قربانی والی عید توں پہلاں قربانی

ساڈی سرکار نے عید قرباں توں پہلاں قربانی دا سلسلہ شروع کر دتا اے۔ عمران خان نوں پتہ نہیں کہنے مشورہ دتا سی کہ اسلام آباد وچ دھرنا دین پہنچ جائو۔ چنگے بھلے وڈے وڈے جلسے ہو رہے سن۔ عوام نوں دو دن ذلیل خوار کرن’ سرکاری املاک نوں ساڑن تے کروڑاں ارباں دا نقصان پہچان مگروں جیویں ای خان صاحب نے اسلام آباد توں گھر واپسی دا اعلان کیتا۔ ساڈے وزیر خزانہ نے پٹرول’ ڈیزل دی قیمتاں وچ اکٹھے 30 روپے وادھا کر دتا۔ تے اجے ایہہ شنید اے کہ آن والے دناںوچ انج دا اک ہور زور دا جھٹکا عوام نوں لان دی تیاری اے۔ جی بالکل’ ایہدے لئی آکھیا اے کہ پٹرولیم مصنوعات تے اوہناں دی وجہ نال جہڑی دوجی ضروریات زندگی دی شیواں دی قیمتاں ودھن گئیاں اوہناں دا سدھا اثر عام لوکاں اتے ای پینا اے۔ انج ہمیشہ توں ہوندا آیا اے کہ جدوں جدوں حکمراناں نوں قرض لین لئی یا قرض اتارن لئی پیسیاں دی لوڑ محسوس ہوئی اے اوہناں نے قوم تے ملک دے مفاد وچ سخت تے اوکھے فیصلیاں توں عوام الناس اتے مہنگائی دا بمب چلا دتا۔ تریخ وچ اسیں ایسا کدی نہیں سنیا کہ ملکی مفاد وچ کسے سیاسی پارٹی دے وڈے لیڈر نے اپنی جائیداد ویچی ہووے۔ اپنے اخراجات اتے کٹوتی کر کے قومی خزانے نوں سہارا دین دی کوشش کیتی ہووے بلکہ جدوں جدوں ملک اتے اوکھا ویلا آیا اے ساڈے حکمراناں’ سیاسی پنڈتاں تے اوہناں دے لائق چیلیاں نے اپنے اثاثیاں وچ کئی گنا وادھا کرن دی کامیاب کوششاں کیتیاں نیں۔ میرے ذہن وچ کدی کدی ایہہ خیال آندا سی کہ آئی ایم ا یف’ ورلڈ بینک تے دوجے مالیاتی ادارے قرض دین ویلے ہمیشہ پٹرولیم مصنوعات دی قیمتاں ودھان دی ای گل کیوں کردے نیں۔ کدی ایسا نہیں سنیا اے کہ دنیا نوں معاشی غلام بنان والے ایہناں اداریاں نے قرض دین ویلے حکمراناں نوں ایہہ آکھیاہووے کہ اپنے بیورو کریٹس دی تنخواہاں’ مراعات تے اوہناں نوں میسر پٹرول دی سہولت گھٹ کیتی جاوے۔ کدی ایہہ وی نہیں آکھیا گیا کہ طاقتور محکمیاں دے لوکاں نوں آکھیا جاوے اک مہینے دی تنخواہ نوں ادھار دے کے قرض اتارن وچ اپنا کردار ادا کرو۔ کدی عالمی مالیاتی اداریاں ولوں ایسی کوئی تجویز پیش نہیں ہوئی کہ وڈے گھر’ وڈی گڈیاں تے مہنگے تعلیمی اداریاں وچ بچیاں نوں پڑھان والیاں اتے ٹیکس لایا جاوے۔ کدی وڈے گھراں اتے اوہناں دی مارکیٹ قیمت دے حوالے نال ٹیکس وصول کرن دا حکم وی جاری نہیں ہویا اے۔ انج نہیں اے کہ عالمی مالیاتی اداریاں نوں پتہ نہ ہووے کہ غریب ملکاں وچ کیہڑا کیہڑا ملکی دولت لٹ رہیا اے یا دوجے لفظاں وچ کیہڑے کیہڑے محکمے اپنے اثرو رسوخ نوں استعمال کردے ہوئے اپنی تنخواہاں’ پینشن تے ریٹائرمنٹ مگروں دوجی سہولتاں حاصل حقدار بنے ہوئے نیں۔ عالمی مالیاتی اداریاں نوں سب خبر اے لیکن اوہ ایہناں وڈیاں’ طاقتوراں تے بے پناہ دولت رکھن والیاں اتے سختی کرن داحکم ایس لئی نہیں دیندے کہ ایہہ سارے لوک غریب ملکاں کولوں دولت اکٹھی کر کے امریکہ تے یورپ دے بینکاں وچ جمع کروا رہے نیں۔ دوجے لفظاں وچ ساڈے بیورو کریٹس’ جج’ جرنیل تے وڈے کاروباری جہناں دی دولت امریکہ تے مغرب دے بینکاں وچ اے اوہ حقیقت وچ اوہناں ملکاں دی معیشت نوں مضبوط کرن دا وڈا کارن نیں تے کوئی پاگل ای ہووے گا جہڑا گھر آندی لکشمی نوں دھتکارے۔ آکھیا جا رہیا اے کہ 30روپے پٹرول دی قیمت ودھن تے کدھرے عوام ولوں کوئی شدید ردعمل سامنے نہیں آیا اے۔ ایہدا قطعی مطلب نہیں اے کہ عوام نوں کوئی فرق نہیں پیا بلکہ سچ تاں ایہہ ہے کہ اج عام لوکاں دی مشکلاں وچ بے پناہ وادھا ہو چکیا اے لیکن لگدا اے عوام بے حس ہو چکے نیں۔ حکمراناں ولوں لگن والی ہر ضرب اتے کجھ دیر تلملاندے نیں’ بڑبڑاندے نیں’ کدی کدی دوچار گالھاں وی دیندے نیں تے لین وچ لگ کے اپنے سکوٹر تے کار وچ روزانہ دی لوڑ لئی پٹرول پواندے نیں۔عام لوکاں دا ہر دن مشکلاں دی نویں کہانیاں لے کے آ رہیا اے۔ پٹرول تے ڈیزل دی قیمتاں ودھن نال کچن چلانا اوکھا ہو چکیا اے۔ تے ہن سماجی رابطیاں اتے عوام ولوں اک مطالبہ مشترکہ طور تے سامنے آ رہیا اے کہ ملکی مفاد وچ ہر واری قربانی ساڈے کولوں ای کیوں لیتی جاندی اے۔ کیوں طاقتور محکمیاں تے مالدار لوکاں کولوں ملکی معیشت نوں سہارا دین لئی نہیں آکھیا جاندا۔ بہت ہو چکیا۔ ہن ویلا آ گیا اے ایس توں پہلاں کہ عوام دا غصہ سب کجھ بہا کے لے جاوے۔ سرکار نوں سرکاری نوکراں نوں دتی جان والی مراعات اتے غور کرنا ہووے گا۔ سرکاری زمیناں دی بندر بانٹ بند کرنا ہووے گی۔ جے کوئی ملک لئی خدمات سرانجام دے رہیا اے تے اوہنوں عزت دین دے ہور وی کئی طریقے نیں تے سب توں اہم نقطہ کہ جہڑے ملک وچ لکھاں نوجوان بیروزگار نیں اوتھے سرکاری نوکری توں ریٹائر ہون والیاں لئی دوبارہ نوکری دے کوٹے فوری ختم کرنے ہون گے۔