پاک برٹش آرٹس پنجابی سیوک ایوارڈز اِکٹھ

فیصل آباد وچ عالمی علمی، ادبی تے فلاحی تنظیم پاک برٹش آرٹس انٹرنیشنل دے زیر اہتمام ای لائبریری (الفتح سپورٹس کمپلیکس)فیصل آباد وچ مادری زبان نوں دنیا بھر تک اپڑان تے ماں بولی پنجابی دے ودھا لئی لازوال خدمات دی مانتا پاروں پاک برٹش آرٹس پنجابی سیوک ایوارڈ تے کیش انعامات دا اچیچا اکٹھ کیتا گیا۔ایس اکٹھ وچ ماں بولی دے فروغ وچ پیش پیش سیوکاں دیاں خدمات نوں خراج تحسین پیش کیتا گیا۔ ایہہ پی بی اے ولوں پہلا پنجابی سیوک ایوارڈ اے۔ ہُن ان شااللہ ہر سال ماں بولی دے سیوکاں لئی ایوارڈ میلا سجایا جائے گا تاں جے ماں بولی تے پنج دریاواں دی رہتل نوں اچا تے اچیچا بنایا جا سکے۔ ایس اِکٹھ دی نقابت مجیب الرحمن ساحل تے پروفیسر رمشا نعیم نے کیتی۔ ایوارڈ وصول کرن والے ادبا شعرا تے اساتذہ وچ اے ایچ عاطف فیصل آباد ،اکرام مجید پاکستان ،شاہین بٹ انگلینڈ ،ظفر اعوان ڈنمارک، صغیر تبسم بہاولنگر ،بابا سہوتہ ناروے ،صابر ناز شکر گڑھ ،ارشد منظور سانگلہ ہل ، رائے محمد خان ناصر پاکستان ،پروفیسر کلیان سنگھ کلیان ننکانہ صاحب ،پروفیسر سعیدہ بانو فیصل آباد ،محترمہ نیلما ناہید درانی انگلینڈ ، تجمل کلیم چونیاں ،قسور مبارک بٹ ساہیوال ،مشتاق قمر لاہور ،نذیر احمد جوئیہ ،ڈاکٹر فیاض مگیانہ فیصل آباد ، سعید خاور بھٹہ پاکستان ،ملک صفدر شاکر فیصل آباد ،سیف اللہ بھٹی گوجرانوالا ،پروفیسر انور انیق، ارذپریت انڈیا دے ناں شامل نیں۔ بانی پاک برٹش آرٹس ڈاکٹر یونس امین شیخ نے حاضرین نال گل کتھ کردے ہوئے آکھیا پئی مادری زبان نوں کدی وی نہیں بھلانا چاہی دا۔ سگوں اپنی تہذیب کلچر تے تمدن نال جڑے رہن وچ ہی قوماں دی بقا اے۔ جیہڑیاں قوماں اپنی زبان بھل جان اوہ اپنی سیہان کھو دیندیاں نیں۔ دنیا بھر دیاں زباناں ضرور پڑھو پر اپنے آپ تے طاری نہ کرو اپنی زبان نوں ناصرف بھلنا نہیں چاہی دا بلکہ اپنیاں اولاداں نوں وی ماں بولی پڑھنا تے بولنا سکھائو۔ ایہہ ایوارڈ پروگرام ایسے کارن متھیا گیا اے۔ دانشوراں تے استاداں نوں چاہی دا اے پئی پنجابی دی لوڑ بارے گل کریا کرن تاں جے آن والی نسل اپنے پچھوکڑ نوں یاد رکھے۔ کوآرڈینیٹر پاکستان پی بی اے ڈاکٹر ایم ایچ بابر نے آکھیا پئی پنجابی زبان بڑی مِٹھی تے محبتاں وچ گنھی ہوئی زبان اے۔ ایہ صوفیا کرام دی زبان اے۔ ایہی اوہ زبان اے جہدے ذریعے برصغیر وچ اسلام دی تبلیغ ہوئی۔ سانوں اپنی نویں نسل نوں اپنی زبان توں دور کرن دی بجائے زبان دی اہمیت نوں اجاگر کرن دا چارا کرنا چاہی دا اے۔ سیکریٹری پاک برٹش آرٹس نوید حسین صابری نے حاضرین دا شکریہ ادا کیتا تے ایوارڈ یافتگان نوں مبارکباد پیش کیتی۔