سیلاب دیاں تباہ کاریاںتے ساڈے اعمال

ایس ویلے سب توں اہم معاملہ سیلاب زدگان دا اے کہ کجھ سمجھ وچ نہیں آ رہیا کہایس آفت دی یلغار نوں کیویں روکیا جاوے۔ جدوں وی سانوں کوئی اجیہا سانحہ جگاندا اے تے اسیں اگلے وقت تک خواب بن کے سوں جانے آں یعنی اینے ورھیاں وچ کدی نہیں سوچیا کہ پیش بندی کیویں کیتی جاوے تے ایس بے رنگ پانی نوں کدھرے سٹور کرن دا سوچیا جاوے۔ ہن جو صاحب فرما رہے نیں کہ جے ڈیم بن دے اینی تباہی نہ ہوندی کوئی پچھن والا پچھے کہ تہاڈے اپنے سنہر دور وچ تہانوں کنہے ایس کم توں روکیا سی قومی فکر دی بہوں کمی اے۔
بہرحال قوماں تے آزمائش آندی اے تے ساڈے تے وی 2005ء دے زلزلے دے بعد ایہ سب توں وڈی آزمائش اے۔ وچارے غریب لوکاں دے مال مویشی سب کجھ رڑ گئے جیویں قسمت دی سلیٹ صاف ہو جاوے۔ سوات دے منظر ویکھے نہیں جاندے کہ پانی دے ریلے دے سامنے وڈیاں عمارتاں وی مٹی دا ڈھیر ثابت ہوئیاں کوئی کہندا اے کہ چھتاں تے چڑھ کے اذاناں دیو جواب وچ کسے نے خوب کہیا کہ اپنے اندر اذان دیو اپنے آپ نوں بدلو۔ کیہ شک اے کہ اپنے اعمال اجہے نیں تسیں اک کلو خالص ددھ حاصل نہیں کر سکدے زندگی بچان والیاں دوائیاں وچ ملاوٹ۔ چلو ایہ تے قدرتی آفت اے کہ جنہے ہزاراں گھر ڈھا دتے تے لوکا ںنوں بے گھر کر دتا پر جہڑے لوک اپنے گھراں وچ رہ رہے نیں اوہناں دے نال حکومت وقت نے کیہ کیتا۔ تسیں یقین کرو کہ میں گوالے دے ڈیرے تے ددھ لین والیاں نوں بددعاواں دیندے سنیا اصل وچ ایہو پبلک پوائنٹس نیں جتھے پتہ لگ لگدا اے کہ کہتی ہے تجھ سے خلق خدا غائبانہ کیا’ اک بجلی دے بلاں نے لوکاں دا لک بھن دتا اے آپ گوالا منور اپنا بل چک کے مینوں وکھان لگا سر جی ویکھو تے سہی پندراں دناں دا بل 20 ہزار روپیے پتہ نہیں شاید اوہنے قسط کروائی سی اوتھے موجود لوک حکومت دے خلاف جہڑی زبان بول رہے سن اوہ لکھی تے کیہ سنائی نہیں جا سکدی۔ میرا خیال اے عمران خاں نوں ہن کجھ وی نہیں کرنا پوے گا پر اوہنے وی تے سیلاب زدگان لئی کجھ نہیں سوچیا۔ساڈے لکھن لکھان دے بعد پتہ لگا اے کہ اوہ آفت زدہ لوکاں دے نال رجوع کرنا چاہندے نیں ساڈی بے حسی ایس توں ودھ کے کیہ ہووے گی کہ ساڈے میڈیا تے وی سوائے شہبازگل دے کجھ نہیں سی۔
ساڈی مرغزار کالونی وچ ہردلعزیز صدر محمد شہزاد چیمہ نے اپنی کالونی دا کیمپ قائم کیتا تے ساریاں مسجداں وچ اعلان کروایا کہ امداد وچ حصہ پائو۔ واقعتاً ہن ایہ کم تھلڑی سطح تے کرن والا اے کہ ایس حوالے نال اپنا اثرو رسوخ استعمال کرو قطرہ قطرہ دریا بن جاندا اے۔ ایس حوالے نال مینوں ایدھی بڑے یاد آئے کہ اوہ تے فٹ پاتھ تے آ کے کپڑا وچھا دیندے سن ایس ویلے لوکاں نوں موٹی ویٹ کرنا بڑا ضروری اے۔ ہن آخر وچ میں اک تقریب دا تذکرہ وی کرنا اے کہ ایہدے وچ وی ایہو موضوع رہیا۔ شاعراں تے ادیباں دا ایہ اکٹھ پلاک وچ سی ایہ تے تسیں جان دے او کہ پلاک پنجابی لینگوئج آرٹ اینڈ کلچر پنجابی دی ترقی لئی بنایا گیا سی جہدی ڈائریکٹر جنرل ڈاکٹر صغراصدف نیں۔ پلاک خوبصورت عمارت پرویزالٰہی صاحب دا کارنامہ اے جدوں اوہ وزیراعلیٰ سن تے اوہ ہن وی وزیراعلیٰ نیں مینوں تے اوہ شاندار تقریب وی یاد اے جدوں ایہدا افتتاح ہویا سی بنیادی طور تے ایہ ادارہ پنجابی زبان تے ثقافت دے فروغ لئی اے پر چنگی گل اے کہ ڈاکٹر صغراصدف ایس حوالے نال متعصب بالکل وی نہیں۔ پلاک دے ہال وچ کئی دوجے پروگرامز وی ہو جاندے نیں اصل وچ ایہ ادارے لوکاں نال ہوندے نیں ایہو وجہ اے کہ ڈاکٹر صغراصدف نے ہمیشہ اپنی ٹیم دے نال رَل کے ایس ادارے نوں ہمیشہ فعال رکھیا۔ پنجاب حکومت نوں چاہیدا اے کہ اوہ ایس ادارے دی گرانٹ ودھاوے جہڑی ایس ویلے بہوں گھٹ اے اوہ جیویں تیویں ہال کرائے تے دے کے گزارا کردے نیں۔ پچھلے مہینے ڈاکٹر صغراصدف دو مشاعرے کروائے نیں پہلے وچ نذیرقیصر دی صدارت سی تے غلام حسین ساجد مہمان خصوصی سن۔ دوجا مشاعرہ جہدے وچ میری صدارت سی تے اومان توں آئے ساڈے دوست شکیل جاذب مہمان خصوصی سن۔ بڑے چنگے چنگے شعر سنن نوں ملے۔٭