میچ کھیڈن توں نہ کرن دا نتیجہ

امرجلیل

تسیں اج تک انج دا میچ ویکھیا اے یاں فیر اجہے میچ دے بارے سنیا اے جہدے وچ میچ شروع ہون توں پنج منٹ پہلاں اک ٹیم نے میچ کھیڈن توں انکار کر دتا ہووے تے ٹریکٹر چلا کے پچ دا ستیاناس کر دتا ہووے؟
تسیں اپنی یادداشت تے زور دے کے ویکھو۔ زیادہ نہیں‘ حال ای وچ انج دا اک انوکھا میچ تسیں اسلام آباد وچ ہوندے ہوئے ویکھیا ہووے گا۔ میچ ہوندے ہوندے رہ گیا سی۔ اک ٹیم دے کپتان نے اچانک میچ شروع ہون توں پنج منٹ پہلاں میچ کھیڈن توں انکار کر دتا سی۔ بناں میچ کھیڈے‘ میدان توں نسدے ہوئے میچ دا بیڑا غرق کر گئے سن۔ کسے دی سمجھ وچ نہیں آندا کہ کپتان نے انج دا رویہ کیوں اختیار کیتا سی؟ کیہ اوہناں نوں ڈر سی کہ اوہ میچ بری طرح ہار جان گے؟ بہت گھٹ ویکھن نوں ملدا اے کہ میچ ہار جت دا فیصلہ ہوئے بناں ڈراء ہو جاوے۔ تسیں جدوں میچ کھیڈن لئی میدان وچ اتردے او اودوں عام طور تے دو صورتاں نال تہاڈا واہ پیندا اے۔ تسیں میچ جت جاندے او یاںفیر میچ ہار جاندے او۔ میچ کھیڈن توں انکار کر دین یاں میدان چھڈ کے نس جان توں تسیں میچ ہار جان دا عملی اظہار کردے او۔ میچ کھیڈے بناں تسیں کدی میچ جت نہیں سکدے۔ میدان چھڈ کے نس جان دے تسیں لکھ بہانے دنیا نوں دسدے پھرو تسیں اپنی ہار نوں جت وچ نہیں بدل سکے۔ تسیں تریخ دے پنے نہیں بدل سکدے۔ یاد اے تہانوں کجھ ورھے پہلاں انگلستان وچ کھیڈے گئے اک ٹیسٹ میچ دا قصہ؟ انضمام الحق کپتان سن میچ دے دوجے یاں تریجے دن لنچ دے بعد انضمام نے میچ کھیڈن توں انکار کر دتا سی۔ اوہ میچ اودوں ڈراء نہیں سمجھیا گیا سی اوہ میچ انضمام نے سرنڈر یعنی تیاگ دتا سی۔ یعنی ہتھیار سٹ کے انگریز ٹیم دے مطیع ہو گئے سی۔ اوہ میچ ہار گیا سی تسیں تریخ دے ورقے نہیں پاڑ سکدے۔
میچ کھیڈن توں انکار کرن دا ہر بہانہ ہر حیلہ ڈھکوسلا لگدا اے۔ میچ وچ بہانہ سازی کم نہیں آندی۔ کوئی بہانہ تہاڈے کم نہیں آندا۔ اسلام آباد وچ شروع ہوندے ہوندے اچانک بحث مباحثیاں دی نذر ہو جان والا میچ کپتان ہار چکے نیں۔ سگوں بھیڑی طرح ہار چکے نیں۔ موہنجوداڑو دے دور دا وکٹ کیپر ہون دے ناطے میں تہانو ںدس چکیا واں کہ فاسٹ بائولر بڑے گھمنڈی ہوندے نیں۔ کسے نوں خاطر وچ نہیں لیاندے۔ اوہناں دے طور طریقے مزاج‘ رویے ٹیم دے باقی کھڈاریاں توں وکھرے ہوندے نیں۔ بیٹس مین نوں آئوٹ کرن دے بعد آپے توں باہر ہو جاندے او۔ اچھلدے او‘ کُدے او‘ قلابازیاں لاندے او۔ آئوٹ ہون والے بیٹس مین نوں نیڑے جا کے ایس طرح گھوردے او جیویںاوہنوں کچا کھا جائو‘ چبا ڈالو۔ گھمنڈ دے ستویں اسمان تے رہن والے فاسٹ بالر چنگے تو ںچنگے بیٹس مین نوں آئوٹ کرن دے بعد تکبراً بے نیازی دا اظہار کردے نیں۔ سرڈان بریڈمین ورگے بیٹس مین نو ںآئوٹ کرن دے بعد وی کسے قسم دی خوشی دا ظاہار نہیں کردے اجہے بے نیازی دا اظہار کردے نیں جیویں کہہ رہے ہون سرڈان بریڈمین کیہ چیز نیں۔ جے اسمان توں وی کوئی بیٹس مین میچ وچ میرے سامنے آ جاوے اوہنوں وی کلین بولڈ کر سکنا واں۔ یوٹیوب تے کپتان دی پرانی ویڈیو وکھاندے رہنے نیں۔ کسے وی میچ وچ بیٹس مین نوں آئوٹ کرن دے بعد کپتان نوں تسیں خوش نہیں ویکھو گے۔ وکٹ لین دے بعد تسیں کپتان نوں کمال تکبر تے بے نیازی نال قدآور ویکھو گے۔ دوجے کھڈاری نسدے ہوئے آندے نیں اوہنوں خوشی نال گھیر لیندے نیں پر مجال اے کہ کپتان کسے نوں اپنے نیڑے آن دیوے۔
عام طور تے سمجھیا جاندا اے کہ نوبال تے بیٹس مین آئوٹ نہیں ہوندا۔ پر ایہ تاثر غلط اے نوبال تے رن لیندے ہوئے تسیں رن آئوٹ ہو سکدے او۔ ایہ نو بال تے رن آئوٹ ہون والے بیٹس مین دی بدنصیبی سمجھی جاندی اے پر کجھ بیٹس مین نوبال تے رن آئوٹ ہون والیاں توں زیادہ بدنصیب ہوندے نیں۔ اوہ اجہی کوئی غلطی کر بیٹھدے نیں جہدی پاداش وچ اوہ اپنے آپ ای آئوٹ ہو جاندے نیں۔ ایس قسم دے آئوٹ ہون وچ بالر یاں فیلڈر دا کوئی کمال نہیں ہوندا بھاری بھر کم انضمام الحق ہک شاٹ کھیڈن لئی انج گھمے کہ اپنے آپ نوں روک نہ سکے تے سدھے وکٹاں تے جا ڈگے۔ آئوٹ ہو گئے‘ کدی کدی انج وی ہوندا اے کہ بیک فٹ تے کھیڈدے ہوئے یعنی پچھے ہٹ کے کھیڈن دی کوشش وچ بیٹس مین ایناں پچھے ہٹ جاندا اے کہ کھیڈدے ہوئے اوہدا بلا وکٹاں نوں لگ جاندا اے تے اوہ آپ ای آئوٹ ہو جاندا اے۔ ایس قسم دے آئوٹ ہون دی شرمندگی اک بیٹس مین زندگی بھر نہیں بھلا سکدا۔
جدوں تسیں میچ کھیڈن لئی میدان وچ اتردے او اودوں تہاڈے نوں ایویں ای چھوٹیاں وڈیاں غلطیاں ہو جاندیاں نیں۔ چھوٹی وڈی غلطی کھیڈ دا لازمی حصہ ہوندی اے۔ کھیڈ وچ کدی انج نہیں ہوندا کہ تسیں ورھیاں تک کھیڈدے رہو تے تہاڈے توں کدی کوئی غلطی نہ ہوئی ہووے۔ تہاڈے توں سوکھا کیچ چھٹ جاندا اے ننانوے رنز تے بیٹنگ کردے ہوئے تسیں سنچری بنان لئی کاہل وچ رن لیندے او ننانوے دے سکور تے رن آئوٹ ہو جاندے او۔ زندگی بھر تسیں اوہناں لمحیاں نوں ترسدے رہندے او۔ تریخ وچ ایس قسم دے ان گنت واقعے تہانوں پڑھن لئی ملن گے پر جدوں تسیں عین موقعے تے مقابلہ کرن توں دستبردار ہو جاندے او جدوں تسیں میچ کھیڈن توں پنج منٹ پہلے بھونڈا بہانہ بنا کے میدان چھڈ کے نس جاندے او اودوں تسیں زندگی بھر لئی شکست خوردگی دی علامت بن جاندے او۔٭