سیاستدان تے ضرب المثل اشعار

سیاست وچ ہر سیاستدان اپنے مفاد نوں مقدم رکھدا اے۔ الیکشن وچ سیاست دان اپنے مفاد تے مطلب لئی دن رات عوام نال اپنے رابطے ودھا دیندے نیں۔ ہر سیاستدان تے سیاسی جماعت اک دوجے توں ودھ کے خود نوں ملک وقوم دا ہمدرد ثابت کرن لئی کوئی کسر باقی نہیں چھڈدا لیکن جدوں الیکشن گزر جاندے نیں تے ایہو مطلبی سیاستدان اپنے اپنے حلقہ انتخاب توں انج غائب ہوندے نیں جیویں دوبارہ اوہناں نے کدی عوام دی عدالت وچ پیش ہونا ای نہیں۔ اج جد کہ ہر سیاستدان خود نوں عوام دا تابع’ خادم’ فرماں بردار’ ملازم تے نہ جانے کیہ کیہ ثابت کرن دی کوشش کر رہیا اے۔ ایہناں ای سیاستداناں نے کل اپنے حلقہ دے ووٹراں نوں پہچانن توں وی انکار کر دا اے۔ ایہو وجہ اے کہ اج عوام وی ووٹاں نوں بھیک منگن والے سیاستداناں دی خدمت وچ عبدالحی تاباں دا ایہہ شعر پیش کردیاں ہوئے نظر آندے نیں۔
آشنا ہو چکا ہوں میں سب کا
جس کو دیکھا سوا پنے مطلب کا
الیکشن دے بعد دا منظر ایہہ ہوندا اے کہ عوام اپنی گلی محلے یا پنڈ دے کسے کم لئی اپنے منتخب نمائندیاں دی تلاش وچ نکلدے نیں۔ اول تے اوہ اپنے ایم این اے یا ایم پی اے نوں لبھ نہیں سکدے۔ جے ایہہ ارکان اسمبلی مل جان تے اوہناں وچ الیکشن دے دناں والا خلوص’ محبت’ گرمجوشی تے اخلاق غائب ہو چکیا ہوندا اے۔ عوام اپنے کسی کم لئی اصرار یا تکرار کرن تے نام نہاد عوامی نمائندے اکثر اوقات بدمزاجی تے بعض اوقات بدزبانی اتے وی آندے نیں تے عوام لئی ایہناں سیاسداناں نوں مکاطب کر کے درج ذیل شعر سنان دے علاوہ ہور کوئی چارہ نہیں رہندا۔
اپنے قولِ وفا کو بھول گئے
تم تو بالکل خدا کو بھول گئے
عوام نوں اپنی ذاتی تے اجتماعی زندگی وچ افسر شاہی دے ہتھیں بہت دکھ چکنے پیندے نیں۔ کیہڑا سرکاری ادارہ ا ے جہڑا عوام دے نال ظلم تے ناانصافی نال پیش نہیں آندا۔ کرپشن دے ناسور نے سرکاری اداریاں نوں تباہ کر دتا
اے۔ بدعنوان افسر تے اہلکار کرپشن دی چھری نال مظلوم عوام اتے اور کردے ہوئے کدی ترس نہیں کردے۔ عوام اپنی شکایتاں لے کے اپنے منتخب نمائندیاں تک پہنچدے نیں تے اوہناں نوں کدی انصاف نہیں ملدا۔ الیکشن وچ تھانہ کلچر دے نعرے بلند کرن والے سیاستدان مگروں ظالم تے رشوت خور محکمہ پولیس دے معاون تے مددگار بن جاندے نیں۔ پٹواری دی دھونس’ دھاندلی تے رشوت خوری دا عذاب وی سیاستداناں دی سرپرستی وچ عوام دے سراں اتے مسلط رہندا اے۔ سارے صوبائی تے وفاقی سرکاری ادارے جہنی کرپشن کردے نیں۔ ایم این اے تے ایم پی اے حضرات اوہدے وچ برابر دے حصہ دار ہوندے نیں ایس لئی عوام ظلم دی چکی وچ پسدے رہندے نیں۔ عوام چیخدے تے چلاندے نیں لیکن اوہناں دی چیخ تے پکار صحرا دی آواز وانگوں ایس لئی بے سود تے بے اثر ثابت ہوندی اے کیوں جے عوام دے منتخب حکمران اپنے مطلب تے مفاد لئی عوام دے بجائے افسر شاہی دے ساتھی تے رفیق بن جاندے نیں۔ ایس صورتحال وچ فیر عوام نوں نظیراکبر آبادی دے ایس مشہور شعر دا سہارا لینا پیندا اے۔
