ارتکاز توںبھرپور کم کرن دی عادتDeep Work

پیٹرشنک مین اک منے پرمنے انٹر پرینور’ صحافی تے کئی کتاباں دے مصنف نیں۔ اوہناں دا اک واقعہ بڑا دلچسپ اے۔ اوہناں اپنی اک کتاب اتے کم کرنا سی مگر اوہناں نوں ایسا کوئی پرسکون گوشہ نہیں مل رہیا سی جتھے بیٹھ کے اوہ دلجمعی دے نال کم کر سکن۔ اوہناں نے امریکہ توں ٹوکیو تک بزنس کلاس دا ٹکٹ لیتا تے جہاز وچ بیٹھ گئے۔ جہاز ہزاراں فٹ دی بلندی اتے پرواز کرن لگیا۔30 گھنٹیاں تک جاری رہن والے ایس سفر وچ پیٹر نے جی بھر کے کم کیتا۔ اوہناںنے کتاب لئی جہڑے آئیڈیے سوچے ہوئے سن اوہناں اتے وی کم کیتا۔ چونکہ جہاز وچ اوہناں نوں ڈسٹرب کرن والا کوئی نہیں سی ایس لئی اوہ مکمل طور تے اپنے کم وچ جتے رہے۔ چنانچہ جدوں جہاز لینڈ ہویا تے کتاب دا کم وی اپنی تکمیل تک پہنچ چکیا سی۔
تہاڈے ذہن وچ ہووے گا کہ پیٹر نوں ہزاراں ڈالر خرچ کرن دی کیہ لوڑ سی جدکہ اوہناں نوں ٹوکیو وچ کوئی کم وی نہیں سی۔ ایہدا جواب اے:پرسکون تے خموش ماحول’ جتھے انسان مکمل توجہ دے نال اپنا کم کر سکے تے اوہدے کم وچ خلل پان والا کوئی نہ ہووے۔
اپنے کم نوں مکمل توجہ تے ارتکاز نال کرنا کنا ضروری اے تے مستقبل وچ اوہدی کیہ اہمیت ہووے گی ‘ ایس موضوع اتے 2016 وچ اک کتاب شائع ہوئی جہدا نام اے Deep Work’ ایہدے مصنف کالوین نیوپوٹ نیں۔ ایہہ گارج ٹائون یونیورسٹی وچ ایسوسی ایٹ پروفیسر ہون دے نال نال اک بہترین محقق تے مصنف وی نیں۔ ایس کتاب دابنیادی فلسفہ ایہہ اے کہ ہر اوہ کم جہنوں مکمل توجہ تے گہرائی دے نال کیتا جاوے تے ایہدا معیار بہت اعلیٰ ہوندا اے۔ ایہدے الٹ منتشر توجہ دے نال کرن والے کم دی بوہتی اہمیت نہیں ہوندی۔ مصنف دے بقول ہر اوہ انسان جہڑا انتہائی توجہ دے نال کم کرن دا عادی نہیں اے تے اوہ کوئی وڈی کارکردگی وی نہیں وکھا سکدا کیوں جے مستقبل وچ ایہہ کم روبوٹ وی کر سکن گے۔ نیز ایہہ گل وی اے کہ جہڑے انسان وچ Deep Work دی قابلیت نہیں اے تے اوہدے کم نوں کرن والے ہزاراں لوگ مل جان گے کیوں جے بے روزگاری دی شرح ودھ رہی اے تے ہر انسان دی خواہش اے کہ اوہنوں کوئی وی کم مل جاوے جہدے پاروں اوہ کجھ پیسے کما سکے۔
Deep Workکیہ اے؟
