پنجابی چونترہ دی17 ویں بیٹھک

پنجاب پنجابیاں دا اے ایتھے سدا پنجابی وسدے رہنے نے کوئی شئے کدے وی اپنی تاثیر نہیں چھڈدی تے دھرتی اپنی تاثیر کیویں چھڈ سکدی سے پنجاب دی دھرتی دی تاثیر وی پنجابی بولی شامل اے ایہدے انکھی پتر ایس نال پیار کردے رہن گے ۔ضلع شیخوپورہ دی تحصیل صفدر آبادمنڈی ڈھاباں سنگھ دے پنجابی پیاریاں دا اک منڈل جو پنجابی زبان نال پیار کردا دے تے ایس نال دھروہندے نہیں ویکھ سکدا ، ایس منڈل نے آج توں 2 ورھے پہلے اک اکٹھ کیتا تے اے ٹیچا متھیا کہ ہر مہینے اک پنجابی دی بیٹھک لائی جاوے جس وچ آن والی پیڑی نوں پنجابی نال جوڑیا جاوے نالے پنجاب دے صوفیا کرام دا کلام سنایا جاوے تاکہ آن والی پیڑی پنجاب دے صوفیا رہتل تے بولی نال جڑی رہوے۔
ایس منڈل دا نام پنجابی چونترہ رکھیا گیا ایس دے سرپرست پنجابی نال پیار کرن والے رانا صادق علی تے پردھان پنجاب دے انکھی پتر چوہدری اعظم چوہان نے ایس پنجابی چونترہ دے سنچالک
لہندے تے چڑھدے پنجاب دے مشہور شاعر ندیم افضل نے ۔ جناب اسد شبیر مانگٹ، ماسٹر شوکت علی ،مرزا یاسر علی، جبار عمر حیاب، رانا شاہد علی پنجابی چونترہ د صلاح کاراں وچ شامل نیں۔
ہر مہینے دے پہلے اتوار ایس پنجابی چونترہ دی چھتر چھاویں اک پنجابی بیٹھک لائی جاندی اے جس وچ
پنجابی زبان دی اہمیت تے دسی جاندی اے تے نال نال علاقائی کلاکار پیر وارث شاہ دا کلام ہیر ، کلام بابا بلھے شاہ ، کافی بابا فرید کوٹ مٹھن تے پنجاب دھرتی دے صوفیا دا کلام سنایا جاندا اے۔
جون 2022 وچ پنجابی چونترہ ، دا سالانہ پروگرام ہویا جس وچ پنجاب بھر توں کلاکاراں تے سوجھواناں رلت کیتی ۔پنجابی چونترہ دے سالانہ اکٹھ وچ سفیر پنجابی، پنجاب دے انکھی پتر تے دنیا تے منے پرمنے کہانی کار جناب الیاس گھمن صاحب وی اپنے بیلیاں سمیت رلت کیتی ۔ اگست وچ اس دی ستارویں بیٹھک لگی جو صفدر آباد تحصیل دے سک پنڈ بوریوالا وچ سجائی گئی جس دی مجمانی جناب عمر حیات ہوراں کیتی ایس دا مڈھ اللہ پاک دے پاک کلام توں بنھیا گیا تے نعت جگ دھمے نعت خواں اعجاز حیدری صاحب پیش کیتی پنڈ دے بزرگاں جواناں تے بالاں رلت کیتی تے بابیاں اپنے پنجابی نال پیار دا ثبوت دیندے ہوئے مختلف کلام سنائے ۔ کلام وارث شاہ ہیر گائیک طارق محمود تے پیش کیتا تے کافی صوفی قاسم علی چشتی صاحب نے سنا کے بیٹھک تے پنجابی منتر پھوک دتا ۔گل بات کردے ہوئے رانا صادق علی صاحب آکھیا کہ پنجابی زبان اگلی نسل تک اپڑاونی بہت ضروری اے فر ہی پنجاب بچے گا۔ ندیم افضل صاحب پنجابی بولن تے زور دتا نالے دسیا کہ پنجابی زبان دنیا بھر دی زباناں توں اڈھ صوفیا کرام دی شاعری دی وجہ توں اک اچا تے سچا مقام رکھدی اے۔
پنجابی رہتل نال جڑی شاعری وی بیٹھک چہ سنائی
بچپن دے اوہ یار یرانے اج وی چیتے آندے نے
ہو گئے نے جو سمے بگانے اج وی چیتے آندے نے
نویں رواجاں دے وچ وڑ کے منڈے بھاویں بھل گئے نے
ماں نوں پت دے سہرے گانے اج وی چیتے آندے نے
سو دو سو نال بے شک بھاویں اج دیہاڑی لنگدی نئیں
پئو توں لینے وڈے آنے اج وی چیتے آندے نے
بالاں کولوں سلیٹ تے فٹی اج استاداں کھو لئی اے
سانوں فٹیاں کلماں کانے اج وی چیتے آندے نے
کسے دے کول دوات نا یونی اوہنوں ٹوبے دے دینے
ٹوبیاں توں فر دینے طعنے اج وی چیتے آندے نے
محلے دے سب کڑیاں منڈے رل مل جو جو کھیڈ سے ساں
ٹاپو دے اوہ سانوں خانے اج وی چیتے آندے نے
کھڈی چاہنا باراں ٹہنی کھیڈ کے جنہے ہر جاناں
اوہدے سر آنے کھڑبانے اج وی چیتے آندے نے
بھاویں ہوون دانائی سوٹاں بوٹاں دے وچ ٹر گئی اے
افضل پگاں والے دانے اج وی چیتے آندے نے
پنجابی چونترہ صفدر آبادمنڈی ڈھاباں سنگھ دے پردھان رانا اعظم چوہان ہوراں آکھیا کہ سب توں ودھ ذمے واری اج دی ماں تے ہے کہ اوہ اپنے بالاں نال پنجابی زبان وچ گل کرے تاکہ آن والی پیڑی تک پنجابی اپڑ سکے اخیر تے رحمت علی صدیقی دی کتاب ، فقیری ونڈ، رانا اعظم چوہان نے ندیم افضل ، رانا صادق علی تے طارق محمود جی نوں پیش کیتی۔ اٹھارواں پروگرام صفدر آباد شہر وچہ ہون دا اعلان کیتا۔
چا پانی مگروں پنڈ دے لوکاں پروہنیاں نوں بڑے مان تے ادب نال رب راکھا آکھیا ۔