کجھ مزے مزے دیاں خبراں

مشکل پڑی تو یار ہمارے بدل گئے
لیکن یہ سخت جان اگر سنبھل گئے
وارفتگئی شوق طلاطم نہیں گئی
آنکھوں میں غم جو آئے تو اشکوں میں ڈھل گئے
پہلے کجھ ہلکیاں پھلکیاں گلاں ہو جان کہ اک دو دلچسپ خبراں سامنے آئیاں۔ پہلی خبر ساڈے پیارے کرکٹر مصباح الحق دے حوالے نال اے کہ اوہ فوج وچ جانا چاہندے سن پر قسمت وچ کرکٹ لکھی سی۔ پہلے تے اپنے دوست علی ظہیرمنہاس دا شعر ذہن وچ آیا کہ محبت تو سیاست کا چلن چھوڑ دیا ہم اگر پیار نہ کرتے تو حکومت کرتے۔ اشارا تے تسیں سمجھ ای گئے ہو گے کہ مصباح جے فوج وچ جاندے تے حکومت دا چانس سی کرکٹ وچ وی تے اوہناں نے ناں پیدا کیتا۔ اک حوالا اوہناں دے نال جڑ گیا کہ اک ورلڈکپ وچ اوہناں دی ٹک ٹک اوہناں نوں بابائے ٹک ٹک بنا گئی۔ ایہ انسان دے کمزور لمحے ہوندے نیں۔ کرکٹ نال محبت کرن والیاں نوں یاد ہووے گا کہ مصباح نے بعد وچ چھکے وی مارے پر ایہ اوہ مکے سن جو جنگ دے بعد یاد آئے۔ دوجی خبر چاچا کرکٹ دے حوالے نال نظر آئی کہ چاچا کرکٹ نوں قدرت نے اک تماشائی کرکٹ دے طور تے وی شہرت تے عزت نال نوازیا۔ اوہناں نے ایس شہرت نوں گنبد خضریٰ دا فیض دسیا۔ واقعتاً اسیں وی اوہناں نوں ویکھدے سی کہ پاکستان کرکٹ ٹیم لئی نعرے لان اوہ ہر تھاں اپڑ جاندے تے دوجے سپورٹراں دے نا ل رَل کے اوہ نعرے لاندے۔ ہولی ہولی اوہناں دی اپنی اک پچھان بن گئی اوہ پاکستان لئی خیرسگالی دے سفیر بنے۔ چاچا کرکٹ اک مخلص تے معصوم کردار نیں تے اوہ اک محب وطن پاکستانی نیں پتہ نہیں مینوں شعیب بن عزیز دا شعر کیوں یاد آ گیا:
دوستی کا دعوی کیا عاشقی سے کیا مطلب
میں تیرے فقیروں میں میں ترے غلاموں میں
چلو اک ہور خبر ایہناں دوہاں خبراں نال جڑی اے کہ کرن جوہر نے ابرارالحق نوں نچ پنجابن نچ دا کریڈٹ دے دتا۔ کہندے نیں کہ ابرارالحق نے اوہناں نوں عدالت جان دی دھمکی دتی سی اوہناں نے ڈر کے ابرار دا ناں پوسٹر تے لکھ دتا۔ انج تے ہن ابرار کجھ بدل جہے گئے نیں۔ اک تقریب وچ ملاقات ہوئی تے اوہناں توں نعت وی سنی تے گپ شپ ہوئی اوہناںنے کجھ چر پہلاں میری غزل وی گائی سی موسم تیرے آون نال موسم تیرے جاون نال بندہ کلا رہ جاندا بہتے یار بناون نال۔ پر نچ پنجابن نچ دے کریڈٹ توں فیر دھیان موجودہ واقعات ول ٹر گیا کہ جتھے ٹچ دا تذکرہ چل ریہا اے حمزہ شہباز نے تے باقاعدہ ایس اصطلاح نوں استعمال کردے ہوئے آکھیا اے کہ جے عمران خان نے انتشار پھیلان دی کوشش کیتی تے اوہناں نوں جیل دا ٹچ دیاں گے۔ انج ایہ ٹچ والا جملہ سوری صاحب نے کہیا سی۔ مینوں اک ہور مشہور فقرہ یاد آ گیا بچ موڑ توں بچ ایہدے وچ اک قافیہ سچ دا وی اے ایہ اوہو سچ اے جہدے بارے پروین شاکر نے کہیا سی میں دو شعراں دے دو مصرعے اکٹھے لکھ رہیا واں۔
