وَنڈ توں پہلاں دا چونڈہ

آفاق بٹ

چونڈہ فارفز وجید والی روڈ تے چودری طاہر باجوہ ہورآں دے آہر نال ”ونڈ توں پہلاآں دا چونڈہ” دے سرناویں نال بیٹھک دا پربندھ کیتا گیا جہدے اچیچے پروہنے بابا جی احسان باجوہ ہوری سن چونڈہ دے سب توں وڈیری عمر دے بزرگ بابا جی اعجاز باجوہ ہورآں وی خاص کر کے رلت کیتی بابا جی دی حیاتی ہووے ایس سمے او اپنی حیاتی دے 96 ورھے ہنڈا چکے نیں بیٹھک دے رلتی سن سید پھول پیر شاھ گیلانی،حاجی محمد انور جندراں،چودری زاہد باجوہ،نعیم شیخ،آفتاب گل،سید اقرار حسین شاھ،چودری اقبال باجوہ،چودری ریاض جندراں،محمد اقبال بٹ،ماسٹر شاھد حسین ساقی،طاہر عباس کھوکھر،سید ال حیدر گیلانی،چودری اختر حسین سلہری،اقبا بٹ،ریاض کھوکھر،چودری مون باجوہ،چودری طارق باجوہ،چودری عبدالواحد باجوہ،چودری خالد باجوہ،چودری محفوظ باجوہ،عبدالرزاق طور،نوید بلا شیخ تے ہور بوہت سارے سجناں نیں رلت کیتی سائیں ارشاد نوشاہی ہوراں اپنے خاص انداز وچ کلام سنایا تے لوکاں دا من پرچایا اکٹھ وچ رلتی بزرگاں نیں ونڈ توں پہلااں دے سانجھے پنجاب دے وسیب بارے دسیا کیویں سب مسلمان، سکھ، ہندو، عیسای رل کے پیار نال رہندے سن کوی تیری میری نیں سی عزتاں تے شرماں والا وسیب سی دھی بھین سب دی سانجھی ہوندی سی بابا جی اعیجاز باجوہ ہوراں نیں اوس سمے چونڈہ وسدے سرکڈھویں ہندو تے سکھ سرداران بارے جانکاری دتی تے وچھوڑے دے سمے دیاں پیڑاں سانجھیاں کیتیاں جناں جیاں وی یاداں سانجھیاں کیتیاں کوئی اک وی نا دس سکیا کے اک چنگیر تے کھان والے دھرتی دے پتراں نوں کہڑی شے مارا ماری تک اپڑا دتا اخیر تے بھتے ویلے دا ٹکر رل کے کھاہدا چودری طاہرباجوہ ہوراں نیں تندور دیاں مسئیاں روٹیاں دیسی گھیو نال چوپڑ کے نال چاٹی دی لسی دے پرہنیاں دی سیواہ کیتی نال موسم دے فروٹ وی پیش کیتے گئے انج اے پیار ونڈدی بیٹھک ڈیگر ویلے مک گئی ودھیا ہون سمے سارے ایس گل تے اکٹھے سن کے انج دیاں بیٹھکاں دا آہر ہوندا رہنا چاہیدا اے جہدے وچ پرانی پیڑی نویں پیڑی نوں اپنیاں ہڈ بیتیاں سناوے تے پنجاب دے وسیب دا اصل مکھ وکھاوے جہدے وچ پیار سی، شرم سی، حیا سی تے دھرتی سب دی سانجھی ماں سی۔