نوید اختر بھٹی اج وی مفرور اے

غلام شبیر عاصم

پِنڈاں تھاواں تے شہراں وچ گزرن والے بال پن (بچپن) وچ اینا ای فرق ہندا اے جِناں حلال تے حرام وچ فرق ہندا اے۔پِنڈاں وچ رہ کے بچپن وچ گرمیاں وچ پیریں جتی پاونا حرام سمجھیا جاندا رہیا اے، تے شہر وچ رہ کے جتی نہ پائو تے گھر دے مار مار کے حلال کر چھڈدے نیں۔تے اِنج پِنڈاں تے شہراں وچ ایس حلال تے حرام دا فرق اج کل تے کچھ گھٹ گیا اے،پر جدوں اسیں بال ساں اوہدوں ایہ فرق بڑی حد تک سی۔ہون پِنڈاں وچ وی جتی نہ پاون دا تصور ترقی تے شہری رواجاں دی انھی بِھیڑ وچ مِدھیا مدھولیا جارہیا اے۔کدے پِنڈاں وچ ننگے پیرِیں نٹھن بھجن نال صحت چنگی تے جثہ نِگھر رہنا خیال کیتا جاندا سی۔گرمیاں وچ سویرے سویرے ننگے پیرِیں تریل وچ پِھرنا سو روگاں دا علاج گِنیا جاندا سی۔تریخ گواہ اے پِنڈاں وچوں ٹاٹ سکولاں دے پڑھے ہوئے بڑے بڑے افسراں، سیاست داناں تے دانشوراں دی پرکھ پڑچول کرئیے تے اوہ وی ننگے پیرِیں پِھردے ثابت ہندے نیں۔
جسراں کہ سابق نگران وزیر اعظم ملک معراج خالد مرحوم دی تریخ پڑھئیے تے اوہ وی ڈنگر چاردے،ددھ چوندے تے سائیکل تے ڈھوندے تے ننگے پیریں ڈنگر سانبھدے نظر آوندے نیں۔ اسیں آپ بچپن وچ تپدِیاں دوپہراں وچ ننگے پیرِیں بھجے پِھردے ساں۔ننگے پیرِیں،سِروں ننگے،گلوں ننگے رہنا ای اہدوں ہار سنگھار سی۔کپڑے تے خوورے کِسے بیمار بال نوں لویٹے جاندے سن۔پِنڈاں وچوں آن کے شہراں وچ پڑھ لکھ کے،پینٹ شینٹ ٹائی کوٹ،سفاری سوٹ تے شیروانی وغیرہ پاون والے شہری بابوواں دا بچپن پھولو تے سارے ای گلوں پیروں ننگے نظریں آون گے۔میرا گرائیں،بچپن دا بیلی پِنڈ رعیہ خاص دی ’’ٹومب‘‘ شیطان دی ٹوٹی تے اجکل دے جناب نوید اختر بھٹی وی ننگے پیریں پِھردے سن،جتی نوں ایہناں وی ربی عذاب دی اگ دے ’’بوٹ‘‘ سمجھی رکھیا اے۔اج کل ماشااللہ کامیاب ترین پڑھی لکھی شخصیت نیں۔ ایم اے انگریزی کرکے ہون تک وی انگریزی پڑھا رہے نیں۔ اک لما عرصہ اوہناں نے مختلف پرائیویٹ کالجاں تے اکیڈمیاں وچ پڑھایا تے ہون تِن چار سالاں توں اپنا پرائیویٹ ’’رائز سکول سسٹم‘‘ چلا رہے نیں۔ نوید اختر بھٹی دا ویاہ ماشااللہ اِک پڑھے لِکھے،شریف تے سماج سیہان پچھان رکھن والے گھر وچ ہویا اے۔اوہناں دی گھر والی وی پڑھی لِکھی تے سمجھدار پنجاب دی ’’انکھی دِھی‘‘ اے تے سکول وچ نوید اختر بھٹی دا چنگی طرحاں بھار وڈاندی تے پڑھاوندی اے۔میں بیمار آں تے اج اپنے بچپن دیاں گلاں یاد کرکے اپنی بیماری دا ٹیمپریچر گھٹ کرن لئی کالم لِکھی جارہیا واں۔میں بچپن وچ مِٹی دے کھڈونے تے زمین اتے انگلاں نال تصویراں بہت بناوندا تے چور سپاہی دے کھیڈ وچ پلس افسر بن دا ساں۔ تینوید اختر بھٹی رکھاں اتے چڑھ کے تے کدی کچیاں کندھاں وچ بنیاں رڈھاں کھڈھاں وچ ہتھ پا کے لالڑیاں تے طوطے چِڑیاں پھڑدا ہندا سی۔شلوار وچ کرتا دے کے ڈِھڈ نوں رسی بنھ کے بیلٹ بنا کے موہڈیاں اتے سِگٹاں والی ڈبی دے ورق دے بیج لا کے افسر وی بن دے ساں۔پرالی دِیاں بھریاں اوہلے لک لک کے ڈِنگ پڑِنگیاں لکڑیاں دی بندوقاں لے کے فوجی بن کے جنگ وی لڑدے ساں۔واہن دِیاں ڈھیماں تے چوہوے دی چکیر دِیاں مٹھاں بھر بھر کے اسلحہ وی چلاندے ساں۔سلیوٹ وی ماردے تے مٹی دا وائرلیس سیٹ بنا کے مائیک بنا کے میسج وی دینے ساں۔بغیر اطلاع دے کِسے سپاہی دے چھٹی کرن تے اوہنوں کن پھڑوا کے رکوع دی حالت وچ لک اوتے بھار رکھ کے سزا وی دِتی جاندی سی۔اک واری نوید اختر بھٹی نامی گرامی ڈاکو بنیا سی تے اساں ایہنوں کسے جرم وچ گرفتار وی کر لیا سی۔پر باقی ضروری کارروائی کرن توں پہلوں ای ایہدا وڈا بھائی سعید آگیا تے نوید بھٹی سمیت اسیں سارے نٹھ بھج گئے،کچھ دناں مگروں نوید اختر بھٹی دے گھر والے پِنڈ چھڈ کے مریدکے آگئے۔تے پھیر سالاں تیک ساڈی جدائی پے گئی۔کئی سالاں مگروں1995ء وچ اسیں وی پِنڈوں مریدکے آگئیے۔جے ویکھیا جاوے تے نوید اختر بھٹی اج وی مفرور اے۔
ایس واقعہ نوں بھاویں 35,36 سال گزر گئے نیں،پر قنونی کاغذاں وچ تے نوید اختر بھٹی مجرم اے تے مفرور اے۔ہون کدی اوہ میرے سامنے آوندا اے تے قنون مجبور کردا اے کہ ایہنوں ایتھے ای گٹوں نپ لواں پر کئی ورہیاں دی یاری مجبوری بن کے میرے ہتھ پھڑ لیندی اے،تے نوید اختر بھٹی پھیر میرے ہتھوں بچ جاندا اے۔مینوں ایہ وی ڈر لگدا اے کہ جے میں نوید اختر نوں اگے ودھ کے ہتھکڑی لاون دی کیتی تے ایہ اگے لگ کے نس وگے گا،تے نٹھدے نٹھدے کِدھرے مینوں ٹھیڈا لگ گیا،میں ڈِگ پیا تے میرا خواب چور چور ہوجائے گا۔تے میں یاداں دے سمندر وچوں بھڑک کے باہر ڈِگاں گا تے میں بِن پانی دے مچھی وانگوں تھاں مرجاں گا۔٭