گائیکی ہیر وارث شاہ تے کلام میاں محمد بخش (سیف الملوک) دا پربندھ

پنجاب انسٹیٹیوٹ آف لینگوئج آرٹ اینڈ کلچر (پلاک)’ محکمہ اطلاعات و ثقافت پنجاب دے پربندھ ہیٹھ شہرہ آفاق صوفی شاعر حضرت پیر وارث شاہ دے عرس دی مناسبت نال پروگرام گائیکی ہیر وارث شاہ تے کلام میاں محمد بخش (سیف الملوک) دا پربندھ کیتا گیا۔ جہدے وچ بابا محمد یحییٰ خان نے بطور اچیچے پروہنے رلت کیتی۔ ایس خوبصورت پروگرام وچ ملک دے منے پرمنے گلوکاراں جہناں وچ عمران شوکت علی، بشریٰ صادق، باباگروپ حسنین اکبر و اسلم باہو، تیمور افغانی، شبانہ عباس، میمونہ ساجد، ظاہر حسین تے منظور حسین ملنگ نے ہیر وارث شاہ تے کلام میاں محمد بخش پیش کیتا۔
ایس موقعے تے پروفیسر سعید احمد نے آکھیا کہ ساڈے سارے صوفیا نے واحدت تے یگانگت دا درس دتا اے۔ اللہ دی مخلوق نال پیار بندے نوں اللہ دے کول کر دیندا اے۔ کوئی وی سالک اوس ویلے تک راہ سلوک دی منزلاں طے نہیں کر سکدا جدوں تک اوہ اللہ دی رضا لئی اپنی انا نوں قربان نہیں کر دیندا۔ حسنین اکبر نے آکھیاکہ میرے کول ہیر توں مراد کائنات دا حسن اے۔ جے میں پیر وارث شاہ دے زبان وچ آکھاں تے ظلم دے خلاف آواز بلند کرن دا نام ہیر اے۔ ایس پروگرام وچ دانشوراں’ ادیباں’ شاعراں تے شائقین دی کثیر تعداد نے رلت کیتی۔ ادارے دی ڈائریکٹر جنرل ڈاکٹر صغرا صدف نے سارے معزز پروہنیاں تے گلوکاراں نوں پھلاں دے تحفے پیش کیتے۔ پروگرام وچ نظامت دے فرائض ڈائریکٹر پروگرام ڈاکٹر خاقان حیدر غازی نے سرانجام دتے۔