تھا ارادہ تری فریاد کریں حاکم سے
وہ بھی کم بخت ترا چاہنے والا نکلا
عوام دی سادگی ویکھو کہ جہناں عیار سیاستداناں دے فریب وچ آ کے اوہ اپنے ووٹاں توں منتخب کردے نیں۔ ایہہ سیاستدان عوام دی سادہ دلی تے بھولا پن دا کوئی اک واری فیدہ نہیں چکدے بلکہ تسیں ویکھیا ہووے گا کہ اپنے اپنے حلقے وچ اک ای ایم این اے تے ایم پی اے بڈھا ہو جاندا اے یا دنیا توں رخصت ہو جاندا اے تے اوہناں دا کوئی بھرا یا پتر اوہناں دی جگہ سنبھال لیندا اے۔ سیاستداناں دی مکاری تے سیاسی چالاکیاں اوہناں دے بچیاں نوں منتقل ہو جاندیاں نیں تے عوام دی سادہ دلی تے مجبوریاں غریب عوام دے بچیاں نوں منتقل ہو جاندیاں نیں۔ عوام دے دکھاں دا مداوا ساڈے ملک وچ ایسے لئی نہیں ہو پاندا کہ عوام اپنی بیماریاں تے دکھ درد دے علاج لئی اوہناں ای نام نہاد مسیحاواں نوں بار بار منتخب کردے چلے جاندے نیں جہڑا دراصل ساڈی ساری بیماریاں دے ذمہ دار نیں۔ میر تقی میر نے شاید ایسے ای حالات دی ترجمانی لئی درج ذیل شعر آکھیا سی۔
میر کیا سادے ہیں، بیمار ہوئے جس کے سبب
اسی عطار کے لڑکے سے دوا لیتے ہیں
ایتھے میں ایہہ وضاحت کر دیاں کہ میر تقی میر دے مذکورہ بالاشعر دے دوجے مصرع نوں زیادہ تر لوک درج ذیل صورت لکھدے نیں جہڑی میر دے مصرعے دی وِگڑی ہوئی شکل اے۔
اسی عطار کے لونڈے سے دوا لیتے ہیں
ہن آنے آں سیاستداناں دی اک ہور قبیل یا جنس ول۔ ساڈے ملک دے سیاستداناں وچ وفاداریاں تبدیل کرنا اک مستقل عارضہ اے۔ ساڈے ہاں سیاسی جماعتاں کسے اصولی اختلاف دی بنیاد اتے تبدیل نہیں کیتیاں جاندیاں بلکہ صرف الیکشن جتن یا دوجے کسی وقتی مفاد لئی کوئی وی سیاستدان کسی وی وقت اپنی جماعت نال بے وفائی کر سکدا اے۔ نہ کوئی سیاستدان جماعتی وفاداریاں تبدیل کردے ہوئے شرم محسوس کردا اے تے نہ ای کوئی سیاسی جماعت بار بار وفاداریاں بدلن والے سیاسی مسافراںنوں قبول کرن تے اوہناں نوں اپنا انتخابی ٹکٹ دین وچ کسے اصول پسندی دا مظاہرہ کردی اے۔ تاہم کجھ بدقسمت سیاستدان ایسے وی نیں کہ جہناں نوں بدنامی دی حد تک سیاسی وفاداریاں تبدیل کرن دا مجرم قرار دے کے کوئی وی سیاسی جماعت قبول نہیں کردی۔ ایسے بدنام سیاستداناں اتے میر تقی میر دا ای اک شعر صادق آندا اے۔
