کتاب نوازشریف تے شہبازازم!
حناپرویزبٹ
کتاب نوازشریف دے باب شہباز ازم دی شروعات نے سلیکٹڈ دے ارماناں تے مناں مٹی پا دتی اے۔ پچھلے حکمران صرف جنون بینڈ دا گانا وجاندے رہے پر شہبازشریف نے آندیاں ای گلاں دی تھاں حقیقی محب وطن لیڈر وانگوں جنگی بنیاداں تے معیشت دی مرمت کرن دے عظیم منصوبے تے کم شروع کر دتا اے۔ اپنی انتظامی شہرت دے بالکل عین مطابق اوہ صبح سویرے ای دفتر اپڑ کے وفاقی بیورو کریسی نوں سرپرائز دے رہے نیں۔ اک طوفانی دورے وچ جدوں اوہ اسلام آباد راول چوک فلائی اوور پراجیکٹ تے اپڑے تے افسر ہکے بکے رہ گئے۔ منصوبہ اجے تک کیوں مکمل نہیں ہو سکیا؟ اوہناں دے ایس جائز سوال دا قابل یقین جواب افسراں دے کول نہیں سی۔ اوہناں نے دیامر بھاشا ڈیم دے چار ورھے ضائع ہون تے کہیا‘ ایہ منصوبہ جے 2029 دی تھاں 2026 وچ مکمل ہو جاوے تے بہت اچھا‘ ایہدے لئی وزیراعظم نے ہدایتاں وی جاری کیتیاں نیں۔
سٹاک ایکسچینج انڈکس اُتے جد کہ ڈالر تھلے ول جانا شروع ہو چکیا اے۔ رمضان وچ سویرے اٹھ وجے دفتری اوقات شروع کرن دا فیصلہ بڑا ای مناسب اے۔ ہولی ہولی لوک ایہدے وی عادی ہو جان گے میں تے کہنی آں کہ رمضان وچ ایہ اوقات صبح چھ وجے کر دتے جان تے ایہدے نال بجلی دی وی زبردست بچت ہووے گی۔ اک بیوروکریٹ دا کہنا اے کہ وزیراعظم شہبازشریف دے نال کم کرنا وی اک انوکھا تجربہ اے اوہ کسے وی معاملے وچ سستی برداشت نہیں کردے۔ منصوبے دی تکمیل وچ تاخیری حربیاں نوں یک جنبش قلم ختم کر دیندے نیں۔ نالائقاں تے نااہلاں نوں نیڑے وی نہیں پھٹکن دیندے۔ میں تے ایہو کہواں گا کہ سانوں شہبازشریف ورگے ای وزیراعظم دی لوڑ سی۔
وزیراعلیٰ پنجاب دے انتخاب دے دن پیدا ہون والی ہڑبونگ توں ایہ واضح ہو گیا اے کہ چوہدری ٹانگہ پارٹی دی دو مہینے توں جاری مشاورت شرمندگی تے آ کے مکمل ہو گئی اے۔ میڈیکل ہسٹری وچ پائیوڈین نال ٹُٹیا بازو جڑوان والے پہلے مریض بنن دا انوکھا اعزاز وی اوہناں نوں حاصل ہویا اے صورتحال ہور وی مزاحیہ ہو گئی جدوں اوہ اک ویڈیو وچ کسے صحافی نوں ایہ کہندے ہوئے وکھائی دتے کہ میری ویڈیو فوراً چلائو جہدے وچ اوہ ٹُٹی بانہہ چک چک کے شریف برادران نوں معاف نہ کرن دا اعلان کردے رہے۔ بقول اوہناں دے جدوں اوہناں تے حملہ ہویا تے اوہ ڈگ کے بیہوش ہو گئے فیر چراغوں میں کوئی روشنی نہ رہی‘ کسے ویڈیو وچ نہ اوہناں دی بیہوشی ثابت ہوئی تے نہ ای کوئی تشدد‘ اڑدی چڑی پھڑن دے چکر وچ اپنے طوطے وی اڑوا دین والیاں دی نام نہاد وضع داری دا پول اوس ویلے کھل گیا جدوں اوہ اپنے پرائیویٹ گارڈز نوں اسمبلی وچ داخل کروان دی کوشش وچ مصروف وکھائی دتے۔ چوہدری صاحب نوں اپنے پھٹاں دا میڈیکل کروان دا کہہ کے پولیس نے جہڑی شرارت کیتی اے اسیں اوہدی مذمت کرنے آں تے امید کرنے آں کہ اوہ میڈیکل نہیں کروان گے کیوں جے ساریاں نوں پتہ اے ہویا کیہ اے؟
شریف خاندان دی سیاست ہمیشہ لئی ختم ہو گئی اے ہن اوہ کدی واپس نہیں آن گے ایہ جھوٹھا پراپیگنڈا کرن والیاں دے سینیاں تے ہن ڈھیر سارے سپ لوٹ رہے نیں کہ باپ وزیراعظم پاکستان جد کہ پُتر وزیراعلیٰ پنجاب بن گیا اے۔ حمزہ شہباز میاں نوازشریف نوں برملا اپنا سیاسی گرو من دے نیں۔ امید اے کہ بطور وزیراعلیٰ پنجاب اوہ اپنے وڈیاں دی تریخ نوں دہراندے ہوئے کامیابیاں دے نویں باب رقم کرن گے۔ باشعور اہل سیاست دا کہنا اے کہ جدوں خفیہ تعاون دستیاب نہ رہیا تے پی ٹی آئی تے ق لیگ ولوں مزاحمت بڑا ای احمقانہ عمل سی۔ بدقسمتی اے کہ قومی اسمبلی تے پنجاب اسمبلی تے تسلط برقرار رکھن لئی غیرقنونی اقدامات تے تاخیری ہتھکنڈے ورتے گئے جہدے بعد پی ٹی آئی تے ق لیگ دی سیاست ملیامیٹ ہو گئی۔
حالیہ واقعات توں ایہ سبق ملیا اے کہ کوئی اگوں کدی ریٹائر افسر دی فون کال تے کن نہیں دھرے گا۔ کوئی چوہدری اپنے پُتر دے پچھے انھے واہ نہیں چلے گا۔ قوم نوں اپریل فول بنان دی نکام کوشش کرن والے سیاستداناں نوں وی سبق مل گیا اے کہ چالاکی‘ مکاری‘ لالچ تے تکبر دے دن جدوں زوال پذیر ہوندے نیں تے جعلی ڈرامے وی کم نہیں آندے۔ کندھ تے واضح لکھیا ہویا سی پر زبردستی کیتے بناں کرسی نہ چھڈن دی احمقانہ رسم پا دتی گئی اے۔ نیازی دی جعلی کھوکھلی مزاحمتی پالیسی دا حصہ بنن تے گجرات دیاں تن دہائیاں دی جعلی وضعدار سیاست دفن ہو گئی اے۔
پنجاب اسمبلی وچ اٹھ گھنٹے دی ہنگامہ ارائی ہوئی۔ پتے پتے‘ بوٹے بوٹے نوں گھڑے گھڑائے چوہدری وقوعہ بارے پتہ لگ گیا پر نہیں پتہ لگا تے صرف اوس وسیم اکرم پلس نوں نہیں لگا جہنوں سب توں وڈے صوبے دی عنان اقتدار ہتھ پھڑائی گئی سی۔٭
