ وچ محسوس کردا اے۔ پچھلے وزیراعظم عمران خان نے اوہناں نوں ووٹ دا جہڑا حق دتا سی موجودہ وزیراعظم میاں شہباز شریف‘ بلاول بھٹو زرداری تے مستقبل دے بہت سارے ترجمان ایس گل اتے متفق نیں عمران خان دور دی انتخابی اصلاحات نوں فی الفور ختم کیتا جاوے۔ جدوں پاکستان تحریک انصاف نے 2018وچ اپنا انتخابی منشور پیش کیتا سی تے جہدے وچ آکھیا گیا کہ جے پی ٹی آئی حکومت بنان وچ کامیاب ہوندی اے تے بیرون ملک پاکستانیاں نوں ووٹ دا حق دتا جاوے گا۔ ایہہ اک ایسا وعدہ سی جہڑا بظاہر تے شاندار نظر آ رہیا سی لیکن اوہدی تکمیل دے سلسلے وچ کئی مشکلاں موجود سن کیوں جے نہ تے دوجی سیاسی جماعتاں بیرون ملک پاکستانیاں نوںووٹ دا حق دینا چاہندیاں سن تے نہ ای بقیہ سٹیک ہولڈڑز ایسا کرن وچ کوئی دلچسپی رکھدے سن۔ ایس قنون وچ ترمیم لیانا اوکھا لگ رہیا سی جد کہ ایس وعدہ توں پہلاں اک وڈی مشکل موجود سی کہ 1970 دے انتخابات دے علاوہ ایسا کوئی الیکشن نہیں گزریا جہڑا متنازع نہ ہویا ہووے۔ انتخابات وچ بدنظمی‘ بے ضابطگی تے دھاندلی معمول دا حصہ بن چکی سی۔طاقتور لوگ الیکشن نوں مینج کر لیندے سن تے ہارن والی پارٹیاں الیکشن نتائج منن توںانکار کردیندیاں سن۔ 2018 دے انتخابات وچ آر ٹی ایس دی نکامی یا اپوزیشن دا دھاندلی دا راگ وی ایسے سلسلے دی اک کڑی اے۔ خود تحریک انصاف نے 2013وچ جہڑی صورتحال دا سامنا کیتا اوہدی مثال ساڈے سامنے موجود اے۔ ایہدے وچ پاکستان تحریک انصاف لئی ایہہ ضروری سی کہ حکومت وچ ہوندے ہوئے انتخابی اصلاحات اتے کم کرے تے انتخابات نوں شفاف بنان دے طریق کار اتے عمل کیتا جاوے۔
پاکستان تحریک انصاف نے اقتدار وچ آن مگروں فوری طور تے انتخابی اصلاحات اتے کم شروع کیتا تے الیکشن وچ مینول ووٹنگ دے بجائے الیکٹرونک ووٹنگ مشین دی تجویز دتی جہنوں دوجی سیاسی جماعتاں نے سرے توں ای رد کردتا تے بجائے ایہدے کہ کوئی قابل قبول اعتراض سامنے لیایا جاندا‘ اپوزیشن نے دھاندلی دھاندلی دی رٹ لانا شروع کردتی۔ حکومت نے اپوزیشن نوں ایس معاملے اتے اعتماد وچ لین دی بھرویں کوشش وی کیتی لیکن اپوزیشن دا اصل مسئلہ کجھ ہور اے کیوں جے نہ تے اپوزیشن شفاف انتخابات چاہندی اے تے نہ ای بیرون ملک پاکستانیاں نوں ووٹ دا حق دینا چاہندی اے۔ وزیر خارجہ شاہ محمود قریشی نے صحیح
آکھیا سی کہ اپوزیشن نوں بیرون ملک پاکستانیاں دا پیسہ تے قبول اے مگر ووٹ نہیں۔ ایہو وجہ سی کہ پاکستان تحریک انصاف نے عمران خان دی قیادت وچ اوہناں ساری مشکلاں دے باوجود بیرون ملک پاکستانیاں نوں ووٹ دا حق دین تے انتخابات نوں شفاف بنان دا وعدہ پورا کیتا اے۔ پارلیمنٹ دے مشترکہ اجلاس وچ اپوزیشن دی ہنگامہ آرائی دے باوجود انتخابی ترمیمی بل سنے 33بل منظور کروا لئے نیں۔ ایس بل دے تحت دو ترمیماں کیتی گئیاں نیں۔ اک تے بیرون ملک پاکستانیاں نوں انٹرنیٹ دے ذریعے ووٹ دا حق دین تے دُوجا انتخابات وچ رائے شماری لئی الیکٹرونک ووٹنگ مشین دا استعمال شامل اے۔ بلاشبہ ایہہ پاکستان تحریک انصاف دی ہن تک سب توں وڈی کامیابی سی۔ پارلیمان دے مشترکہ اجلاس وچ ایس بل پیش کرن دی تحریک دے حق وچ 221ووٹ جد کہ ایہدی مخالفت وچ اپوزیشن د ے203 ارکان نے ووٹ دتا اے جہدے مگروں بل نوں منظور کر لیا گیا۔ ایس بل دے منظور ہون نال بیرون ملک مقیم نوے لکھ پاکستانیاں نوں ووٹ دا حق حاصل ہووے گا۔ بیرون ملک پاکستانیاں نوں اپنے ملک نال جوڑن لئی اوہناں نوں ووٹ دا حق دتا گیا سی۔ عمران خان نے دوجے وعدیاں وانگوں اپنا ایہہ وعدہ وی پورا کردتا سی۔ عمران خان پاکستان نوں ایس رستے اتے لے جان لئی گامزن نیں جتھے پاکستانیاں نوں شفاف رائے شماری دا حق حاصل ہووے۔دو نہیں اک پاکستان دا نعرہ جہڑا عمران خان نے لایا سی اوہدی بنیاد وی رکھ دتی گئی۔ ہن کوئی چور‘ مافیا الیکشن نہ تے مینج کر سکے گا تے نہ ای اپنی مرضی دے مطابق انتخابی نتائج نوں بدل سکے گا۔ دنیا ٹیکنالوجی دے اوج کمال نوں چھو رہی اے۔ ایہو ممکن حل سی کہ پاکستان وچ انتخابات نوںجدید ٹیکنالوجی دی مدد نال ممکن بنایا جا سکے تے پچھلے وزیراعظم عمران خان نے ایہنوں ممکن بنا کے وکھا دتا۔ ہن موجودہ حکومت ایہناں انتخابی اصلاحات نوں ختم کرنا چاہندی اے جہنوں کوئی وی محب وطن پاکستانی قبول نہیں کرے گا۔