نیرو بانسری وجا رہیا سی

matloob warraich

مطلوب وڑائچ

سندھ دے ضلع دادو دی تحصیل میہڑ وچ فریدآباد تھانے دی حدود وچ واقع پنڈ فیض محمد دریانی چانڈیو وچ کجھ دیہاڑ پہلاں اگ لگن پاروں تن بھراواں تے اوہناں دی اک بھین سنے 9 بندے سڑ کے مر گئے جد کہ 20 توں ودھ زخمی ہو گئے سن۔ اگ کئی گھنٹیاں تک نہ بجھائی جا سکی جہدے نتیجے وچ پنڈ دے سو توں ودھ مکان مکمل طور تے سڑ گئے جد کہ مجھاں’ گاواں تے بکریاں سنے ڈیڑھ سو توں ودھ ڈنگر’ پنڈ وچ رکھی سینکڑوں من کنک تے ٹریکٹر وی سڑ گئے سن۔ ڈاڈھے زخمیاں نوں ابتدائی طبی امداد لئی ہسپتال منتقل کرن لئی ایمبولینسز تک موجود نہیں سن۔ ایس لئی اوہناں نوں پولیس موبائلز وچ دادو تے کجھ نوں حیدرآباد منتقل کیتا گیا۔ وزیراعلیٰ سندھ مرادعلی شاہ نے منیا اے کہ اگ لگن دے واقعے تے صوبائی حکومت نے امدادی کماں وچ تاخیر کیتی۔ ہن اوہناں دی حکومت بعد از خرابی بسیار امداد لئی سرگرم ہو گئی اے۔ ایہ امداد وی جانے پتہ نہیں اصل حق داراں تک اپڑدی اے یاں درمیان وچ ای چک لئی جاندی اے۔ دادو وچ جہڑی قیامت ٹُٹی تے دل دوز واقعہ پیش آیا ایہ پہلی واری ہویا اے نہ ای ایہ سندھ حکومت دی پہلی وار نالائقی تے نااہلی تے سفاکانہ ذہنیت سامنے آئی اے۔ تھر وچ بھکھ تے تریہہ نال کنے بچے ہر ورھے موت دے منہ وچ ٹر جاندے نیں۔ ہسپتالاں وچ گھٹیا انتظامات تے دوائیاں دی نایابی پاروں کنے لوک خاص طور تے بچے موت دی لکیر پار کر جاندے نیں۔ ایس صوبے وچ ایہناں لوکاں دی چوداں ورھے توں حکومت اے جہناں دے گھوڑیاں تے کتیاں دی خوراک وی امپورٹڈ اے۔ ہن تے خیر پاکستان وچ امپورٹڈ دی اجہی مانگ ہو رہی اے کہ حکومت وی امپورٹڈ اے۔ والیان سندھ دے گھوڑیاں’ کتیاں دیاں خوراکاں معیار دے اعلیٰ درجے دی ہوندیاں نیں۔ ایسے صوبے وچ آوارہ کتیاں دے کٹن دے علاج دی ویکسین ای دستیاب نہیں۔ ضلع دادو جتھے قیامت برپا ہوئی مراد علی شاہ دا آبائی علاقہ اے۔ جے امدادی کاروائی چھیتی طور تے شروع ہو جاندی تے کئی جاناں بچ سکدیاں سن۔ ایمبولینس ندارد’ فائر بریگیڈ دی گڈی خراب۔ اودھر وزیراعلیٰ دا پروٹوکول ویکھو بلاول تے آصف علی زرداری جہناں دے کول اجے کوئی سرکاری عہدہ نہیں اوہناں دے قافلے ویکھ کے لگدا اے کسے ملک دا مہاراجہ کوئی ریاست فتح کرکے آیا اے۔ ممکنہ حادثے دی صورت وچ ایمبولینس ساریاں دوائیاں تے ضروریات دے نال قافلے وچ شامل ہوندی اے۔ ایہناں لوکاں لئی وسیلیاں دی بھرمار تے عام لوکاں لئی جو اوہناں نوں موڈھیاں تے بٹھا کے اقتدار دے ایوان وچ بٹھا دیندے نیں اوہناں دی زندگی تنگ رہی اے اوہ مسئلیاں دا شکار رہے نیں۔
