اوتار گل ۔۔۔۔۔۔بالی ووڈ دا چمکدا ستارہ

Husnain Masoood Pic

حسنین مسعود

اوتار گل بالی ووڈ فلم انڈسٹری دا وڈا ناں اے جنہاں ٹی وی فلم تے سٹیج وچ بھرواں کم کیتا۔اوتار گل نیں جدوں اپنے سفر دا آغاز کیتا تے اوہناں فلم لائن دا کجھ وی پتہ نئیں سی ،ایتھو تک کہ کم لین لئی کیہڑے دفتر جانا اے پر اوہناں دے مالی حالات کافی چنگے سن ایس لئی اوہناں نوں باقی فنکاراںلئی زیادہ محنت نئیں کرنی پئی۔بمبئی آکے اوہناں نیں اپنی گریجوایشن کیتی تے فلم لائن ول آگئے۔اوتار گل دے خاندان وچوں اج تک کسے نیں وی فلماں وچ کم نئیں کیتا نہ ہی اوہناں دا خاندان ایس کم نوں چنگا سمجھدا سی پر اوتار گل نوں اداکاری دا بڑا شوق سی تے کالج وچ ڈرامے کھیڈن تو اوہناں دی زندگی بدل جاندی اے ۔اوہناں نیں سب توں انڈیا دے سب توں پرانے وڈے تے مشہور تھیٹر گروپ “انڈیا پیپلز تھیڑ ایسوسی ایشن”وچ کم کرنا شروع کیتاتے نال ہی فلماں وچ نکے نکے کردار نبھاونے شروع کیتے۔شوق تے جنون نال کم کردے کردے اوہ ویلا آیا کہ اوتار گل نوں دلیپ کمار ،راجیش کھنہ سنے اوس ویلے دے ہر وڈے سٹار نال کم کرن دا موقع ملیا۔موجودہ دور تے پرانے دور دے سارے وڈے فنکاراں نال ہندی،مراٹھی،انگریزی،تیلگو تے پنجابی زبان وچ تن سو تو ودھ فلماں وچ کم چکے نیں۔ہیرو دے رول بارے گل بات کردے ہوئے اوہناں نیں دسیا کہ مینوں اے کدے وی غلط فہمی نئیں ہوئی کہ میں ہیرو دا کردار نبھاواں لیکن میں نوں ایہہ آفر دو وار ملی تے کم وی کیتا سی۔پر اوہ فلماں مکمل نہ ہوسکیاں۔اوتا ر گل ہوراں نیں ولن،سنجیدہ مزاحیہ تے ہر طرح دے ان گنت کردارکیتے نیں۔اوتار دگل انڈین فلم انڈسٹری دا سب توں مہان فنکار دلیپ کمار نوں آکھدے تے منندے نیں،اوہناں دا کہنا اے دلیپ کمار دی شخصیت ایسی سی جیہڑی ہر کسے نوں اپنے سحر وچ ڈوب دیندی سی تے اوہناں نیں پوری زندگی وچ صرف 60فلماں کیتا تے پوری دنیا اوہناں دی مداح سی،دلیپ کمار جیہی شخصیت ہور نئیںجم سکدی۔اوہناں نیں گل بات کردے دسیا کہ بالی ووڈ نوں ٹکر ٹیلگو تے سائوتھ انڈین فلماں دیندیاں نیں ۔پنجابی فلم انڈسٹری نیں وی بڑا مقام بنایا اے تے بڑی زیادہ فلماں بن رہیاں نیں لیکن سب توں زیادہ بزنس دلجیت دوسانجھ دی فلماں کردیاں نیں کیونکہ اوہ بوہت گھٹ فلماں بناندے پر چنگا تے معیاری کم کردے نیں۔اوتار گل نیں بڑی دلچسپ گل دسی کہ پاکستان کرکٹ ٹیم دے سابق کوچ اوہناں دے سجن نیں تے اوہناں نال فلماں وچ کم وی کرچکے نیں۔اوتار گل پاکستانی ٹی وی سیریل دے مداح نیں تے اوہ کہندے نیں فن تے فنکار دنیا دے کسی وی دیش دا ہووے اوہ سب دا سانجھا ہندا اے۔ اداکار ی،موسیقی تے فنون لطیفہ دی کوئی سرحد نئیں۔سیاست داناں دے اپنے مسئلہ نیں پر عوام اک دوجے نوں پیار کردی اے۔ دونوں ملکاں نیں رل فلماں بناون دا جیہڑا کم شروع کیتا اے ایہہ وی اک امن محبت تے پیار دا سنہیا اے۔مینوں زندگی وچ پہلی وار پاکستان وچ گل بات کرکے بوہت چنگا لگ رہیا جے رب نیں کدے موقع دتا تے لاہور سنے پورا پاکستان ضرور دیکھنا اے۔ہمیشہ دعا کرنا کہ انسانیت پیار محبت تے دوستی دا رشتہ سلامت رہے تے اسی وی امن تے محبت دا پرچار کردے رہیے ۔

اپنا تبصرہ گھلو