بابائے صحافت بارے کتاب”ظفر علی خان اور ان کا عہد”

بابائے صحافت مولانا ظفر علی خان ملت اسلامیہ دے اوہناں عظیم المرتبت افراد وچوں اک نیں جہناں نوں قدرت کسے قوم نوں اوس ویلے ودیعت کردی اے جدوں اوہدی تقدیر بدلنا مقصود ہووے۔ اج دی نویں نسل ایس مرد مجاہد دی زندگی توں پوری طرح آشنا نہیں اے ایس لئی کہ ایہدی زندگی دے آخری دناں وچ ایہدی جسمانی تے ذہنی صلاحیتاں نے جواب دے دتا سی مگر جہناں لوکاں نے 1911توں 1947 دا دور ویکھیا اے یا پڑھیا اے اوہناں وچ کوئی ایسا نہیں ہووے گا جہڑا اوہناں دی خدمات توں واقف نہ ہووے۔ 1906 وچ جدوں آل انڈیا مسلم لیگ دا ڈھاکہ وچ قیام عمل وچ آیا تے ظفر علی اک پرجوش نوجوان دی حیثیت نال پنجاب دی نمائندگی کر رہیا سی۔ اوہدے مگروں 1947 توں قیام پاکستان تک آزادی وطن تے اسلام لئی ہر تحریک وچ قائدانہ حیثیت نال نمایاں نظر آندا اے۔ اللہ تعالیٰ نے مولانا ظفر علی خان نوںغیر معمولی صلاحیتاں عطا فرمائیاں سن اوہ بیک وقت بے بدل ادیب’ قادرالکلام شاعر’ نڈر صحافی’ بلند پایہ مترجم’ بے باک عظیم صحافی’ عاشق رسولۖ’ شعلہ بیان خطیب تے سچے تے پکے مسلمان سن لیکن اوہناں نے اپنی ساری خوبیاں اسلام دی عظمت رفتہ دی بحالی تے آزاد وطن لئی صرف کیتیاں تے اوہناں خوش قسمت افراد وچوں سن جہناں نے اپنی حیاتی وچ آزاد وطن دا سورج طلوع
ہوندے ویکھیا۔ ظفر علی اور ان کا عہد… ایسے عظیم المربیت دی حیات تے خدمات دے حوالے نال ضخیم کتاب اے جہنوں اوہناں دے ہمسایہ تے قریبی رفیق جہڑے اوائل عمر وچ اوہناں دے پیروکار بن گئے سن۔ ایس طرح اوہ خود وی ایس عہددی چلدی پھردی تصویر وی سن جہدے اتے اوہناں نے قلم چکیا اے یعنی حکیم عنایت اللہ نسیم سوہدروی علیگ ۔زیر نظر کتاب وچ حکیم صاحب نے ظفر علی خان دی زندگی دے مختلف گوشیاں نوں منور کرن لئی عنوان قائم کیتے نیں تے ایس حد تک معلومات فراہم کیتیاں نیں کہ ایہدے مگروں اوہناں دی زندگی دے کسے گوشہ بارے تشنگی نہیں رہندی۔ کتاب دے ابتدا ابواب وچ مولانا دے خاندانی پس منظر دے نال نال ابتداء تعلیم ‘ کالج دا زمانہ تے والد دی رحلت دا تذکرہ اے فیر مولانا دے والد مولوی سراج الدین دے انتقال مگروں ظفر علی خان دا اپنے والد دی وصیت دے مطابق زمیندار جاری رکھن دا فیصلہ سی جہنے اوہناں نوں برصغیر دی صحافت وچ اک عظیم مجاہد دی حیثیت نال متعارف کرایا۔ مولانا ظفر علی خان نے صحافت دے میدان تے آزادی وطن لئی جہڑی تریخ ساز جدوجہد کیتی اوہنوں پڑھ کے قاری عش عش کر اٹھدا اے۔ ایس کتاب وچ مولانا دی زندگی تے خدمات نوں سمجھن لئی مختلف زاویاں تے اوہناں دا تجزیہ کرن دی سعی کیتی گئی اے جہدے توں مولانا دی سیاسی زندگی اوہناں دی شاعری دا پس منظر مختلف تحریکاں وچ اوہناں دا کردار قائداعظم تے علامہ اقبال تے دوجے اکابرین نال تعلقات سمجھن وچ مدد ملدی اے۔ مسئلہ حجاز’ مایہ ناز فرزند علی گڑھ’ قادیانیت’ بدیہہ گو’ دیہاتی زندگی’ تحریک پاکستان وچ خدمات’ مسجد شہد گنج دے ابواب وچ تے ایسی معلومات سامنے آندیاں نیں جہڑی پہلے سامنے نہیں آئیاں سن تے بعض ایسی نظماں وی نیں جہڑی پہلے کسی مجموعہ کلام وچ نہیں نیں بلکہ صرف زمیندار وچ شائع ہوئیاں سن۔ مولانا دے علمی’ ادبی تے سیاسی معرکیاں نوں ایس خوبصورت پیرائے وچ بیان کیتا گیا اے کہ قاری خود نوں ایس عہد توں گزردا ہویا محسوس کردا اے۔ ایہہ کتاب جتھے مولانا دی جامع سوانح عمری اے اوتھے 20ویں صدی دے نصف اول دی سیاسی دینی تے ملی تریخ وی اے۔ مولانا ظفر علی خان اک ہنگامہ خیز شخصیت دے مالک سن ۔ اوہناں دے بعض کارنامے نمایاں تے قطعی نیں تے بعض متنازعہ وی چونکہ کتاب دے مصنف مولانا دے رفیق رہے تے سب توں وڈے ماہر ظفریات ‘ایس طرح ایس حوالے نال اوہناں دی رائے دلیل بن سکدی اے تے ایہہ گل آکھی جا سکدی اے کہ ہن تک چھپن والی ساری کتاباں توں ودھ جامع تے مستند اے۔ ایہہ کتاب نہ صرف ساڈی جدوجہد آزادی دی تریخ دا منور باب اے بلکہ ایس مرد مجاہد دی داستان حیات وی اے جہدی سب توں وڈی خوبی اسلام نال والہانہ محبت تے محمد عربی نال عشق رہیا۔ ایہہ داستان روحاں نوں گرماندی تے دلاں نوں تڑپاندی اے۔ الغرض ایہہ کتاب مولانا ظفر علی خان دی حیات خدمات دے نال ایس عہد دا جیندا جاگدا مرقع اے جہدے وچ عہد رفتہ دی لٹک کھٹک وی اے تے معاصرانہ چشمکیاں تے سیاسی اویزوشاں دی کہانی وی اے۔ مختلف تحریکاں دے مدوجزر’ سیاسی نشیب و فراز تے لمحہ بہ لمحہ اتار چڑھائو وی اے۔ صحافت تے خطابت دی معرکہ آرائیاں وی۔ ادب ‘ صحافت تے سیاست نال دلچسپی رکھن والیاں لئی تریخ ساز لمحات دا حسین مرقع تے اک عظیم شخصیت دے سوانحی نقوش تے خدمات دا دلآویز پیکر۔ قرب مکانی تے زمانی دی وجہ نال حکیم صاحب مولانا دے قریب رہے فیر نظریات تے جذبات دی ہم آہنگی نے باہم پیوست رکھیا ۔ انج ایہہ کتاب ایس تعلق دا بہترین ثمر اے تے انج حکیم عنایت اللہ نسیم عمر بھر تریخ سازی کردے رہے۔ اپنی عمر دے آخری دور وچ ایہہ تریخ نگاری دا فریضہ وی احسن انداز وچ سرانجام دتا۔ ایہہ کتاب جہڑی کہ بڑی تقطیع دے 516 صفحیاں اتے مشتمل اے۔ پہلی واری 1985 وچ شائع ہوئی سی تے عرصہ توں نایاب سی۔ ہن ایہنوں مولانا ظفر علی خان میموریل ٹرسٹ 21سی نون ایونٹ مسلم ٹائون لاہور نے خوبصورت انداز وچ شائع کیتا اے تاں جے مولانا دے افکار تے جدوجہد نوں نویں نسل تک پہنچایا جاوے جہڑے ٹرسٹ دے وی مقاصد وی نیں تے قومی خدمت وی اے۔ کتاب دا پیش لفظ نواب زادہ نصراللہ خان نے لکھیا اے جد کہ عرض ناشر دے عنوان نال چیئرمین ٹرسٹ خالد محمود تے دیباچہ مجیب الرحمن شامی نے لکھیا اے تے خوب لکھیا اے۔ محمد شریف چشتی نے مصنف کتاب دا چنگے پیرائے وچ تعارف کرایااے۔ ڈاکٹر سید عبداللہ نے ایس کتاب دے حوالے نال لکھیا اے کہ حکیم صاحب نے ایس کتاب نوں نہ صرف اپنی معلومات تک محدود رکھیا بلکہ جتھوں قابل اعتماد مواد لیا اوہنوں بڑی سعی تے کاوش نال جمع کر کے کتاب وچ شامل کردتا ۔حکیم صاحب نے کھِلرے مواد نوں یکجا کر کے بڑے قیمتی سرمایہ معلومات نوں محفوظ کر دتا اے ورنہ ایہدے ضائع ہو جان دا ڈر سی۔ ایہہ کتاب آئندہ دے محققین تے مصنفین لئی ماخذ دا درجہ رکھدی اے۔ ایس کتاب دے مصنف نے آن والے طالبان تحقیق نوں محنت توں بچا لیتا اے۔ مجیب الرحمن شامی نے لکھیا اے کہ ایہہ کتاب پاکستانی تریخ سیاست تے صحافت دے طلبہ لئی اک تحفہ خاص اے۔ مولانا ظفر علی خان تے اوہناں دے عہد دی جہڑی تصویر حکیم نسیم صاحب نے کھچی اوہ کوئی دوجا کدی نہیں کھچ سکدا سی کہ اوہناں دا علم کتابی نہیں سی۔ اوہناں دے ذریعے اسیں مولانا تے اوہناں دے عہد وچ ساہ لے سکدے تے اوہنوں اوہناں دے لفظاں وچ جیندا جاگدا ویکھ سکدے نیں جد کہ خالد محمود نے اوہنوں مولانا بارے معلومات دا قیمتی خزانہ قرار دتا اے۔ ایسی کتاباں سارے تعلیمی اداریاں تے لائبریریاں وچ ہونی چاہیدیاں نیں تاں جے نویں نسل اپنے اکابر دے افکار تے جدوجہد اتے چانن حاصل کرے۔ خوبصورت طباعت نال مزین بڑی تقطیع 516 صفحیاں اتے مشتمل ایہہ کتاب ظفر علی ٹرسٹ 21نون ایونیو مسلم ٹائون لاہور فون نمبر0423-5846676 توں اک ہزار وچ دستیاب اے۔