پاکستان بھر وچ تحفظ ناموس رسالت ۖ ریلیاں

بھارت دی حکمران جماعت بی جے پی دی انتہا پسند گستاخ زنانی ولوں حضرت محمدۖ دی شان وچ گستاخی کرن دے خلاف اوکاڑہ وچ مذہبی’ سیاسی’ تاجر’ صحافی’ وکلا تے دوجی تنظیماں ولوں تحفظ ناموس رسالتۖ ریلیاں کڈیاں جا رہیاں نیں۔ نماز جمعہ مگروں مرکزی امام بارگاہ ایوان حسین توں شیعہ علما کونسل پاکستان ضلع اوکاڑہ تے انجمن خدام آل عبا ولوں ریلی کڈی گئی جہڑی مقررہ رستیاں توں ہوندی ہوئی پریس کلب چوک اتے جا کے اختتام پذیر ہوئی جہدی قیادت پچھلے ضلعی صدر شیعہ علما کونسل مولانا محمد صاد ق روحانی ،سابق سینئر نائب صدر ڈاکٹر سید امجد علی کاظمی ،سید کوثر رضوی ، سید فخر عباس سبزواری ، سید غضنفر عباس قمی ، ممبر امن کمیٹی حبیب اللہ چوراہی ، جدکہ غیرمسلم کمیونٹی دی نمائندگی پادری عوبید کرامت نے کیتی ، جماعت اہلسنت ، سماجی تنظیم ‘ماڈا’ تے سول سوسائٹی دے عہدیداراں تے ممبراں نے وی رلت کیتی ،مقررین نے ریلی نال خطاب کردے ہوئے آکھیا کہ بھارتی بی جے پی دی رکن نوپور شرما نے حضرت محمدۖ دی شان وچ گستاخی کر کے پونے دو ارب مسلماناں دے دل چھلنی کر دتے نیں۔ عاشقان رسولۖ اضطراب وچ نیں۔ مودی سرکار ولوں ملعونہ دی رکنیت ختم کرنا کافی نہیں ملعونہ نوں فوری سزا دتی جاوے۔ پچھلے ضلعی صدر شیعہ علما کونسل مولانا محمد صادق روحانی نے آکھیا کہ عرب ملکاں نے جیویں بھارتی مصنوعات دا بائیکاٹ دا اعلان کیتا تے ایس گستاخی اتے احتجاج کیتا اے قابل تحسین اے۔ پاکستان دی عوام وی بھارتی مصنوعات ویچن تے خریدن توں اجتناب ورتے۔ اوہناں نے آکھیا کہ نوپور شرما نوں گرفتار نہیں کیتا گیا تے اسیں بھارت اتے واضح کر دینا چاہنے آں اج غازی علم دین شہید دے نقش قدم اتے چلدے ہوئے اسیں اپنا کردار ادا کرن لئی تیار آں۔ ناموس رسالتۖ دے تحفظ لئی جے سانوں اپنی جاناں وی قربان کرنا پئیاں تے ساڈے لئی بڑی سعادت ہووے گی۔ اسیں سرحداں اتے کفن بنھ کے ناموس رسالتۖ دا تحفظ کراں گے۔ انجمن خدام آل عبا دے سید کوثر رضوی نے خطاب کردے ہوئے آکھیا کہ احتجاج کرن والے مسلماناں اتے بھارت وچ جہڑا ظلم تے تشدد ہو رہیا اے۔ اسیں اوہدی بھرویں مذمت کرنے آں۔ خاتم النبیین حضرت محمدۖ نے ہمیشہ امن دا پیغام دتا تے مسلماناں نے کدی کسے دی مذہبی دل آزادی یا گستاخی نہیں کیتی جد کہ اسلام مخالف بیان ناقابل برداشت نیں۔ اوہناں نے آکھیا کہ حضرت محمدۖ دے پروانے ناموس رسالتۖ اتے کٹ مرنا جاندے نیں تے ناموس رسالتۖ دا دفاع ہر قیمت اتے کراں گے۔ حکومت نوں چاہیدا اے کہ اوہ بھارت نال فوری طور تے سفارتی تے تجارتی تعلقات ختم کرے۔ جماعت اسلامی’ جمعیت علما اسلام (ف) کسان بورڈ پاکستان تے انجمن تاجران اوکاڑہ ولوں ریلیاں کڈیاں گئیاںجو مختلف شاہراواں توں ہوندیاں ہوئیاں پریس کلب چوک پہنچ کے اختتام پذیر ہوئیاں۔ دیپالپور وچ مرکزی ریلی صاحبزادہ قاری حسان صدیقی دی قیادت وچ جامعہ ریاض الجنہ توں برآمد ہوئی جہڑی مختلف شاہراواں توں ہوندی ہوئی مدینہ چوک پہنچ کے اختتام پذیر ہوئی۔ ریلی دے شرکا نے پلے کارڈ تے بینرز چکے ہوئے سن جہناں اتے بھارت مخالف نعرے درج سن۔ ریلی دے شرکا نال خطاب کردیاں ہوئیاں صاحبزادہ قاری حسان صدیقی نے آکھیا کہ شان رسالت محمدۖ ہر مسلمان دے ایمان دا حصہ اے تے ایہدی حفاظت وی سارے مسلماناں دا بنیادی فریضہ اے۔ بھارت نوں ہوش دے ناخن لینے چاہیدے نیں تے گستاخی دی مرتکب زنانی نوں اپنے ایس عمل اتے معافی منگنی چاہیدی اے۔