Deep Workدا مطلب اے کہ تسیں اک ایسا ماحول بنائو جہدے وچ تہاڈے کم وچ خلل پان والا کوئی نہ ہووے۔ تسیں انساناں دی دخل اندازی’ سوشل میڈیا تے دوجی خلل پان والی چیزاں توں دور رہو۔ اوس ویلے تہاڈی پہلی ترجیح ایہو کم ہووے۔ تہانوں کسے شے دی چھیتی نہ ہووے۔ تسیں ایس کم لئی تیاری کیتی ہووے تے ہن اوہنوں عملی جامہ پہنان دا ویلا ہووے۔ اوس کم دے متعلق تسیں کجھ نویں آئیڈیاز اتے وی کم کرو۔ آسان لفظاں وچ ایہہ آکھ دیو کہ تسیں دنیا تے مافیھا توں بے خبر اپنے کم وچ ڈب جائو۔ جیویں مائیکل اینجلیو دے بارے مشہور اے کہ جدوں اوہ مجسمہ بناندا تے ایس قدر اپنے کم وچ ڈب جاندا اکہ اوہنوں دوجی چیزاں دا ہوش ای نہیں رہندا۔ اک واری اوہ اک مجسمے اتے کم کر رہیا سی جہنوں بنان وچ کئی دن لگ گئے۔ کم ختم ہون مگروں جدوں اوہ تازہ دم ہون لئی اپنے کپڑے تے جوتے تبدیل کرن لگیا تے اوہدے پیراں توں جوتیاں نکل ای نہیں رہیاں سن۔ کئی دن تک پائے رہن دی وجہ نال اوہ اوہدے پیراں دے نال چمٹ گئے سن۔ بڑی کوشش مگروں اوہنے جوتیاں کڈ تے لیاں لیکن نال ای اوہدے پیراں دی کھل وی اتر گئی۔ مائیکل انجلیو دے Deep Work دا ای نتیجہ اے کہ اوہدا بنایا گیا مجسمہ سٹیچو آف ڈیوڈ فن مجسمہ سازی دا اک اعلیٰ شاہکار اے جہنوں ویکھن لئی اج وی ہزاراں لوک آندے نیں۔
Deep Workدا اک فیدہ ایہہ اے کہ ایہہ تہاڈے سوچن دی طاقت نوں ودھا دیندا اے۔ جدوں تسیں بھرویں توجہ تے ارتکاز دے نال کوئی کم کر لیندے او تے تہاڈا کم منفرد ہو جاندا اے تے ایہو انفرادیت تہاڈے لئی ترقی دے بوہے کھولدی اے۔
مصنف دسدا اے کہ دنیا جس قدر تیزی نال ترقی کر رہی اے اوہدی وجہ نال بہت ساری نویں چیزاں سامنے آ رہیاں نیں۔ آئی ٹی انڈسٹری دی ترقی دی وجہ نال دنیا بھر دے بہت سارے کم Auto اتے چلے جان گے تے انساناں وچ مقابلہ بازی دی سخت فضا قائم ہووے گی۔ ایسے وچ صرف تن طرح دے لوک ہون گے جہڑے کامیاب ہون گے۔
بزنس مین:اوہ انسان جہدے کول بہت سارا پیسہ ہووے تے اوہ ایہدے پاروں اک انڈسٹری کھڑی کر لووے
آئی ٹی ایکسپرٹ: آئی ٹی دی شاندار ترقی پاروں ہن ورچوئل ورلڈ اک حقیقت بن چکی اے تے آئی ٹی ایکسپرٹ دی مانگ وی ودھے گی۔
Deep Work: کسے انسان دے کول بے تحاشا پیسہ نہیں اے تے اوہ آئی ٹی ایکسپرٹ وی نہیں اے تے اک ای چیز بچدی اے جہنوں اپنا کے اوہ مقابلے دی ایس دوڑ وچ کامیاب ہو سکدا اے تے اوہ اے Deep Work دی قابلیت۔
Shallow Work:مصنف نے Deep Workدے مقابلے وچ Shallow Work دی اصطلاح استعمال کیتی اے جہدا مطلب ایہہ اے کہ تسیں مکمل توجہ دے نال کم نہیں کر رہے بلکہ کم کردے ہوئے تسیں ہر دو منٹ بعد موبائل وی ویکھدے او۔ میسجز دا جواب وی دیندے او۔ دوجے لوکاں دے نال گل بات وی کردے او۔ تہاڈے سامنے سکرین اتے اک سنسنی خیز میچ وی چل رہیا اے تے تہانوں ایہہ فکر کھائے جا رہی اے کہ تہاڈی فیورٹ ٹیم میچ جتے گی یا نہیں تے ایس کم دا معیار بہت کمزور ہووے گا۔ Shallow Work دا نقصان ایہہ اے کہ چونکہ ایس کم وچ تسیں اپنی پوری توجہ نہیں دے پاندے ایس وجہ نال ایس کم دا معیار سطحی ہوندا اے۔ ایہو کم جے کوئی ہور بندہ مکمل توجہ دے نال کر لووے تے اوہ تہاڈے توں اگے ودھ سکدا اے۔