بات تو سچ ہے مگر بات ہے رسوائی کی
اس نے خوشبو کی طرح میری پذیرائی کی
تسیں ویکھیا کہ ایس طرح وی اک نویں گل پیدا ہو جاندی اے ایسے طرح اک واری خالد احمد نے غالب دے دو وکھرے مصرعے اک تھاں لکھے تے لطف آ گیا:
ہاتھ باگ پر ہے نہ پا ہے رکاب میں
ساقی نے کچھ ملا نہ دیا ہو شراب میں
یقین منو مینوں اپنی صورتحال وی کجھ انج دی ای لگدی اے کہ ساڈے رہنما ہو ا دے گھوڑے تے سوار نیں۔ زمینی حقائق ایس گل دی اجازت نہیں دیندے کہ اسیں اپنی اپنی اناواں وچ سب کجھ داء تے لا دیئے۔ جدوں تک ملک وچ امن تے سکون نہیں آوے گا حالات ٹھیک نہیں ہون گے۔ یکسوئی ضروری اے پر ایتھے تے دھڑکا لگا رہندا اے کہ کدوں کجھ ہو جاوے۔ حکومت نوں تنے ہوئے رسے تے چلنا پے رہیا اے تے اوہدے سر تے اُتوں تھلے دو گھڑے وی دھرے نیں۔ تسیں ایہ منظر ویکھیا تے ہووے گا۔ یقینا کجھ مناظر عجیب تے لگدے نیں کہ راجا ریاض توں نیب دے چیئرمین لئی مشورہ کیتا جا رہیا اے ہور ایہ گل کہ راجا صاحب فرماندے نیں کہ نسے تے عمران خان نیں اوہ تے اپوزیشن وچ ڈٹ کے کھڑے نیں۔ ہن ایہدے تے کوئی کیہ کہوے قسمت دے کھیڈ وچ ایہ انتخاب وی تے خان صاحب دا سی۔ گل ساری اخلاقیات دی اے تے بس فیر آنے دلچسپ خبراں ول۔ سوشل میڈیا تے اک پوسٹ چنگی لگی کہ کسے نے مہنگائی دا حل دسیا کہ نوجوان خان صاحب توں شرٹاں تے آٹوگراف لے لین پر شرٹ کروڑاں وچ وِکی تے اینے پیسیاں نال زرکثیر دا مسئلہ پیدا نہ ہو جاوے ایس گل توں مینوں منیرنیازی دا شاندار جملہ یاد آ گیا اوہ اصغرندیم سید دے نال اپنے اک کیس دی پیروی کر رہے سن کہن لگے ندیم جے مینوں اپنے سارے ڈبے ہوئے پیسے مل گئے تے میں کیہ افراط زر دا شکار نہیں ہو جاواں گا۔ کجھ پوسٹاں حالات حاضرہ دا وی پتہ دیندیاں نیں۔ ڈاکٹر اصغر یزدانی لکھدے نیں کہ اکثر ملکاں وچ خاص طور تے یورپ وچ لوک اک دوجے نوں دھمکی دیندے نیں کہ میں تینوں کورٹ وچ ملاں گا پاکستانی اکثر ایس طرح کہندے نیں کہ میں تینوں روز قیامت پچھاں گا۔ دیکھو ساڈا روز قیامت تے کناں پکا ایمان اے۔
اب ذرا تفصیل سے اے قاصد خوش رو بتا
اس نے پہلے کیا کہا پھر کیا کہا پھر کیا کہا