میجر ڈاکٹر محمد اسلم … اک عظیم انسان

ہوا ہے تجھ سے بچھڑنے کے بعد یہ معلوم
کہ تو نہیں تھا ترے ساتھ ایک دنیا تھی
جون 2022دا مہینہ غم و اندوہ دے حوالے نال ہمیشہ یاد رکھیا جاوے گا جہدے وچ پاک فوج دے اک تابندہ ستارے’ دکھی انسانیت دے بے لوث خادم تے ہردلعزیز مسیحا بھائی جان میجر ڈاکٹر محمد اسلم دی دائمی مفارقت نال اکھاںتوں جوئے خوں رواں ہو گئی۔ اجل دے بے رحم ہتھاں نے ایس شمع فروزاں نوں بجھا دتا جہڑے پچھلے پنج عشریاں توں سرراہ گزار زیست سفاک ظلمتاں نوں کافور کر کے نشان منزل دے رہی سی۔ عجزوانکسار’ خلوص و مروت’ بے لوث محبت’ ایثار تے وفا دا پیکر ساڈی بزم وفا توں اٹھ کے راہ فتگاں اتے گامزن ہو گیا۔ اک انتہائی ذہین تے فطین ‘ قابل تے نیک دل انسان ہمیشہ لئی ساڈے کولوں وچھڑ گیا۔
آہ! برادر مکرم میجر ڈاکٹر محمد اسلم نے چودہ تے پندرہ جون2022دی درمیانی شب عدم دے کوچ لئی رخت سفر بنھ لیتا۔ انسانی خدمت دا اوہ آفتاب جہڑا 11 اگست 1954 نوں ضلع فیصل آباد دے اک نواحی پنڈ چک نمبر87گ ب (بابے دی بیر) توں طلوع ہویا اوہ عدم دی بے کراں وادیاں وچ غروب ہو گیا۔ خدمت انسانی دے ہمالہ دی اک سربہ فلک چوٹی فرشتہ اجل دے ہتھوں زمیں بوس ہو گئی۔ عسکری کالونی نمبر 10لہور دے شہر خموشاں دی زمین نے شعبہ آرمی میڈیکل کور دے ایس خورشید جہاں تاب نوں ہمیشہ لئی اپنے دامن وچ لکا لتا۔ ایس شہر خموشاں دی زمین نے پاک آرمی دے ایس آسمان نوں نگل لیتاجہڑا پچھلے پنج عشریاں توں شعبہ میڈیکل نال جڑے افراد دے سرے اتے سایہ فگن سی۔ اوہدے خدوخال دل و نگاہ نوں مسخر کر لیندے نیں۔ اوہ پاک فوج دے اک درخشاں عہد دی نشانی سن۔ اوہناں دی وفات نال پاک آرمی دا اک زریں عہد اپنے اختتام نوں پہنچیا۔ دنیا لکھ ترقی دے مدارج طے کردی چلی جاوے ایسی نابغہ روزگار ہستیاں تے یگانہ روزگار فاضل ڈاکٹر خال خال پیدا ہوندے نیں۔ اوہناں نے اپنی ساری حیاتی خدمت انسانی تے لوکاں دے علاج معالجے لئی وقف کردتی۔ اوہناں دے بارے پروین شاکر نے آکھیا سی :
رکے تو چاند چلے تو ہوائوں جیسا تھا
وہ شخص دھوپ میں بھی چھائوں جیسا تھا
ساڈے برادر محترم میجر (ر) ڈاکٹر محمد اسلم’فرزند ارجمند حضرت نور محمد نور کپور تھلوی۔ کیپٹن محمد اکرم خاں دے چھوٹے تے ارشد گروپ آف انڈسٹریز دے پچھلے جنرل منیجر رانا افتخار احمد دے وڈے بھرا تے ڈاکٹر اظہار احمد گلزار دے تایا زاد بھراجہڑے ہارٹ دی شدید تکلیف دے کارن سی ایم ایچ ہسپتال لہور وچ وینٹی لیٹر اتے سی۔ رات 14جون 2022 نوں ساڈے تن وجے اپنے خالق حقیقی نال جا ملے نیں۔ اناللہ وانا الیہ راجعون۔
اوہناں دا نمازجنازہ اوہناں دی رہائش گاہ
366-A عسکری 10لاہور وچ 16جون 2022بروز جمعرات دوپہر اک وجے پڑھایا گیا۔ ڈاکٹر موصوف اک درویش منش انسان ہون دے نال اک ہمدرد تے منکسر المزاج مسیحا سن۔ اپنی ساری حیاتی پاک آرمی وچ ہوندے ہوئے وطن عزیز دی سرحداں دی حفاظت کرن والے مجاہداں’ اوہناں دے ورثا تے چھونیاں وچ کم کرن والے فوجیاں دے علاج معالجے وچ صرف کردتی تے ریٹائرمنٹ مگروںبیماراں دی خدمت دا ایہہ سلسلہ ہنوز جاری و ساری سی کہ موت نے اپنا وار کردتا۔
