کیلا ! توانائی، حیاتین تے معدنی اجزاء دے حصول دا بہترین ذریعہ

پروفیسر سید حکیم عمران فیاض

کیلا اک ایسا پھل اے جہنوں ہر عمر دے جی شوق نال کھاندے نیں۔ ایہہ پھلاں وچ سب توں نرم پھل اے۔ ایہدا تعلق جنوب مشرقی ایشیا نال اے۔ ایس ویلے دنیا دے 107ملکاں وچ کاشت کیتا جاندا اے۔ ایہدے درخت دی اُنچائی 6توں 7 میٹر تے پتیاں دی لمبائی 2.7 میٹر تے چوڑائی 60 سینٹی میٹر ہوندی اے۔
کیلا افادیت دے لحاظ نال نمایاں مقام رکھدا اے۔ ایہہ بہت فیدہ مند پھل اے۔ ایہہ معدہ دی ساری بیماریاں پیچش’ پیٹ درد’ معدے دی جلن’ بدہضمی’ قے آنا تے سینے دی جلن وچ بہت مفید اے۔ ایہہ خون دے لال ذرات دی پیداوار وچ وی وادھا کردا اے۔ ایہہ جسم وچ قوت مدافعت پیدا کردا
اے۔ ایہدے اندر بہت سارے وٹامنز وی پائے جاندے نیں۔ ایہدے وچ کاربوہائیڈریٹس 23فیصد’ پروٹین 1.04فیصد تے چکنائی 0.33فیصد ایہدے علاوہ فاسفورس’ کیلشیم’ فولاد’ پوٹاشیم وی خاص مقدار وچ پائے جاندے نیں۔ جسم دے اندر توانائی دی بحالی تے قوت مدافعت دی کمی نوں پورا کرن لئی بہت مفید ثابت ہوندے نیں۔ ایہہ ساڈے جسم نوں توانائی دے نال نال فٹ رکھن وچ سودمند ثابت ہوندا اے۔ ڈپریشن دے شکار بندے ایہدے استعمال نال اپنے بدن وچ نمایاں تبدیلی محسوس کردے نیں۔ایہہ جسم دے اندر خون دی کمی نہیں ہون دیندا۔ ایہہ دماغی طاقت وچ وی وادھا کردا اے تے ایہدے باقاعدہ استعمال نال بندا خواب آور دوائیاں توں چھٹکارا حاصل کر لیندا اے۔ ایہدے استعمال نال اعصابی کھچائو’ السر معدہ نوں کنٹرول کرن دے نال نال حاملہ زنانیاں دے جسمانی درجہ حرارت نوں وی کنٹرول کردا اے جہڑا ماں تے بچے دونواں دی صحت لئی ضروری اے۔
کیلے وچ موجود(ٹرائیپتوفین)نامی پروٹین انسان نوں ذہنی سکون فراہم کردا اے جد کہ پوٹاشیم بلڈ پریشر تے فالج دے خلاف قوت مدافعت ودھاندا اے۔ دو کیلیاں دے استعمال نال انسان نوں 90منٹ دی توانائی حاصل ہوندی اے۔ ایہدے اندر 3طرح دے قدرتی شکر سکروز’ فرکٹوز تے گلوکوز دے علاوہ فائبر (ریشے) وی موجود ہوندے نیں۔ کچے کیلے دا استعمال بطور سبزی کیتا جاندا اے۔
کیلا گرم مرطوب آب و ہوا والے علاقیاں وچ ہوندا اے۔ ایس ویلے ایہہ ہندوستان’ بنگلہ دیش’ پاکستان’ انڈونیشیا’ ویسٹ انڈیز’ فلپائن سنے دوجے ساحلی علاقیاں وچ ایہدی پیداوار اے۔
ایہہ معتدل مزاج دا پھل لیکن کجھ درجہ وچ ایہنوں سرد وی منیا جاندا اے۔ اپنے اوصاف دے لحاظ نال ایہہ جسم نوں جلا بخشدا اے۔ اوہنوں فربہ کردا اے۔ خون نوں گاڑھا کردا اے۔ معدے نوں نرم کرن دے نال نال حلق وچ کھردرے پن نوں دور کردا اے۔ ایہہ خشک کھانی وچ وی فیدہ مند اے۔ ایہہ دستاں نوں روکدا اے۔ صفرا دی زیادتی دی وجہ نال آن والے دستاں لئی آب حیات دا درجہ رکھدا اے۔ باڈی بلڈنگ دے شوقین نوجوان ایہنوں بڑے شوق نال استعمال کردے نیں۔ ایہہ جسم دے سارے اعضا لئی مفید اے۔ گردیاں نوں لاغری دور کرن دے نال نال گرم مزاج افراد دی قوت باہ نوں وی فیدہ دیندا اے۔ایہدا ملک شیک معدے تے آنتاں دے انفیکشن لئی مفید اے۔ ایہہ بچیاں دی نشوونما وچ بہت فعال کردار ادا کردا اے۔ ایہہ ہڈیاں نوں مضبوط کردا اے۔ قد وچ وادھا کرن وچ معاون ثابت ہوندا اے۔
دستاں تے پیچش لئی کیلے دا شیک تے انار دا جوس استعمال کیتا جاندا اے تے ایس مرض وچ فوری افاقہ ہوندا اے۔ ایہہ بذات خود قابض’ دیر ہضم تے نفاخ پیدا کردا اے لیکن مضبوط معدے دے افراد نوں اجابت با فراغت لیاندا اے۔ باڈی بلڈرز تے ایتھلیٹس ایہنوں بڑی پسندیدگی دے نال استعمال کردے نیں۔
کیلے دا شمار لذیز ترین پھلاں وچ ہوندا اے۔ جے ام نوں پھلاں دا بادشاہ آکھیا جاندا اے تے ایہنوں وی پھلاں دا وزیر آکھیا جاوے تے غلط نہ ہووے گا۔ ایہہ قدیم ترین پھل اے جہڑا کہ زمانہ قبل از مسیح توں زیر استعمال اے۔
بطور دوائی کیلے دے پھل’ جڑ تے پتے استعمال کیتے جاندے نیں۔ کثرت حیض تے ہر قسم دے جریان خون نوں روکن لئی کیلے دے پتیاں دی راکھ فیدہ مند ثابت ہوندی اے۔
جلے ہوئے مقام اتے ایہدا لیپ لان نال جلن وچ افاقہ ہوندا اے۔ کیلے دے درخت دے تنے دے چھلکے دے اندر دے گودے نوں زخم تے پھوڑے پھنسیاں اتے لیپ کیتا جاوے تے اوہنوں آرام آ جاندا اے۔ آشوب چشم دی بیماری وچ ایہدے پتے اکھاں اتے بنھن نال آرام آ جاندا اے۔ سپ دے وڈن وچ وی کیلے دے تنے دا رس کڈ کے پلایا جاوے تے آرام آ جاندا اے۔ فشارالدم قوی (ہائی بلڈ پریشر) وچ وی ایہہ مفید اے۔