جادوٹونے والی سرکار دا خاتمہ

تنویر ظہور

دس اپریل نوں آخر کار جادو ٹونے والی سرکار عمران خان دی حکمرانی دا خاتمہ ہو گیا۔ مولانا فضل الرحمن دا کہنا سی کہ جنات نکام ہو گئے تے تسیں حکومت کیویں چلائو گے؟ مینوں جادو ٹونا نہیں آندا۔ جو انسان جناں توں رہنمائی لیندا اے اوہ جناں توں وی بھیڑا اے۔ میاں شہبازشریف نے کہیا کہ میں جادو ٹونے نوں حرام سمجھنا واں۔
جادو یاں سحر دے بنیادی معنی نیں کسے گل نوں تروڑ مروڑ کے پیش کرنا۔ بڑے لطیف تے دقیق انداز نال دھوکھا دینا۔ ایہدے بعد ایہ لفظ عام دھوکھے تے فریب‘ جھوٹ تے طمع سازی دے معنیاں وچ استعمال ہون لگا۔ ایس جہت نال ایہدے معنی جادو دے وی آئے نیں۔ ساڈے ایتھے ایہ لفظ فریب تے جھوٹ دے نہیں سگو ںجادو دے ای معنیاں وچ استعمال ہوندا اے پر قرآن کریم وچ بہ کثرت جھوٹ تے فریب دے معنیاں وچ آیا اے۔ جادو دے معنیا ںوچ بہت گھٹ‘ ساحر دا لفظ باطل پرست‘ فریب کار دے معنیاں وچ آندا اے۔ قرآن کریم دی رو نال جادو دی حقیقت ایس توں ودھ کجھ نہیں کہ نفسیاتی طور تے دوجیاں دی قوت متخلیہ نوں متاثر کر دتا جاندا اے۔ سورہ طٰہٰ آیت 65-66 دا ترجمہ اے: موسیٰ نے کہیا کہ تسیں ڈالو‘ فیر ای اوہناں دیاں رسیاں تے لاٹھیاں اوہناں دے جادو دے زور نال اوہناں دے خیال وچ دوڑدیاں معلوم ہوئیاں تے اپنے دل وچ موسیٰ نے خوف پایا۔ اسیں فرمایا‘ ڈر نہیں‘ بے شک توں ای غالب ایں‘ تے توں ڈال دے جو تیرے سجے ہتھ وچ اے اوہ اوہناں دے بناوٹاں نوں نگل جاوے گا تے جو بنا کے لیائے نیں اوہ تے جادو دا فریب اے تے جادو دا بھلا نہیں ہوندا۔
کرکٹر دے طور تے عمران خان ماڈرن‘ لبرل تے روشن خیال بندہ سی۔ مغربی لباس پینٹ کوٹ پاندا۔ اوہنے ویاہ اک انگریز کڑی جمائما نال کیتا۔ سیاست وچ آن دے بعد اوہدی کایا پلٹ گئی۔ اوہ قومی لباس شلوار قمیض وچ لپٹا دکھائی دین لگا۔ انگوٹھی پہنے‘ ہتھ وچ تسبیح پھڑے یاں لپیٹے ہوئے ہوندا۔ اوہنے تریجا ویاہ اک اجہی خاتون نال کیتا جو پیرنی مشہور اے تے بڑی باپردہ۔ اوہدیاں صرف اکھاں وکھائی دیندیاں نیں۔ بشریٰ بی بی دے بارے ایہ گلاں مشہور ہوئیاں کہ اوہ جادو ٹونے تے یقین رکھدیاں نیں تے اوہدا عملی مظاہرہ وی کردیاں نیں کہیا جاندا اے کہ ایسے عملیات پاروں عمران خان وزیراعظم منتخب ہویا تے تقریباً ساڑھے تن ورھے حکمرانی کیتی۔ وزیراعظم دا عہدہ سنبھالن دے بعد وی اوہنے قومی لباس شلوار قمیض نہ چھڈی۔ ایتھوں تک کہ غیرملکی دوریاں دے دوران سربراہان نال ملاقاتاں وچ وی اوہ قومی لباس وچ ہوندا۔ تے ایس سلسلے وچ اوہنوں کوئی کمپلیکس نہیں سی۔ اوہ مادی چیزاں تے اپنے دین تے ثقافت دی اقدار نوں ترجیح دیندا۔ ایسے اقداری نظام دی وجہ نال اوہنے ماڈلنگ کیتی سینکڑوں پرکشش پیش کش رد کر دتیاں سن۔ سوال ایہ اٹھدا اے کہ ساڑھے تن ورھے بعد جادو ٹونے دے اثرات ختم کیوں ہوگئے کہ اوہدی حکمرانی جاندی رہی۔ کالا علم یاں کالا جادو وی مشہور اے۔ ایہدا علم نہیں کہ بشریٰ بی بی کہڑا جادو یاں علم کردیاں سن۔ کالا علم یاں کالا جادو جدوں کوئی عامل کردا اے تے اوہ اپنے عمل لئی اجہی فضا تشکیل دیندا اے جو انسان دے اندر دی منفی قوتاں نوں جگاندی اے تے گناہ نوں فروغ دیندی اے۔ مثلاً اوہ ساری دی ساری فضا ای بھیانک ترتیب دیندا اے۔ کالا کپڑا‘ کالے ماش‘ کالی بلی تے کالا بکرا وی کالے جادو یاں کالے علم لئی بڑا اہم اے۔ ایسے عمل لئی بہترین وقت زوال آفتاب ہوندا اے کیوں جے سورج دیاں شعاواں وچ اینی طاقت نہیں رہندی تے ناقص نور والے چن دیاں کرنیاں نفرت دی فضا پیدا کرن وچ معاون ثابت ہوندیاں نیں تے منفی اثرات چھڈدیاں نیں۔
انج دا عمل اک اجہے کمرے وچ کیتا جانداا ے جو ویرانے نال مشابہ ہووے۔ ایس مقصد لئی اوس کمرے وچ انسانی ہڈیاں رکھیاں جاندیاں نیں۔ قبرستان دی مٹی رکھی جاندی اے جدوں بدی دیاں ساریاں علامتاں اکٹھیاں کر دتیاں جان تے اک خاص قسم دی فضا پیدا ہوندی اے۔ سیاست وچ آن دے بعد عمران خان نوں وڈی گنتی وچ سامعین ملے۔ اوہ ٹی وی دے ٹاک شو وچ وی شرکت کردا رہیا۔ جتھے اوہ پاکستان دی کرپشن نال آلودہ سیاست تے خوب تنقید کردا۔ اوہ پچھلے حکمراناں دے خلاف سخت زبان استعمال کردے ہوئے اوہناں نوں مجرم تے ڈاکو کہندا جہناں نے اپنے فائدے لئی قومی خزانہ لٹ لیا۔ اوہ نوازشریف تے آصف علی زرداری دے خلاف رج کے گرجدا رہیا کہ اوہناں نے غیرقنونی طور تے حاصل کیتی ہوئی دولت غیرملکی بینکاں وچ رکھی ہوئی اے۔ اوہ نشاندہی کردا رہیا کہ ایہناں لوکاں دے مفادات پاکستان توں باہر نیں۔ ایس لئی ایہناں لوکاں تے اعتبار نہیں کیتا جا سکدا۔ اوہنے محسوس کیتا کہ جدوں عوام پوری طرح جان چکے ہون گے کہ ساریاں پارٹیاں دے لیڈر کرپٹ نیں تے اوہ میرے ول ویکھن گے۔ لوکاں نے اوہنوں موقع دتا پر لوکاں نوں مایوسی ہوئی۔ اوہدے خلاف عدم اعتماد دی تحریک شروع ہوئی ایس تحریک توں پہلاں عمران خان نے اپنیاں تقریراں وچ کہیا کہ میرے خلاف اک سپر طاقت نے دھمکی آمیز خط لکھیا اے کہ عمران خان دی حکومت گرا دتی جاوے۔ ایس خط نوں لہرا کے وکھایا وی گیا ہن ایہ خط چیف جسٹس آف پاکستان نال شیئر کیتا جا رہیا اے۔ کیہ ایہ خط اصلی تے واقعی دھمکی آمیز اے۔ ایہدافیصلہ تے ہن سپریم کورٹ ای کرے گی۔٭٭