ٹیکسی ویگن کمیشن قائم کرن دی تجویز

پچھلے چار ورھیاں توں مہنگائی دے بمب غریب تے جس بے دردی نال سٹے جاندے رہے نیں ہن ایہدی انتہا اے۔ ہن شہریاں دیاں چیکاں وی نکل گئیاں نیں جدوں توں ایہ نویں حکومت جہڑی وکھووکھ سیاسی پارٹیاں دا مرقع اے قوم نوں یقین دوایا سی کہ اسیں مہنگائی دے جن نوںبند کرن دی کوشش کراں گے۔ ایس جن دا کنٹرول آئی ایم ایف دے کول اے اسیں چھیتی اوہناں نال مذاکرات کراں گے کہ ساڈے توں پہلے والے جو مہنگائی دے جن نوں کنٹرول کرن دا معاہدہ کرکے گئے نیں اوہ سانوں منظور نہیں۔ ایہ گلاں اوہناں نال کیتیاں گئیاں پر جواب ملیا جے تسیں ساڈے نال گل کرنی اے تے فقیر دی حیثیت نال گل کرو۔ فیر اکھاں بند کرکے سر جھکا کے کہیا ساڈا ملک ایس مہنگائی دی وجہ نال چل نہیں رہیا اسیں ایہنوں چلانا چاہنے آں۔ تسیں ساڈے نال تعاون کرو۔ کجھ ریلیف دیو! جواب ملیا سن لوو جو تہاڈے توں پہلی حکومت ساڈے نال معاہدہ کرکے گئی اے اوہدی شرط پہلے پوری کرنی ہووے گی فیر تہاڈی گل سناں گے۔ نہیں تے’ ایہ پیغام نویں کابینہ دے سامنے رکھیا گیا۔ ساریاں نے ایہو کہیا ایہدے بناں کوئی واہ نہیں۔ پچھلی حکومت دے معاہدے دے مطابق تیل دی قیمت ہور سو روپیہ تک لے جانی ہووے گی۔ ایسے طرح بجلی دیاں قیمتاں ودھانیاں ہون گئیاں ایس لئی ہن تک سٹھ روپیے دا مہنگائی دا بمب دو ہفتیاں وچ سٹیا جا چکیا اے۔ اوہناں دیاں شرطاں تے عمل کرن مگروں ہور ادھار دین دی گل کر سکاں گے۔ اسلامی ملکاں نال رابطہ کیتا تے اوہناں کہیا پہلے اوہناں دیاں شرطاں پوریاں کرو فیر اوہ جو سانوں کہن گے فیر انج ای سلوک تہاڈے نال کیتا جاوے گا۔ ہن حکومت نے اوہناں دی گل من کے مہنگائی دے جن نوں بوتل چوں باہر آن دتااے۔ ہن دس دیہاڑیاں وچ سٹھ روپیے پٹرول دی قیمت وچ وادھا ہو چکیا اے ہور وادھے دی یقین دہانی کرائی اے ایہدے بعد جن بوتل وچ کجھ عرصے تک بند رہوے گا پٹرول دیاں قیمتاں نال مہنگائی نے غریباں دا جینا اوکھا کر دتا اے۔
کہیا جاندا اے کہ مہنگائی نال مڈل کلاس دا سب توں ودھ نقصان ہویا اے۔ امیر تے غریب برداشت کر لیندے نیں پر ایس پٹرول دے مہنگائی بمب دی وجہ نال زندگی دا ہر شعبہ متاثر ہویا اے۔ عام بندے دے گھر دا بجٹ سب توں ودھ متاثر ہویا اے۔ گھریلو لائف متاثر ہوئی اے۔ ایس مہنگائی دے طوفان نوں روکن لئی کجھ حکومتی اقدام ہنگامی بنیاداں تے کرن دی لوڑ اے۔ آئی ایم ایف دے قرضیا ںدا ذمہ دار اشرافیہ اے یاں اوہ سرکاری طبقہ اے جہناں نوں بجلی مفت’ پٹرول مفت’ میڈیکل مفت’ رہائش مفت’ گڈیاں مفت’ سفر مفت’ نوکر مفت’ گارڈ مفت’ لکھاں وچ تنخواہواں نیں۔ ایہناں وچ اوہ وی نیں جو لکھاں وچ پنشن لیندے نیں تے غیرملکاں وچ نوکریاں کردے نیں۔ ملک دے باہر رہائش رکھدے نیں۔ ریٹائر ہو کے نوکریاں کر رہے نیں۔ ایہ اوتھے وی تنخواہواں تے مراعات لیندے نیں۔ انج دی ای مراعات ایتھے وی لے رہے نیں۔ گھٹو گھٹ اجہے لوکاں تے ہتھ رکھو اوہناں تے پابندیاں لائو۔ فری پٹرول دینا سرکاری گڈیاں دینا بند کر دیو۔ لوکاں لئی سرکاری ٹرانسپورٹ عام کرو۔ سڑکاں ٹھیک کرو’ سڑکاں دا کم چھٹی والے دن وی کیتا جاوے پر ایتھے سڑکاں دا کم دفتراں وانگوں کردے نیں۔ لیبر چھٹی تے ٹر جاندی اے لوک خوار ہوندے نیں۔ اسلام آباد ایکسپریس دا روات توں گلبرگ گرین تک مندا حال اے۔ چار ورھیاں وچ ریلوے دا کورنگ برج نہیں بن سکیا۔ گلبرگ گرین دا برج دا میٹریل تیار اے اوہنوں برج تے نہیں رکھیا جا سکیا مکمل نہیں کر سکے جہدے نال ٹریفک دا بھیڑا حال اے۔ اجہے وچ پٹرول دا ضیاع ہوندا اے جے سڑکاں دی حالت تے دھیان دتا جاوے تے پٹرول دی کافی بچت ممکن اے۔ اسلام آباد ایکسپریس وے تے وی میٹروبس چلائی جاوے۔ سرکاری بساں’ ویگناں چلائیاں جان۔ ترقی یافتہ ملکاں وانگوں پاکستان وچ وی ٹیکسی ویگن کمیشن دا ادارہ تشکیل دتا جاوے۔ ایس ادارے دی اپنی فورس ہووے تے اوہناں دے اپنے ڈرائیونگ لائسنس دین دا ادارہ ہووے۔ اپنی مکینک ورکشاپ ہووے جو گڈیاں دے فٹنس سرٹیفکیٹس ایشو کرے۔ ٹیکسی تے میٹر لائے جان’ کرایہ مسافر توں میٹر دے مطابق لیا جاوے۔ ادارے توں بہت سارے لوکاں نوں روزگار ملے گا۔ حکومت نوں ایہدے توں مالی فائدہ ہووے گا۔ حکومت شہریاں نوں روزگار دے سکے گی۔
مہنگائی دا مقابلہ ہر بندے نوں آپ ای کرنا ہووے گا۔ مہنگائی تے حالات توں تنگ آ کے خودکشیاں نہ کیتیاں جان’ رزق تے موت دا ذمہ اوس ذات کول اے۔ اوہ ذات تے پتھر دے اندر کیڑے نوں وی رزق دیندی اے ایس لئی گھبرانا نہیں’ محنت کرنی اے گھر وچ سبزی اگائو’ ککڑیاں رکھو’ پھل دار رُکھ لائو’ سی ڈی اے حکام اگے گزارش اے کہ اسلام آباد وچ پھل دار رُکھ لائو۔ آئی ایم ایف توں چھٹکارا پان دا اک حل ایہ وی اے کہ اپنے ملک وچ اناج پیدا کرو۔ کساناں نوں سہولتاں دیو’ زراعت نوں ترقی دیو’ اداریاں نو ںٹھیک رکھو’ فوری طور تے سرکاری افسراں’ وزیراں تے مشیراں نوں مفت پٹرول دینا بند کر دیو۔ پنجاب تے کے پی کے نے وزیراں نوں انج کرن دی ہدایت جاری کر دتی اے۔ ویکھنے آں دوجے صوبے ایہدے تے کدوں عمل کرن گے۔ جج تے جنرل کدوں اجہے احکامات جاری کردے نیں۔ جوڈیشری نوں چاہیدا سی کہ اوہ مہنگائی دے حوالے نال تنخواہواں تے مراعات گریڈ بائی دے فیڈرل سیکرٹری ورگی کر لیندے۔ اجہے وچ اسلام آباد دے ڈسٹرکٹ اینڈ سیشن جج نوں داد دینے آں جہناں نے چنگا فیصلہ دتا اے کہ ملزماں نوںاڈیالہ جیل توں وڈیولنک تے سنیا جاوے گا ایہدے نال نہ صرف پٹرول بچے گا سگوں گرمی دی اذیت توں وی اوہناں نوں نجات ملے گی۔