مہینا وار پرچاکاری

اوہناں نے 1950 دے دہاکے وچ اردو وچ لکھنا شروع کیتا۔ صفدر میر دے آکھن اتے کہ سارے پنجابی لوک اردو وچ لکھدے رہے تاں مادری زبان وچ کون لکھے گا محمد آصف خاں نے 1956 وچ پنجابی وچ لکھنا شروع کیتا تے فیر پنجابی دے ای ہو کے رہ گئے۔ اوہناں نے کہانی وی لکھی تے کھوج دا بہت سارا کم کیتا۔ اوہناں دے کھاتے اک درجن توں ودھ کتاباں نیں۔
محمد آصف خاں نے 1960 وچ رسالا پنجابی ادب شروع کیتا۔ جہڑا دس سال نکلدا رہیا۔ بعد وچ پنجابی ادبی بورڈ قایم کیتا گیا تاں اوہدے نال جڑ گئے فیر اک وقت آیا جدوں آصف خاں ایہدے سیکرٹری بنے۔ اوہناں نے بورڈ دے ممبراں کولوں منظوری لے کے ایسے رسالے نوں تماہی (تن مہینے مگروں آون والا) رسالے دے طور اتے نویں سریوں جاری کیتا۔ محمد آصف خاں ای اپنی وفات تیکر ایہدے ایڈیٹر رہے۔ اوہناں مگروں ایہنوں راجا رسالو کڈھدے رہے تے اج کل جانی پچھانی کہانی کار پروین ملک ایہدے ایڈیٹر نیں۔ محمد آصف خاں ہوراں 2000 وچ وفات پائی۔
رسالا پنجابی ادب تعارف تے ہیئت:
رسالا پنجابی ادب دا پہلا شمارا جنوری 1960 وچ ساہمنے آیا۔ ایہدا سایز 20 x 30 / 8 سی تے عام طور اتے 56 صفحے ہوندے سن۔ اوس ویلے آصف خاں ہوری سرکاری ملازم سن تے قانون دے مطابق رسالا نہیں سی کڈھ سکدے۔ ایس لئی رسالے دا اجازت ناما (ڈیکلریشن) اوہناں نے اپنے والد محمد عبداللہ خاں دے ناں نال لیا جد کہ ایڈیٹر دے طور اتے مختلف ویلیاں وچ صوفی تبسم، حکیم شیر محمد ناصر تے کئی ہورناں دے ناں چھپدے رہے۔ محمد آصف خاں اک چنگے کہانیکار سن تے اوہناں نے اپنے رسالے وچ وی افسانے یاں کہانی دے فروغ لئی بہت کم کیتا۔ ایتھوں تیکر کہ پہلے ای سال ایہدا 8واں شمارا (اگست) 1960ء کہانی نمبر دے طور اتے شائع کیتا جہدے وچ مشرقی تے مغربی پنجاب دے نامور کہانیکاراں دِیاں کہانیاں شامل سن۔ محمد آصف خاں ترقی پسند سوچ رکھدے سن تے ایہ رسالا وی ایسے سوچ دی نمایندگی کردا سی۔
پنجابی ادب وچ بہت اچی پدھر دے مضمون تے افسانے چھپدے سن۔ ایہدے وچ شاعری وی بہت معیاری چھپدی سی تے انج ایہ پاکستان دے معیاری پنجابی رسالیاں وچ شامل سی۔ منے پر منے لکھاری ایہدے وچ لکھدے سن جویں کہ شفقت تنویر مرزا احمد سلیم راجا رسالو صفدر میر شریف صابر سمیع اللہ قریشی وغیرا۔
پنجابی ادب دا دوجا دور:
مہیناوار پنجابی ادب 1970 تیکر اک معیاری رسالے دے طور اتے نکلدا رہیا۔ ایہدا بند کیتا جانا معاشی مجبوری پاروں سی۔ محمد آصف خاں ہمیشا ایس سوچ وچ رہے کہ ایہنوں کسے طرحاں دبارا جاری کیتا جاوے۔ اوہناں دا ایہ خاب 1986 وچ پورا ہویا تے تماہی دے طور اتے ایہدا اجرا اک واری فیر ہویا۔ ایس واری ایہدا سایز 23×36/8 سی پہلے شمارے دے صفحے 96سن۔ (جاری اے)