آکھن لوک سیانے

بھجدیاں نُوں واہن اِکو جیہا ہوندا اے
معنے: بھجدیاں: نٹھدیاں ہویاں٭ واہن: واہی ہوئی بھوئیں۔
ویروا:مت دِتی گئی اے پئی کِسے دی شرم حیا تاں اودوں تیکر ہوندی اے جدوں بندہ اِک دُوجے دے سامنے نہ آن کھلووے۔ جدوں بندہ کِسے دے مقابلے وِچ نِکل ای پوے تاں اوہناں دُونہاں لئی راہ دِیاں اؤکھتاں اِکو جیہیاں ای ہوندیاں نیں۔
بھجی ٹُٹی دا پتن میلہ
معنے: بھجی ٹُٹی: پِچھے رہ گئی ‘ رہی رُّنی میلہ: میل
ویروا:مت دِتی گئی اے پئی دریا وِچوں لنگھن ویلے جے کوئی بندہ پِچھے رہ جاوے تاں اوتھے جا کے پتن اُتے بیڑی دی اُڈِیک وِچ پِچھلے مَٹھے ٹُرن والے وی نال رَل جاندے نیں۔اتے سارے مڑ کے اکٹھے ہو جاندے نیں۔
بھجی ٹُٹی مُنگلی’ گوہیاں جوگی نہ
معنے:مُنگلی: ڈنگراں لئی کِلّے ٹھوکن والا مُوہلا
ویروا:مت دِتی گئی اے پئی ڈنگراں دے کِلّے ٹھوکن والی مُنگلی گوہیاں جوگی جے کر نہ ہووے تاں اوسدے مُنگلی ہون وِچ شک ہوندا اے۔ایس لئی پئی مُنگلی تاں ٹُٹی وی ہووے مُڑ وی گوہے بھن لیندی اے۔
بھجی مُنگلی وی بھانڈے بھنن جوگی ہوندی اے/ بھجی ہوئی مُنگلی’ سؤ بھانڈے بھن دی اے/بھجی ہوئی مُنگلی وی گوہے بھنن جوگی ہوندی اے
معنے: مُنگلی: کِلے ٹھوکن والا لکڑ دا ہتھؤڑا٭ بھنن: توڑن۔
ویروا:مَت دِتی گئی اے پئی مُنگلی بھانویں اُکہی گئی گُذری کیؤں نہ ہووے پر اوہ بھانڈے جاں گوہے تاں ہر حال وِچ بھن ای سکدی اے۔تگڑا بندہ لکھ ماڑا وی پَے جاوے اتے اوس تے لک غریبی وی آ جاوے پر مُڑ وی اوہ اپنے توں لِسیاں دے تاں پاسے سیک ای سکدا اے۔اتے اوہناں نال نجٹھ سکدا اے۔
بھرانواں دی کار مِلو’ بیگانیاں دی کار گھِنو
معنے:کار: وانگ٭ گھِنو: لئو۔
ویروا:مت دِتی گئی اے پئی جدوں وی کِسے نُوں مِلو تاں اوس نال پیار مُحبت نال اِنج مِلو جِویں سکیاں بھرانواں نال مِلی دا اے پر جدوں کوئی لَین دین دا مسلہ ہووے تاں اگلے کولوں پُوری شَے لَے لَینی چاہیدی اے۔٭