جدوں اسیں کسے کم وچ 100فیصد توجہ دے نال لگے ہونے آں تے فیر موبائل اتے کوئی نوٹیفکیشن آجاندی اے ۔اسیں موبائل چک کے ویکھ لینے آں تے فیر واپس اپنے کم ول آنے آں تے ہن ساڈی توجہ صرف 30فیصد بچی ہوندی اے۔ موبائل اتے آن والا اک میسج ساڈی 70فیصد توجہ نوں اُڈا دیندا اے۔ تحقیق دسدی اے کہ آن والے ویلے وچ انسان دی توجہ دا دورانیہ صرف 8سیکنڈ رہ جاوے گا۔ کیوں جے بے تحاشاDistra ctions (خلل پان والی چیزاں) دی وجہ نال ہن انساناں دی ایہہ صلاحیت کمزور ہوندی جا رہی اے۔ ایس لئی Deep Work کرن والے لوک ای ورلڈ کلاس کارکردگی وکھا سکن گے۔
Deep Workدی اقسام
مصنف نے اس کتاب وچ Deep Workدی کجھ قسماں دسیاں نیں جہڑی کہ تھلے دتیاں نیں:
(1)Monastic Deep Work
تسیں درویشاں تے فقیراں بارے تے سنیا ہووے گا کہ اوہ ساری دنیا چھڈ کے جنگل ول چلے گئے۔ ایہو چیز Monastic Deep Work کہلاندی اے جہدے وچ انسان اپنا سب کجھ چھڈ کے اک ویران جگہ چلا جاندا اے تے اپنے مقصد نوں پان وچ لگ جاندا اے۔ تہانوں ایہہ جان کے حیرانی ہووے گی کہ Microsoftدے بانی بل گیٹس نے وی 1970 وچ ایہہ طریقہ اپنایا سی تے جنگل وچ ٹھکانہ بنا کے اپنے آئیڈیاز اتے کم کیتا سی جہدا نتیجہ اج تہاڈے سامنے اے۔
(2)Bimodal Deep Work
ایہدا مطلب ایہہ ہے کہ نارمل زندگی گزاردے ہوئے تسیں کجھ گھنٹیاں لئی سب کجھ چھڈ کے اک ایسی جگہ چلے جاندے او جتھے تہانوں ڈسٹرب کرن والا کوئی نہ ہووے تے تسیں اپنا کم اطمینان نال کر سکو۔
(3)Rhythmic Deep Work
ایہدے وچ اک ٹائم مخصوص کر لیتا جاندا اے کہ اینے توں اینے وجے تک Deep Work کرنا اے تے باقی ویلے وچ معمول دے مطابق کم کرنا اے۔
(4)Journalistic Deep Work
تسیں اپنی زندگی وچ مصروف او تے معمول دے مطابق کم کر رہے او لیکن جیویں ای تہانوں کجھ ویلا ملدا اے تے ایس موقعے توں فیدہ چکدے ہوئے تسیں Deep Workکرن لگ جاندے او۔ یاد رکھو کہ Deep Workاک انمول قابلیت اے جہنوں اپنے اندر پیدا کرنا بہت ضروری اے کیوں جے صنعتی انقلاب والے دور مگروں ہن اسیں بہت تیزی نال (AIآرٹیفیشل انٹیلی جنس) دے دور وچ داخل ہو رہے آںجتھے انساناں دے کرن والے کم روبوٹس سرانجام دین گے۔ کسے انسان دے کول جے مہارت تے Deep Workدی قابلیت نہ ہووے تے اوہ زمانے توں بہت پچھے رہ جاوے گا۔