پنجاب دے وزرائ

پنجاب وچ وزیراں نوں محکمے دے دتے گئے نیں زیادہ تر وزیر پرانی کابینہ دا حصہ سن جد کہ کجھ نویں چہرے وی کیبنٹ وچ شامل کیتے گئے نیں۔ پاکستان تحریک انصاف دے چیئرمین عمران خان نے ویڈیو لنک راہیں امیدواراں دے انٹرویو کیتے تے ماضی دے الٹ دیانتداری’ لوکاں وچ مقبولیت تے پارٹی نال وفاداری تے لمی وابستگی نوں سامنے رکھ کے وزیر بنان دا فیصلہ کیتا۔ پہلے مرحلے وچ وزیر بنائے جان والیاں وچ ظہیرالدین، فیاض الحسن چوہان، ہاشم جواں بخت، یاور بخاری، زین قریشی تے صمصام بخاری ورگے وڈے ناں شامل نہیں جو ساریاں لئی کسے اچنبھے دا کارن اے۔ مسلم لیگ ق توں وی اجے تک کسے نوں وزیر نہیں بنایا گیا پر وزیراعلیٰ چوہدری پرویزالٰہی تے اوہناں دے بیٹے مونس الٰہی نوں اکثریتی پارٹی دے چیئرمین عمران خان دا بھرواں اعتماد حاصل اے۔ صوبائی دارالحکومت لہور توں چاروں سابق وزراء نوں فیر اہم وزارتاں دتیاں گئیاں نیں۔
تحریک انصاف دے سینئر رہنما تے پی ٹی آئی لہور دے سابق صدر میاں محمودالرشید نوں بلدیات ورگی اہم وزارت دتی گئی اے۔ میاں محمود الرشید ایس توں پہلاں وزیر ہائوسنگ تے پبلک ہیلتھ رہ چکے نیں جد کہ پنجاب اسمبلی وچ لیڈر آف اپوزیشن پارٹی لئی خدمات نبھا چکے نیں۔ میاں محمودالرشید دی پارٹی لئی خدمات ناقابل فراموش نیں خاص کر پنجاب وچ تحریک انصاف نوں مضبوط تے مقبول جماعت بنان وچ اوہناں دے کردار نوں نظرانداز نہیں کیتا جا سکدا۔ اوہناں نوں سپیکر پنجاب اسمبلی بنان دا امکان سی پر اوہناں نے وزیر بنن نوں ترجیح دتی۔ میاں اسلم اقبال نوں انڈسٹری تے ہائوسنگ دیاں وزارتاں دین دا اعلان کیتا گیا اے دھیمے مزاج دے حامل لوکاں وچ مقبول میاں اسلم اقبال پچھلے دور وچ بطور وزیرانڈسٹریز صنعت کاراں نوں خاص سہولتاں دتیاں جہدے نال صوبے وچ کاروباری تے صنعتی شعبے وچ کاروبار تے تربیت دے فروغ تے ٹیکنیکل یونیورسٹیاں نوں قائم کرن وچ اوہناں دیاں کوششاں نوں ڈھیر سراہیا گیا۔
ڈاکٹر سمین راشد نوں اوہناں دی پارٹی نال کمٹمنٹ تے صحت دے شعبے وچ غیرمعمولی کارکردگی تے دوبارہ صحت دا قلمدان دین دافیصلہ کیتا گیا اے۔ تحریک انصاف دے پچھلے دور حکومت وچ ڈاکٹر یاسمین راشد نے لوکاں نوں علاج معالجے دیاں سہولتاں دین لئی ڈھیر کم کیتا خاص کر زچہ بچہ لئی کجھ نویں پراجیکٹ توڑ چاڑھے۔ احساس پروگرام وچ ڈاکٹر یاسمین راشد نے بھرویں معاونت کیتی جہدے نال پارٹی دی مقبولیت وچ وادھا ہویا۔
سدابہار وزیر تعلیم مرادراس نے بھاویں لوکاں توں دوری اختیار کیتی پر اک بکھرے ہوئے بے ہنگم محکمے نوں راہ راست تے لیان لئی اوہناں نے بھرویں کوشش کیتی۔ پوسٹنگ’ ٹرانسفر میرٹ تے کرن لئی ای ٹرانسفر سسٹم شروع کیتا تے درسی کتاباں دے نصاب وچ بہتری لیان دی کوشش کیتی پر اوہناں دی وزارت دوران سکولاں تے استاداں دی حالت زار تے تعلیم دے معیار وچ بہتری نہ لیاندی جا سکی۔ لہور دے قریبی ضلع قصور دے دو سابق وزیراں نوں فیر اہم وزارتاں دتیاں گئیاں نیں۔ کرنل ریٹائرڈ ہاشم ڈوگر نوں داخلہ تے جیل خانہ جات دیاں وزارتاں دتیاں گئیاں’ ہاشم ڈوگر دوران سروس اعلیٰ عہدیاں تے فائز رہے تے سکیورٹی معاملیاں دے ماہر نیں اوہناں دا تعلق معروف سیاسی خانوادے نال اے اوہناں دے والد بتیری واری ممبر صوبائی و قومی اسمبلی منتخب ہو چکے نیں۔
سابق وزیراعلیٰ سردار عارف نکئی دے صاحبزادے سردار آصف نکئی نوں ایس واری ایکسائز دی وزارت دتی گئی اے۔ سردار آصف نکئی پنجاب دے اک بااثر سیاسی گھرانے نال تعلق رکھدے نیں جہناں دی وزیراعلیٰ پنجاب چوہدری پرویزالٰہی نال وی قریبی رشتے داری اے۔ ضلع شیخوپورہ توں نوجوان تے ہردلعزیز وکیل نومنتخب خرم ورک نوں چیئرمین پی ٹی آئی نے خاص طورتے قنون دی وزارت دتی اے جو شیخوپورہ بار دے متحرک صدر خرم ورک لئی اعزاز دی گل اے۔ فیصل آباد ڈویژن توں ایس واری دو ممبران اسمبلی نوں پہلی واری وزارتاں دتیاں گئیاں نیں۔ فیصل آباد شہر توں تحریک انصاف دے پرانے کارکن لطیف نذر نوں معدنیات دی وزارت دتی گئی اے۔
بلدیاتی الیکشن توں کیریئر دا آغاز کرن والے لطیف نذر بڑے ایماندار تے پرعزم سیاسی کارکن نیں جو لمے عرصے توں سیاست وچ سرگرم نیں تے کجھ مرلے دے گھر وچ رہندے نیں۔ فیصل آباد توں مواصلات ورگی اہم وزارت تے فائز ہون والے علی افضل ساہی ایچسین کالج تے لمز یونیورسٹی توں تعلیم حاصل کرکے اپنے نیک نام تے شریف النفس والد سابق سپیکر پنجاب اسمبلی افضل ساہی دے نال سیاست وچ سرگرم نیں۔ واضح رہوے افضل ساہی ماضی وچ مواصلات دے وزیر وی رہ چکے نیں جد کہ اوہناں دے بیٹے پہلی واری ممبر اسمبلی تے وزیر ب نے نیں۔ حق’ انصاف تے چلن تے کرپشن دے خلاف آواز بلند کرن والے وزیر خانہ محسن لغاری تے ہور وزیراں دا تعارف اگلے کالم وچ پیش کیتا جاوے گا۔٭