پھرتے ہیں میر خوار کوئی پوچھتا نہیں
اس عاشقی میں عزت ِ سادات بھی گئے
ہن ذکر کجھ ہارن والے امیدواراں دا ہو جاوے۔ شکست نال دوچار ہون والے اکثر سیاستدان محمد یار خاں میر دے درج ذیل شعر نال اپنے دل نوں بہلان دی کوشش کرتے ہیں۔
شکست و فتح میاں اتفاق ہے لیکن
مقابلہ تو دِل ناتواں نے خوب کیا
جہڑے امیدوار کجھ ووٹاں نال ہار جاندے نیں۔ اوہناں دی زبان اتے قائم چاند پوری دا ایہہ شعر ہوندا اے۔
قسمت تو دیکھ ٹوٹی ہے جا کر کہاں کمند
کچھ دُور اپنے ہاتھ سے جب بام رہ گیا
اردو دا اک ہور ضرب المثل شعر اے جہڑا شکست کھان والے امیدواراں دے حامی اکثر اپنے دلاں نوں تسلی دین لئی استعمال کردے ہوئے نظر آندے نیں۔
گرتے ہیں شہ سوار ہی میدان جنگ میں
وہ طفل کیا گرے جو گھنٹوں کے بل چلے
سیاست وچ اک دوجے اتے الزام تراشی اج کل دا معمول اے۔ بعض اوقات ایہہ الزام تراشی گالی گلوچ تے قابل اعتراض زبان دی حد تک وی پہنچ جاندی اے۔ گالی گفتار نال کم لین والیاں دا مہذب انداز وچ جواب دین لئی سیاستدان اپنی تقریراں وچ حیدر علی آتش دے درج ذیل شعر نال کم لے سکدے نیں۔
لگے منہ بھی چڑانے دیتے دیتے گالیاں صاحب
زباں بگڑی تو بگڑی تھی خبر لیجئے دہن بِگڑا
منتخب ہون مگروں سالاں تک اپنے حلقیاں توں غائب رہن والے ایم این اے یا ایم پی اے الیکشن دے موسم وچ برساتی مینڈکاں وانگوں فیر وارد ہو جاندے نیں تے ادبی ذوق رکھن والے ووٹر ایسے امیدواراں دا غالب دے ایس شعر دے نال استقبال کردے نیں۔
وہ آئے گھر میں ہمارے خدا کی قدرت
کبھی ہم ان کو کبھی اپنے گھر کو دیکھتے ہیں
سیاستداناں دے اصلی چہرے کجھ ہور ہوندے نیں لیکن الیکشن دے دناں وچ اوہناں نے اپنے چہریاں اتے مصنوعی چہرے سجا رکھے ہوندے نیں۔ بادہ خوار وی اپنے آپ نوں ولی تے پرہیزگار دے روپ وچ پیش کردے نیں۔ بے نماز مسجداں وچ جا کے باجماعت نماز ادا کرنا شروع کر دیندے نیں۔ جھوٹ بولن دے عادی خدا نوں گواہ بنا کے خود نوں سچا ثابت کرن دی کوشش کرتے ہیں۔ جہڑے عام حالات وچ سلام دا جواب دینا گوارا نہیں کردے اوہ ووٹراں نال ہم آغوش ہو کے اوہناں دے متھیاں دا بوسہ لے رہے ہوندے نیں۔ ایسے سیاستداناں دی تعریف غالب نے اپنے اک شعر وچ کجھ ایس طرح کیتی اے۔
ہیں کواکب کچھ نظر آتے ہیں کچھ
دیتے ہیں دھوکا یہ بازی گر کھُلا
اخیر وچ ایہناں سیاستداناں دی نذر اک شعر جہڑا اپنے ووٹراں دے خلوص’ نوازشاں’ مہربانیاں تے عنایتاں دے بدلے وچ عوام نوں صرف بے وفائی تے بدعہدیاں دا تحفہ دیندے نیں۔
آپ ہی اپنے ذرا جورو ستم کو دیکھیں
ہم اگر عرض کریں گے تو شکایت ہو گی