تکراری ٹچ تے خواہش ٹچ!
زندگی زیربحث ہووے یاں سیاست’ مخصوص ”ٹچ” نوں ٹچ کرنا ساڈی فطرت اے یاں علت؟ ماہر نفسیات و منشیات ڈاکٹر صداقت علی کہندے نیں ”مخصوص دائرے” وچ رہندے ہوئے اکو جہے موضوع دہران والا انج ای لوپ وچ ہوندا اے جیویںکوئی بھنور وچ پھسی ہوئی بیڑی۔ ایس کیفیت دے زیراثر ٹچ نوں ”ٹچ” کرن دی طلب جدوں شدت پھڑدی اے تے لوپیا نہ صرف ٹچی قرار پاندا اے سگوں ایس ٹچ دی تکرار کرن تے پرلے درجے دا ”ٹچا” کہلاندا اے۔ میدان کوئی وی ہووے کھیل کیسا وی ہووے اجیہا ٹچا عالم بے خودی وچ اجہے اجہے مطالبے تے افعال کر دیندا اے جو بعض نہیں اکثر اوقات ناقابل برداشت تے ناقابل قبول ہوندے نیں۔ جے اجہے ”ٹچے” دا علاج نہ کیتا جاوے تے ایہ ناقابل تلافی نقصان اپڑا کے ”دم” دے دیندا اے۔
”ٹچ” دی تکرار توں دیسی ٹچ زدہ کھیڈ بانٹے تے لٹو یاد آ گئے جہناں وچ ہارن والا جتن والے نوں بنٹے یاں لٹو دیندا سی پر خراب بنٹے یعنی ”ٹچل بنٹے” تے خراب لٹو یعنی ”ٹپل لٹو” قبول نہیں کیتے جاندے۔ ایہ ضابطہ صرف کھیڈ ای نہیں سگوں زندگی دے سارے شعبیاں تے لاگو ہوندا آیا اے۔ پھلاں دی خریداری توں لے کے رشتیاں دی چون تک بہترین انتخاب دا ٹچ ترجیح ہوندا اے پر حیران کن طور تے سیاست وچ بہترین انتخاب دے ٹچ فارمولے تے عمل ہوندا بالکل نظر نہیں آندا۔ پاکستان دی تریخ وچ شاید پہلی واری انج ہویا اے جتھے وفاق وچ ٹچ زدہ دے نال پنجاب وچ ڈمب بزدار جد کہ کے پی وچ ممود ٹچ نے ملک دا دیوالیہ ٹچ آن کر دتا اے۔ دکھ دا معاملہ تے ایہ وے کہ ملک نوں تباہ کرن والا اپنا جرم منن دی تھاں سینہ زوری کیتی جا رہی اے تے اوہدا منہ بند نہیں کیتا جا رہیا۔ کن توں پھڑ کے اقتدار چوں کڈھیا گیا تے پھنکار ٹچ آن کرکے قوم تے ایٹم بمب چلان دا زہریلا بیان چھڑک دتا اجے ایہدے اثرات ختم نہیں سن ہوئے ایسے خوفناک صورتحال دے بارے حکیم سعید تے ڈاکٹر اسراراحمد نے کئی ورھے پہلاں پیش گوئی کر دتی سی۔ ہن حالت ایہ وے کہ مقتدر حلقیاں دیاں امیداں دی شمع بجھان والا ”چنبل” وچ مبتلا ہو چکیا اے بلاناغہ تقریراں تے انٹرویوز وچ اکوجہے موضوع تے نفرت زدہ گل بات مسلسل جاری رکھے ہوئے اے۔ سازی خط ٹچ مسترد ہویا تے صبح دوپہر شام امپورٹڈ حکومت نامنظور دی شرلی چھڈ دتی۔ فیر وی گل نہ بنی تے کورکمیٹی دی مخالفت دے باوجود لانگ مارچ تے دھرنے دا اعلان کر دتا جو توقع دے عین مطابق ”ٹھس” ہو گیا۔
اسلامی ٹچ دے لقمے نے اک گل ثابت کر دتی اے کہ کناں دا کچا کیویں اپنیاں تقریراں نوں ڈرامائی ٹچ دیندا اے۔ حیران آں ملک نوں دیوالیہ بنان والا کس ہٹ دھرمی نال بولدا اے کہ ملک نوں بچان دا ٹھیکہ صرف ساڈا نہیں۔ جنے یوٹرن لئے نیں اوہنے لئے’ ایہدے وچ اوہنے نائن زیرو نوں بہت پچھے چھڈ دتا اے جہادی ٹچ سن کے دھمالاں پان والے زومبیاں نوں جدوں رسوائی ٹچ دا سامنا ہویا تے اوہناں نے واہوا خواری محسوس کردے ہوئے اپنے لیڈر ول ویکھیا پر اوہناں دا بہادر سالار اسلام آباد توں ای فراری ٹچ لے کے پشاور دا مکین بن گیا اے تے ہر ادارے دے بارے ہرزہ سرائی کر رہیا اے۔ اوہنوں محفوظ پناہ گاہ سمجھنا خام خیالی اے کیوں جے جدوں ریاست کسے بندے نوں ”زندان ٹچ” دین دا سوچ لیندی اے تے اوہنوں ذرا برابر وی اوکڑ نہیں ہوندی۔
این آر او دے انکار ٹچ دی تکرار کرن والے سلطان واہی تباہی دا فیس سیونگ پیچ اپ ٹچ جیویں ای آ شکار ہویا تے سوشل میڈیا تے تبصریاں دا طوفان آ گیا اک دلچسپ جملہ ایہ رہیا ”گالھاں کڈھنیاں امریکہ نوں’ تے ترلے ٹھیکیدار دے” دوجا فقرہ کسے شرارت تو ںگھٹ نہیں تے اوہ اے ”بونگا کسے ٹچ نہیں سگوں ٹچ” دی تلاش وچ اے۔٭٭
