میلہ بابا بُلھے شاہؒ

پنجاب انسٹیٹیوٹ آف لینگوئج، آرٹ اینڈ کلچر (پِلاک) تے ہوم اکنامکس یونیورسٹی دے اشتراک نال عظیم صوفی شاعر بابا بلھے شاہ دے عرس دی مناسبت نال میلہ بلھے شاہ دا پربندھ کیتا گیا جہدے وچ سیمینار تے صوفیانہ کلام گائیکی شامل سی۔ سیمینار دی صدارت پنجابی دانشور اقبال قیصر نے کیتی جد کہ دوجے اظہار خیال کرن والیاں وچ ڈاکٹر عباد نبیل شاد، ڈاکٹر کنول فیروز، اکرم شیخ، حمیرا بھٹی، مدثر اقبال بٹ تے ڈاکٹر صغرا صدف شامل سن۔
مقررین نے آکھیا کہ بابا بلھے شاہ نے اپنے کلام وچ وحدت اتے بہت زور دتا اے۔ بُلھے شاہ دے مطابق رب تعالیٰ دی ذات تے اوہدی بنائی مخلوق نال پیار کرنا ای ایس کائنات دی تخلیق دا مقصد اے۔ کوئی وی انسان اوس ویلے تک اشرف المخلوقات کہلان دا حقدار نہیں جدوں تک اوہ اپنے جئے انساناں نال محبت’ امن تے رواداری دا سلوک نہیں کردا۔ اللہ تعالیٰ نوں پان داسب توں آسان تے یقینی رستہ مخلوق خدا توں ہو کے لنگھدا اے۔ اقبال قیصر نے آکھیا کہ ”بلھے شاہ اساں مرنا ناہیں گور پیا کوئی ہور” توں مراد ایہہ اے کہ انسانیت دی فلاح و بہبود لئی کم کرن والے کدی نہیں مردے ہمیشہ زندہ رہندے نیں۔ ایہدے وچ کسے وی مذہب دی کوئی قید نہیں سارے مذہب اچھائی دا سبق دیندے نیں۔ ہر مذہب وچ چنگے تے بھیڑے لوک موجود ہوندے نیں۔
ایس موقعے اتے ڈائریکٹر جنرل پلاک ڈاکٹر صغرا صدف نے آکھیا کہ بابا بلھے شاہ نے اپنے کلام وچ ”اک نقطے وچ گل مکدی اے” تے ”اکو الف تیرے درکار” وچ جہڑا سبق دتا اے اوہ نقطہ سب توں چھوٹی اکائی اے جہنوں ہور تقسیم نہیں کیتا جا سکدا۔ اسیں سارے اک ای رب دے بندے آں ۔ ہر بندے نوں دوجے دی رائے دا احترام کرنا چاہیدا اے۔ اپنے آپ نوں عقل کل نہیں سمجھنا چاہیدا۔ انسان ہون دے ناطے ساڈے ساریاں کولوں غلطیاں ہو جاندیاں نیں۔ اوہناں اتے تکرار کرن دے بجائے غلطیاں توں سبق حاصل کرنا چاہیدا اے۔
چیئرمین پنجابی میڈیا گروپ مدثر اقبال بٹ ہوراں دا کہنا سی کہ پنجابی صوفیاں دی تعلیمات عام ہون گِیاں تے پنجاب اور پورے پاکستان وچ امن ای امن ہوئے گا کیوں کے صوفیاں اپنی شاعری راہیں محبت، امن تے بھائی چارے دا درس دِتا اے۔ اجیہے اکٹھ کروان والے مبارکباد دے مستحق نیں جنھاں دی محنت پاروں سادی نویں نسل بابا بُلھے شاہ دی تعلیمات توں جانو ہوئے گی۔
دوجے حصے وچ استاد طاہر اقبال’ سجاد بیلا’ روحیل وقاص’ سلمیٰ صابر’ نگینہ جنت تے ناصر بیراج نے بلھے شاہ دا کلام پیش کر کے حاضرین کولوں خوب داد وصول کیتی۔ پروگرام وچ نظامت دے فرائض ڈاکٹر خاقان حیدر غازی نے سرانجام دتے۔ ڈی جی پلاک ڈاکٹر صغرا صدف ولوں پروہنیاں نوں پھلاں دے تحفے وی پیش کیتے گئے۔