لوٹے فارغ

حکمران جماعت نوں وڈا دھچکا ‘تخت لہور کھوہیا گیا۔ پنجاب دے ضمنی انتخابات وچ پاکستان تحریک انصاف نے تریخی کامیابی حاصل کردیاں ہوئیاں ن لیگ نوں شکست نال دوچار کر دتا۔ 20حلقیاں وچوں پی ٹی آئی نے 16نشستاں اتے کامیابی حاصل کر لئی۔ ن لیگ صرف 3نشستاں حاصل کر سکی۔ اک سیٹ اتے آزاد امیدوار کامیاب ہو گیا۔ ایہہ سب اقتدار دے لالچ’ لوٹیاں نوں ٹکٹ تے مہنگائی دا طوفان برپا کرن تے ہویا جہدے کارن ن لیگ فارغ ہو گئی۔ لہور جہڑا کدی پیپلز پارٹی دا قلعہ ہویا کردا سی فیر ن لیگ والیاں نے لاہوریاں دے سر اتے موجاں کیتیاں مگر اوہناں دی رعونت ویکھ کے باشعورلوکاں نے جہڑا حشر کر دتا اوہ مدتاں یاد رہوے گا۔ اقتدار نوں خاندانی میراث سمجھن والیاں نے سوائے الزاماں دی سیاست تے مہنگائی دے سوا کجھ نہیں کیتا۔ پنجاب وچ ضمنی الیکشن مگروں ہن جمہوری روایتاں تحریراں تے بیاناں تک ای نہیں رہنی چاہیدی بلکہ اوہناں دا عملی مظاہرہ وی ہونا چاہیدا اے۔ایتھے مغربی جمہوریت دی گل تے کیتی جاندی اے لیکن اوہدے خواص اتے غور نہیں کیتا جاندا۔ ایہدے وچ جبر دی کوئی مثال نہیں ملدی اے ۔ لوکاں نوں برابر موقعے مہیا ہوندے نیں تے ایہہ ای اصل جمہوریت اے۔ پاکستان دنیا دے اندر رائے رکھن والا 24 کروڑ آبادی دا ملک اے جہڑا کلمے دی بنیاد اتے وجود وچ آیا جد کہ ریاست مدینہ دا نعرہ بلند کر کے عوام نوں اوہناں دے حقوق دوان والے عمران خان دی بیوی بچیاں تے والدین تک نوں سیاست وچ گھسیٹیا گیا جہناں دا کدی سیاست نال تعلق ای نہیں رہیا۔ عمران خان سپورٹس مین نیں تے اوہناں نے ہمیشہ سپرٹ دا مظاہرہ کیتا ۔ اینی گلاں دے باوجود اوہناں نے مریم نواز دے خلاف کوئی گل نہیں کیتی۔ ایہو وجہ اے کہ پاکستان دا ہر باشعور شہری بغیر کسے لالچ دے اپنے عمران خان دے نال چٹان وانگوں کھڑا ہو گیا۔ بلاشبہ عمران خان دے دور حکومت وچ ملک ترقی دی راہ اتے گامزن سی مگر اتحادیاں دی حکومت دے آندے ای ملکی معیشت بری طرح متاثر ہوئی اے۔ عوام نے اپنے ووٹاں دی طاقت نال ایس گیارہ جماعتی مسلط ٹولے نوں شکست دے دتی۔ حالیہ الیکشن دے ہون والے نتیجہ اتے جے اک نظر پائیے تے سارے لوٹے عوام نے فارغ کر دتے بلکہ آن والے الیکشن دا نتیجہ وی دس دتا۔جے اسیں حالیہ ضمنی الیکشن نوں ویکھیے تے نتائج کجھ انج بن دے نیں حلقہ پی پی 217ملتان توں پی ٹی آئی دے امیدوار مخدوم زین قریشی نے ن لیگ دے امیدوار سلمان نعیم شکست دے دتی۔ حلقہ پی پی 158 لہور توں پی ٹی آئی دے امیداور میاں اکرم عثمان نے 37643ووٹ لے کے کامیابی حاصل کیتی جد کہ ن لیگ دے رانا احسن نے 31906 ووٹ حاصل کیتے حلقہ پی پی167لہور توں پی ٹی آئی دے امیدوار شبیر احمد 40511 ووٹ حاصل کر کے کامیاب ہوئے جد کہ ن لیگ دے نذیر احمد چوہان نے 26473 ووٹ حاصل کیتے حلقہ پی پی 170 توں پی ٹی آئی دے امیدوار ملک ظہیر عباس 24688 ووٹ لے کے کامیاب ہوئے جد کہ ن لیگ دے محمد امین ذوالقرنین نے 17519 ووٹ حاصل کیتے۔ حلقہ پی پی 168 لہور توں ن لیگ دے امیدوار ملک اسد علی نے 26169 ووٹ حاصل کر کے کامیابی حاصل کیتی جد کہ پی ٹی آئی دے محمد نواز اعوان 15767 ووٹ حاصل کر کے دوجے نمبر اتے رہے۔ حلقہ پی پی 288 ڈیرہ غازیخان توں پاکستان تحریک انصاف دے امیدوار سردار محمد سیف الدین کھوسہ 58166 ووٹ حاصل کر کے کامیاب ہوئے جد کہ مسلم لیگ ن دے عبدالقادر خان 32212ووٹ حاصل کر کے دوجے نمبر اتے رہے۔ حلقہ پی پی 228لودھراں توں آزاد امیدوار سید محمد رفیع الدین بخاری 45020ووٹ لے کے کامیاب ہوئے جد کہ پاکستان تحریک انصاف دے امیدوار عزت جاوید خان 38338ووٹ لے کے دوجے تے ن لیگ دے امیدوار نذیر احمد خان 34929 ووٹ لے کے تیجے نمبر تے رہے۔ پی پی 7راولپنڈی توں پاکستان تحریک انصاف دے کرنل (ر) شبیر اعوان 44120 ووٹ لے کے اگے جد کہ پاکستان مسلم لیگ ن دے راجہ صغیر احمد 43853 ووٹ لے کے دوجے نمبر تے نیں۔ پی پی 83خوشاب وچ پاکستان تحریک انصاف دے امیدوار حسن اسلم نے کامیابی حاصل کردے ہوئے 48475 ووٹ حاصل کیتے۔ اوہناں دے مقابلے وچ آزاد امیدوار اسلم بھا نے 41752 ووٹ حاصل کر کے دوجی پوزیشن حاصل کیتی۔ پی پی 90بھکر توں پاکستان تحریک انصاف دے عرفان اللہ نیازی 68982 ووٹ لے کے کامیاب ہوئے جد کہ ن لیگ دے امیدوار سعید اکبر نوانی 59856 ووٹ لے کے دوجے نمبر تے رہے۔ پی پی 97فیصل آباد توں پی ٹی آئی دے امیدوار علی افضل ساہی 44550 ووٹ لے کے اگے جد کہ ن لیگ دے محمد اجمل چیمہ 37016ووٹ لے کے دوجے نمبر تے رہے۔ پی پی 125جھنگ توں پاکستان تحریک انصاف دے اعظم چیلہ نے 82382 ووٹ حاصل کیتے تے فتح حاصل کیتی جد کہ پاکستان مسلم لیگ ن دے امیدوار فیصل حیات جبوانہ نے 52128 ووٹ لے کے دوجی پوزیشن حاصل کیتی۔ پی پی توں پاکستان تحریک انصاف دے امیدوار مہر نواز بھروانہ نے 69986 ووٹ حاصل کر کے کامیابی حاصل کیتی جد کہ ن لیگ دے امیدوار مہر اسلم بھروانہ نے 46825 ووٹ حاصل کیتے۔ پی پی 140شیخوپورہ توں پاکستان تحریک انصاف دے امیدوار خرم شہزاد ورک نے 49734 ووٹ حاصل کیتے جد کہ ن لیگ دے امیدوار میاں خالد محمود نے 32812ووٹ حاصل کر کے دوجی پوزیشن حاصل کیتی۔پی پی 202چیچہ وطنی توں پی ٹی آئی دے امیدوار میجر(ر) غلام سرور 61989 ووٹ حاصل کرکے کامیاب ٹھہرے۔ ن لیگ دے امیدوار نعمان لنگڑیال نے 59167 ووٹ حاصل کیتے۔ پی پی 237بہاولنگر توں پاکستان مسلم لیگ ن دے امیدوار فدا حسین وٹونے 61248 ووٹ حاصل کیتے تے پی ٹی آئی دے امیدوار سید آفتاب رضا نے 25227 ووٹ حاصل کیتے۔ پی پی 272وچ پی ٹی آئی دے معظم جتوئی 49823ووٹ لے کے فاتح ٹھہرے جد کہ زہرہ باسط بخاری 42995ووٹ لے کے دوجے نمبر تے رہی۔ پی پی 273 وچ ن لیگ دے امیدوار سبطین رضا نے فتح حاصل کیتی۔ پی پی 282لیہ توں پاکستان تحریک انصاف دے قیصر عباس مگسی 43922ووٹ حاصل کر کے کامیاب جد کہ لالہ طاہر رندھاوا 29715 ووٹ لے کے دوجے نمبر اتے نیں۔ حلقہ پی پی 202 ساہیوال توں پاکستان تحریک انصاف دے امیدوار غلام سرور 62298 ووٹ لے کے کامیاب ہوئے جد کہ ن لیگ دے امیدوار ملک نعمان احمد لنگریال 59191 ووٹ لے کے دوجے نمبر تے رہے۔ ایہناں ہارن والیاں وچ تقریباً سارے دے سارے امیدوار لوٹے سن جہناں نوں نہ صرف ن لیگ دے ووٹراں نے رد کردتا بلکہ ہر باشعور شہری نے رد کردتا۔ ہن ملکی سیاست وچ ہر دن اہم ہوندا جاوے گا۔ وزیراعظم اسمبلی وی توڑ سکدے نیں مگر اوہناں دے اتحادی اجے ن لیگ نوں ہور بدنام کرن لئی انج نہیں ہون دین گے جدکہ پنجاب وچ حکومت دی تبدیلی مگروں وی انج ہوندا نظر نہیں آ رہیا۔