پِلاک دے پربندھ ہیٹھ ڈاکٹر اختر شمار ولوں تصوف راہیں ڈپریشن دا علاج” دے سرناویں اتے لیکچر

پنجاب انسٹیٹیوٹ آف لینگوئج’ آرٹ اینڈ کلچر (پلاک)’محکمہ اطلاعات و ثقافت پنجاب دے پربندھ ہیٹھ ڈاکٹر اختر شمار نے ”تصوف راہیں ڈپریشن دا علاج” دے موضوع اتے لیکچر دتا۔ اوہناں نے آکھیا کہ 21ویں صدی دے انسان دا سب توں وڈا مسئلہ ڈپریشن اے جہدی سب توں بنیادی وجہ اللہ تعالیٰ دی تقسیم توں بغاوت اے۔ ہر بندا اپنے توں ودھ خوشحال انسان نوں ویکھ کے خود نوں چھوٹا محسوس کرن لگدا اے۔ اوہ اللہ تعالیٰ دے اوہناں انعاماں وَل توجہ نہیں دیندا جہڑے اوہنوں آپ حاصل نیں۔ اج کل دے انسان وچ شکرگزاری دا جذبہ بالکل ختم ہوندا جا رہیا اے۔ اوہ لاحاصل دی دوڑ وچ جوکجھ اوہنوں حاصل اے بُھل جاندا اے۔
اوہناں نے ہور آکھیا کہ جے اسیں اپنے دل نوں بغض’ کینے تے حسد توں پاک کر لیے تے دنیا وچ آئون دا مقصد جان لیے تے اوہدی تیاری وچ لگ جائیے تے کوئی وجہ نہیں سانون ڈپریشن جئی بیماری توں چھٹکارا نہ مل سکے تے اللہ تعالیٰ دی مخلوق نال پیار معرفت الٰہی دا ذریعہ اے۔ اوہناں نے آکھیا کہ گھٹ کھانا’ گھٹ سونا تے گھٹ بولنا ایسی عادتاں نیں جہناں نوں اختیار کر کے اسیں بہت ساری پریشانیاں تے مسئلیاں توں بچ سکنے آں۔ موبائل دے بے جا استعمال نے ساڈی معاشرتی زندگی نوں بہت متاثر کیتا اے۔ اسیں اک دوجے دے کول رہندے ہوئے وی بہت دور ہونے آں۔ حضرت علی دا فرمان اے کہ ”اسیں ستے ہوئے آں موت آوے گی تے اسیں بیدار ہو جاواں گے”۔ لیکچر دے اختتام تے ڈاکٹر اختر شمار نے حاضرین ولوں کیتے گئے سوالاں دے جواب وی دتے۔ ڈائریکٹر جنرل پلاک ڈاکٹر صغرا صدف نے ڈاکٹر اختر شمار نوں گلدستہ پیش کیتا تے سارے حاضرین دا شکریہ ادا کیتا۔