حسن محمد بھٹی بارے کالم

غلام شبیر عاصم

انسان دی جمن بھوئیں اوہدی نس نس وچ رچی وسی ہندی اے۔بندہ بھاویں ست سمندر پار وی ٹر جائے اوہدے بچپن نال جڑیاں ہوئیاں اوہدی جمن بھوئیں دیاں یاداں کسے دعا یا بد دعا دی طرحاں اوہدا پِچھا کردیاں نیں۔سچ آکھیا گیا اے وطن ایمان ہندا اے۔کیوں جے سبھے عبادتاں ریاضتاں دا تعلق روح دے احساس نال جڑیا ہندا اے،تے روح دا سکون وطن دی دھرتی وچوں پھٹن وانگ ہندا اے۔تے ایسراں روح،سواد تے ایمان دے جوڑ مِل کے”وطن ایمان والی گل”انسان دے ایمان نال اپنا تعلق رکھدی ہوئی وکھالی دیندی اے۔ انسان دی جمن بھوئیں دی اک اک شے اک اک گل،اک اک کیفیت ورہیاں تیکر انسان دے لہو وچ اوسل وٹے لیندی اے۔ایتھوں پتہ لگدا اے کہ انسان دا اپنے پِنڈ ،اپنے شہر، اپنے ملک نال روح دا رشتہ ہندا اے۔اوتھوں ہِجرت کرن نال وجودی رشتہ ٹٹن مگروں وی روح اوتھے پھیرے ماردی تے چکر کٹدی رہندی اے۔تے ایہو کچھ میرے نال واپر رہیا اے۔پِنڈوں ہجرت کرن مگروں وی رعیہ خاص دیاں یاداں اج وی میرے مگر مگر نیں۔کدی کوئی تھاں یاد آوندی اے کدی کوئی شے یاد آوندی اے۔چوبارے جِنہاں ہیٹھاں اٹھدے بہندے،آوندے جاندے اپنا بچپن تے جوانی گزری ہندوستان پاکستان دی ونڈ توں پہلاں دے سِکھاں ہِندوواں دے چوبارے اجے وی میرے پِنڈ دا چہرہ موہرا نیں۔
ایہ چوبارے اج 2022 وچ وی بڑی حد تک اپنی اصلی شکل وچ قائم نیں،تے اگوں وی رب کریم دے فضل نال کئی ورھیاں تیک قائم رہن گے۔ایہ چوبارے 3 گھراں دی ورتوں وچ نیں،پر ایہناں دا حوالہ تے مشہوری ’’حسن محمد بھٹی‘‘ دے ناں نال اے۔اسیں اپنے وڈیاں توں سنیا اے کہ حسن محمد بھی اچا لما جوان گورا رنگ تے سوہنے قد بت والا بندہ سی۔اچے لمے گورے چِٹے قد اتے دانشوری نال بھریا ہویا سِر تے اوس سِر اتے رکھیا ہویا ہیٹ تے کالی عینک سگوں ’’حسن‘‘ دے ’’حسن‘‘ وچ وادھا کرکے لوکاں دے مونہوں تعریف تے اللہ پاک دی تسبیح دا سبب بن دا سی۔ اوس پرانے تے ان پڑھتا دے زمانے وچ حسن محمد بھٹی پڑھیا لِکھیا،قانونی سوجھ بوجھ رکھن والا انکھی جہیا انسان سی۔سنیا اے حسن محمد بھٹی اوس ویلے روزنامہ نوائے وقت دا رپورٹر سی۔سیاست وچ وی اوہ وڈا تے وکھرا جہیا حوالہ رکھدے سن۔حسن محمد بھٹی مرحوم دے جوائی وارث علی چیئرمین تے حسن محمد بھٹی مرحوم دے دوہترِیوں جوائی نوید اختر بھٹی (مریدکے) موجب حسن محمد بھٹی پاکستان دے اگھے تے سِر کڈھویں سیاست دان مصطفی کھر دے جِگری یار سن۔مصطفی کھر نے پی پی پی ولوں الیکشن لڑن لئی حسن محمد بھٹی نوں آکھیا تے حسن محمد بھٹی نے ایہ آکھ کے انکار کردتا کہ ’’میں الیکشن لڑدا نہیں لڑوانا ہنا واں‘‘۔ حسن محمد بھٹی اوس سِدھے سادے تے ان پڑھ زمانے وچ وی انقلابی تے تعمیری فِکر دا جذبہ رکھدا سی۔ جِدوں دساں پِننڈاں وچ وی کوئی اِک بندہ پڑھیا لکھیا شیت ای مِلدا سی،چِٹھی پڑھن لئی بندہ لبھنا پیندا سی،حسن محمد بھٹی اوہدوں 14 جماعتاں پڑھ چکا سی۔ جدیدیت تے نویں پن دا پکھ وی اوہناں دی شخصیت دا حصہ سی۔ جدوں ہر کوئی اپنے آپ وچ کھوہ دا ڈڈو سی، حسن محمد بھٹی اوہدوں وی سمندر دی مچھی سی، یورپ تے ڈھاکے بنگالے دِیاں خبراں رکھدا سی۔
ملکی تے دنیا بھر دی سیاسی تے معاشی حالت اوہدیاں اکھاں اگے ہندی سی۔ اوس سِدھے سادے زمانے وچ وی سینما گھر وچ فلم ویکھن لئی اوہ لاہور جاندے سن تے لوکاں لئی ایہ اک حیرانی والی تے وکھری جہئی گل سی۔ قانونی جانکاری تے عِلمی رعب اینا سی کہ ایہ وی سنیا اے کہ کِیہ مجال سی جے پلس دا اِک سپاہی وی حسن محمد بھٹی دی اجازت بِناں پِنڈ ول مونہہ وی کر جائے۔ حسن محمد بھٹی ایسراں پِنڈ تے برادری دا مونہہ مہاندرہ خیال کیتا جاندا سی۔ پرھے پنچائیت دے فیصلے تے تھانے کچہری دے رولے رپے حسن محمد بھٹی اپنے ہتھیں نبیڑدا سی۔ حسن محمد بھٹی زرعی زمین دا مالک وی سی، جہڑی کہ اج وی اوہدی اولاد دی ملکیت وچ اے۔ تے ایس زمین اتے واہی بِیجی دی ذمہ واری اج کل وارث علی ماجھیوالا عرف وارث چیئرمین نبھا رہیا اے۔ وارث علی چیئرمین حسن محمد بھٹی مرحوم دا جوائی اے تے اپنی دانشوری تے عقل مطابق لوکاں دے پرھے پنچائیت تے تھانے کچہری دے فیصلے تے رولے رپے نبیڑدا اے، بلکہ اپنا آپ پوری طرحاں لبیڑدا اے، کسے مسئلے وچ پوری طرحاں وڑ کے سوچ کے سمجھ کے فیصلہ کردا اے۔ ایہ اِک ربی عطا اے ہر بندے نوں عطا نہیں ہندی۔ شاواش اے وارث چیئرمین دے جِنہے حسن محمد بھٹی دے ایس سماجی پکھ نوں اج وی اپنی پگ دا شملہ سمجھیا ہویا اے، تے اوہ لوکاں دے مسئلے اگے ہوکے رِیجھ نال نبیڑدا اے۔ وارث علی عرف چیئرمین جِدوں پہلی واری الیکشن تے کھلوتا تے کامیاب ہوگیا تے اوہدوں دا ای لفظ ’’چیئرمین‘‘ اوہدے ناں دا حصہ بن گیا اے۔ اوہ ہر کسے لئی ہمیش لئی چیئرمین اے۔ الیکشن تے کھلووے ناں کھلووے، جِت جائے یا ہار جائے اوہ چیئرمین ای اے۔
حضرت بابا فرید آکھدے نیں جِدوں رب پاک دنیا کولوں کِسے دی عزت کروانا چاہندا اے تے اوہ لوکاں دے دلاں اندر اوہدی محبت آپے بھر دیندا اے۔ ایسے لئی لوک وارث چیئرمین نال محبت کردے نیں۔ تے ’’چیئرمینی‘‘ اوہدے گل دا ہار بن گئی اے۔ تے وارث چیئرمین وی چیئرمینی نوں گل دا ڈھول سمجھ کے نہیں،گل دا ہار سمجھ کے نبھا رہیا اے۔ اللہ پاک وارث چیئرمین نوں تتی واء نہ لاوے جہڑا لوکاں دی خدمت کرن لگا مِینہہ ویکھدا اے نہ جھکھڑ، دھپ ویکھدا اے نہ چھاں۔٭٭