دادو وچ لوک سڑ رہے سن۔ بعد وچ اوہناں دے پرسے لئی کوئی نہیں آیا۔ زرداری صاحب تے اوہناں دے فرزند ارجمند حکومت سازی وچ مصروف سن۔ کابینہ وچ کریمنلز نوں شامل کرا کے جشن منا رہے سن۔ بلاول لندن نوازشریف نوں ملن تے صدارت دی خیرات لئی چلے گئے۔ زرداری صاحب فیر صدر بنن گے تے مقدمیاں توں استثنیٰ’ جشن در جشن۔ روم سڑ رہیا سی نیرو بانسری وجا رہیا سی۔ دادو سڑ رہیا سی’ بچے جھلس رہے سن’ نیرو جشن منا رہیا سی۔ کابینہ وچ اوس بندے نوں اوہو وزارت دوائی گئی جہدے جرائم وچ اوہ مطلوب سی۔ ن لیگ تے پی پی پی نے سوچ سمجھ کے باندر ونڈ کیتی۔ وزیر داخلہ تے جہڑے کیس نیں اوہناں نوں ویکھو تے وزارت نوں ویکھو۔ انسداد منشیات دی وزارت اوہنوں دتی گئی جہدے تے منشیات دے کیس نیں۔ سندھ وچ سیلاب آئے تے وڈیرے پانی دا رخ اپنی زمین بچان لئی دوجے پاسے موڑ دیندے نیں۔ پانی دی لوڑ ہوندی تے اپنی زمیناں ول نہراں کھول دیندے نیں۔ خورشید شاہ صاحب آ بی وسیلیاں دے وزیر بنا دتے گئے۔ اوہ کالا باغ ڈیم دے مخالف ای نہیں دشمن نیں۔ اوہناں توں خیر دی توقع کیویں کیتی جا سکدی اے۔ ہن اوہناں دی زمین آباد ہووے گی یاں اوہناں دے سر تے دست شفقت رکھن والیاں دی۔ اوہناں وانگوں ہور 24 وزراء اجے ضمانتاں تے رہا نیں۔ عمران خان دی حکومت گئی۔ رجیم چینج اپریشن کامیاب رہیا۔ عدم اعتماد دی تحریک دوران تے اوہدے بعد آصف زرداری تے شہبازشریف دیاں پھرتیاں’ چلنیاں پھرنیاں’ آنیاں جانیاں قابل دید سن۔ عدالتاں وچ پیش ہون دا معاملہ ہووے تے لاٹھی دے سہارے چلدے نیں’ چک پئی ہوندی اے۔ عدالت وچ کھڑے ہون نال معذور ہوندے نیں۔ اقتدار دا اجیہا نشہ کہ اوہناں نوں دڑکی لان دا کہیا جاوے تے گریز نہیں کرن گے پر اوہناں دی نظر جے نہیں تے لوکاں ول نہیں۔ اوہناں دے مسئلیاں ول نہیں۔ عوام سڑ رہے نیں’ مر رہے نیں’ جھلس رہے نیں پر ایہ چین دی بانسری وجا رہے نیں۔ ایہ لوکاں نوں ریلیف دین دے دعوے کردے نیں پر حقیقت ایہہ وے کہ لوکاں دا جینا دوبھر ہو رہیا اے۔ لوڈشیڈنگ اک عذاب وانگوں مسلط ہو رہی اے۔ ڈالر فیر اُچی اڑان بھر رہیا اے۔ ملک وچ ڈیزل دی کمی ہو رہی اے۔ پٹرول مہنگا کر کے پاکستانیاں دی عید دیاں خوشیاں نوچن تے مفتاح اسماعیل تلے ہوئے نیں۔ اک پاسے ایہ حکومت سابق حکمراناں تے معیشت دی بدحالی دا الزام لاندے نیں دوجے پاسے مفتاح کہندے نیں کہ ڈیفالٹ دا خطرہ نہیں ایہدا مطلب اے کہ عمران خان حکومت مضبوط معیشت دے کے گئے نیں۔٭٭

اپنا تبصرہ گھلو