شرمندگی والیاں دبیاں دبیاں آوازاں

اشرف شریف

تریخ دا اک وڈا سوال کجھ دیہاڑیاں وچ حل ہو گیا۔ ساڈی نسل دے لوک بچپن توں سوچدے کہ کجھ سو لوکاں دی ایسٹ انڈیا کمپنی نے وسیع و عریض ہندوستان دی سرزمین تے قبضہ کیویں کر لیا۔ ہزاراں تے لکھاں سپاہیاں دے لشکر بے بس کیویں ہو گئے۔ لڑن والیاں بانہواں وچوں طاقت کیویں ختم کر لئی گئی۔ عمران خان دی اکثریت نوں اقلیت وچ بدلدے ویکھ کے جان لیا کہ بادشاہ ہووے یاں منتخب وزیراعظم ایسٹ انڈیا کمپنی دے صرف اک سفارتکار دے سامنے بے بس نیں۔ اوہناں جنگاں دا حال وی سن دے سی کہ میسور دے حکمران حیدرعلی دے اتحادی کمپنی نال مل جاندے۔ کمپنی جدوں ہارن لگدی دکن دا نواب مرہٹے تے سلطنت میسور دے مخالفین اوہدی مدد نوں آگے آندے۔ سیاست اک طاقت اے‘ طاقت دے حصول لئی لوک کیہ کیہ کجھ کر جاندے نیں اوہناں حکمیاں توں پچھو جو طاقت دیاں دوائیاں ویچدے نیں۔ کمزور لوک اپنے اثاثے ویچن تے آ جاندے نیں۔ سیاسی طاقت دے نال تے ہر بیماری دی شفا اے۔ تکبر‘ جھوٹ‘ بددیانتی تے جرائم نوں تحفظ مل جاندا اے۔ پاکستان وچ غدار کون اے تے ملک دشمن کون ہن ایہ بحث بند ہو جانی چاہیدی اے۔ اوس ویلے تک ضرور بند رہنی چاہیدی اے جدوں تک کوئی دانا جماعت تے بااختیار پارلیمنٹ بیرونی مداخلت دشمن دے ایجنٹ دہشت گرد‘ دین فروش تے غدار ورگے الفاظ دی تشریح آئین وچ شامل نہ کر دیوے۔ ایہ انتظار ایس لئی قبول اے کہ ہن تک جتھوں غداری دے سرٹیفکیٹ ونڈے جاندے رہے نیں اوہ پرنٹنگ پریس اپنی ساکھ کھو چکیا اے۔
منتخب وزیراعظم رخصت ہویا تے موروثی بادشاہت واپس آ گئی۔ ہن اوہ لوک کھلے پھرن گے جہناں نوں کسے سرکاری تے غیرسرکاری زمین تے قبضہ کردے ہوئے قنون دا ڈر نہیں۔ ہن اوہ لوک بے خوف پھرن گے جہناں تے ناظم جوکھیو دے قتل دا الزام سی تے جو نویں بادشاہ نوں ووٹ دے کے بے گناہ قرار پائے۔ ہن اوہناں لوکاں دی طاقت فیر توں پرت آوے گی جو ملک دا پیسہ لے کے اپنیاں شریاناں وچ لہو بھردے نیں۔ ہن فیر میگاپراجیکٹس دا جادو شروع ہووے گا لوک دیوانہ وار رقص کرن گے۔ فلماں سانوں سکھاندیاں نیں جیویں کہانیاں بھید کھولدیاں نیں۔ پنجاہ سٹھ ورھے پرانی اکثر فلماں وچ سودخور ساہوکار منشی تے ساہوکار دے مقروض خانداناں دی کہانی ہوندی۔ عام پاکستانی ایس کہانی وچ مقروض خاندان اے۔ منشی ساڈے تے مسلط کر دتا جاندا اے تے ساہوکار ہزاراں میل دور بہہ کے ڈراندا اے کہ دھیلی ادھار لین تے حویلی تے گنڈا ادھار لین تے سنڈھا گروی رکھنا ہووے گا۔ ساہوکار دا دشمن اوہ اے جو اوہدے توں قرض لین تے تیار نہیں جو اوہدے حساب کتاب تے اعتراض کردا اے۔ جو اعتراض کردا اے منشی تے اوہدے غنڈے اوہنوں سبق سکھان آ جاندے نیں۔ پاکستان وچ جدوں کدی جمہوری حکومت دا تختہ الٹیا گیا اوہدے پچھے داخلی حالات دی تھاں بیرونی پالیسی دا عمل دخل رہیا اے۔ ایوب خان ایس لئی آئے کہ پاکستان نوں ایہ چھیتی طے کرنا سی کہ اوہنے کہڑے عالمی بلاک دا حصہ بننا اے۔ منتخب وزرائے اعظم توں ایہ معاملہ طے نہیں سی ہو رہیا۔ اوہ جلدبازی نہیں چاہندے سن غوروفکر دے بعد ایہ فیصلہ کرنا چاہندے سی۔ تولنا چاہندے سی کہ ملک لئی کیہ چنگاکیہ برااے۔ پہلے ساریاں نوں واری واری ازمایا فیر اپنا بندہ حکمران بنا دتا۔ اک کمزور تے نویں ملک دے حکمران دا امریکہ وچ اوہدی توقع توں ودھ کے استقبال کر کے اوہدے دل نوں امریکیاں دی محبت نال بھر دتا گیا۔ امریکہ نوں سوویت یونین دے خلاف اک جنگ کرنی سی ایہ جنگ امریکی سزمین توں دور لڑی جانی سی۔ ماڑے تے غریب افغانستان نوں میدان بنایا گیا۔ لاجسٹکس سپلائی تے ریکروٹس لئی پاکستان دی مدد چاہیدی سی۔ رکاوٹ منتخب حکمران سی‘ اوہ نہ منیا تے پھانسی دے دتی گئی۔ جنرل ضیاء الحق نے ساریاں فرمائشاں پوریاں کر دتیاں۔ فیر اوہ دن وی آ گیا جدوں ضیاء الحق امریکی سرگرمیاں وچ رازداں ہون دی وجہ نال خطرہ بن گیا۔ ضیاء الحق دا انجام وی بھیڑا ہویا۔ امریکہ نے افغانستان وچ جہاد دے اثرات نوں ختم کرنا سی۔ اوہنوں لگا کہ افغانستان وچ اوہدے پھیلائے نظریات اوہدے عالمی مفادات لئی خطرہ بن رہے نیں۔ اک پراجیکٹ تیار کیتا گیا پاکستان دی منتخب حکومت کیوں جے جہادیاں توں فنڈز لیندی رہی سی ایس لئی اوہدے تے اعتبار نہ کیتا گیا تے جنرل پرویزمشرف دا ون ونڈو دفتر کھل گیا جتھوں ہر مسئلے دا فوراً حل مل جاندا۔
جنرل مشرف تے اوہناں دے ساتھی ہشیار سن۔ اوہناں تے کئی قاتلانہ حملے ہوئے پر بچ گئے۔ اوہناں نے اقتدار نوں چھڈ کے اپنی زندگی بچا لئی۔ تجزیہ ایس گل دا ہونا چاہیدا اے کہ پاکستان کیہ ہن وی امریکی بلاک دا حصہ اے کہ ایتھے امریکہ دے کہن تے حکومتاں بدلیاں جاندیاں نیں۔ کیہ ایہ سوال اہم نہیں کہ اوہ کون اے جنہے حکومت نوں بدلیا۔ اپوزیشن ایس تبدیلی دا سہرا اپنے سر بنھن دی مسخری نہ کرے تے چنگا اے۔ اپوزیشن ہن متحدہ حکومتی اتحاد اے تے منشی دے غنڈے توں ودھ کجھ نہیں۔ ایس سارے ہنگامے وچ پاکستان جے کوئی چپڑاسی‘ کوئی کانسٹیبل تے کوئی ہرکارہ محب وطن اے تے اوہنوں ایہ ثبوت دینے ہون گے کہ ملک سازش دا شکار کیویں ہویا تے جہڑے لوک فیر توں ایوان اقتدار دیاں پوڑھیاں چڑھائے گئے نیںاوہناں دے سابقہ جرائم اصل سن یاں اوہناں نوں صرف کسے وجہ نال سزا دتی گئی سی جے اوہ وی بے گناہ نیں تے فیر احتساب دا ناں لین والے نوں معاف نہ کیتا جاوے۔ اوہناں نوں مبارک ہووے جہناں دے ہاسے قومی اسمبلی دی اوس چھت دے تھلے گونج رہے سن جہدے تے آیات قرآنی نقش نیں۔ علی محمد خان دا خطاب اپوزیشن دے سارے لیڈراں تے ایسے لئی بھاری رہیا کہ شرمندگی جنے مرضی بہروپ وٹا لوے اوہدی آواز جنی وی جمہوری ہو جاوے اوہ سچ توں اچی نہیں ہوندی۔٭٭