ہائے! رے موتے تجھے موت نہ آئی…
ڈاکٹر میجر محمد اسلم فیصل آباد دے اک نواحی پنڈ چک نمبر87 گ ب (بابے دی بیری) براہ ڈجکوٹ وچ چودھری نور محمد کپور تھلوی دے گھر 11 اگست 1954 نوں پیدا ہوئے۔ اوہناں دے والد گرامی پنجاب ٹرانسپورٹ دے پولیس ونگ وچ موٹروہیکل ایگزامینر فائز سن۔ ایس طرح اوہناں نوں اپنے والد صاحب دی پوسٹنگ دے نال اوہناں نوں مختلف شہراں وچ پڑھن دا موقع ملیا جہناں وچ ملتان خاص طور تے قابل ذکر اے۔ میٹرک کرن مگروں اوہناں ایف ایس سی دا امتحان گورنمنٹ ڈگری کالج سمن آباد فیصل آباد توں اعزازی نمبراں نال پاس کیتا۔ ایف ایس سی دا امتحان اعزاز دے نال پاس کرن مگروں میڈیکل دی تعلیم لئی قائداعظم میڈیکل کالج بہاولپور وچ داخلہ لیتا تے قائداعظم میڈیکل کالج بہاولپور توں (1972-78) دے بیج وچ ایم بی بی ایس دا امتحان پاس کر کے 1978 وچ پاک آرمی نوں بطور کیپٹن ڈاکٹر جائن کیتا تے میجر دے رینک تک پہنچ کے 2004 نوں ریٹائر ہوئے تے مجموعی طور تے 26 سال پاک آرمی دی خدمت وچ گزارے…اوہناں نوں ایہہ اعزاز وی حاصل اے کہ اپنے پنڈ وچ کلے ایم بی بی ایس ڈاکٹر بنے جہناں نے پاک فوج وچ وی اپنا سوہنا نام پیدا کیتا تے اپنے آبائی علاقے وچ وی اپنے خاندان دا نام روشن کیتا۔دوران سروس اوہناں نے انستھیزیا وچ ”ایف سی پی ایس” دی ڈگری حاصل کیتی۔ اوہناں دا شمار اپنے شعبہ انستھیزیا دے مایہ ناز تے سینئر انستھیسٹ وچ ہوندا سی۔ ہسپتالاں وچ 70توں 80 فیصد ذمہ داری شعبہ انستھزیا اتے عائد ہوندی اے ۔ کسے وی ہسپتال نوں شعبہ انستھیزیا دے بغیر چلانا اوکھا اے تے ایس شعبہ دا تعلق آپریشن تک محدود نہیں رہ گیا اے بلکہ آئی سی یو’ ہائی ڈیپنڈنسی یونٹ’ پین کلینک وی شعبہ انستھیزیا دے زیرنگرانی کم کردے نیں۔
ریٹائرمنٹ مگروں اوہناں لاہور میڈیکل ڈینٹل کالج/ گھر کی ٹیچنگ ٹرسٹ ہسپتال لاہور وچ اپنی خدمات سرانجام دینا شروع کیتیاں تے ایتھے وی اپنی صلاحیتاں دا لوہا منوایا۔ اک زیرک ‘محنتی’ ہمدرد’ خدا ترس تے قناعت پسند ڈاکٹر دے طور تے اوہناں ہر جگہ لوکاں دے دِلاں نوں مسخر کیتا۔ جیویں میجر ڈاکٹر محمد اسلم دا ظاہر بالکل اجلیا تے شفاف رہیا اوسے طرح اوہدا باطن وی صاف رہیا۔ میری پسندیدہ شخصیت وچ اوہ ہمیشہ سرفہرست رہے نیں۔ میرے حلقہ احباب نوں فیس بک اتے تے اپنے دوستاں نوں اوہناں دی سالگرہ وِش کرن وچ سب توں پہل اوہو سبقت لیندے سن۔ مینوں علی الصبح جہڑی شخصیت دا سب توں پہلاں دعائیہ تے اسلامی واٹس ایپ میسیج آندا ایس سلسلے وچ بھائی جان سب توں سرفہرست سن۔ اوہناں دے اصلاحی اقدامات تے پاک فوج دی خدمات دے اعتراف اتے ہر پاکستانی اوہناں دا ممنون و مقروض رہوے گا۔ انسانی کردار تے عظمت دا پیکر ایہہ شریف’ دردآشنا تے وضعدار انسان ہن ساڈے وچ موجود نہیں اے۔ ایسے نایاب تے وضع دار لوک ملکوں ملکوں لبھن نال وی نہ مل سکن گے۔
وضع داری کی بہت قدر کرو ایسے لوگ
آج کل صرف کہانی میں نظر آتے ہیں
اللہ تبارک و تعالیٰ اوہناں دی اگلی منزلاں آسان کرے تے اوہناں نوں جنت الفردوس وچ اعلیٰ تے ارفع مقام عطا فرماوے تے حضور اکرمۖ دے پڑوس وچ گھر عطا کرے…آمین’ثم آمین